سۋدى ەسەپكە الۋدى سيفرلاندىرۋدى قامتاماسىز ەتۋ قاجەت - اسقار مامين
«اكىمدەر گيدروتەحنيكالىق قۇرىلىستاردى رەكونسترۋكتسيالاۋ جۇمىستارىن قامتاماسىز ەتۋى ءتيىس. ماگيسترالدىق ارنالارعا قازىرگى زامانعى سۋ ۇنەمدەۋ تەحنولوگيالارىن ەنگىزۋدى جانە سۋدى ەسەپكە الۋدى سيفرلاندىرۋدى قامتاماسىز ەتۋ قاجەت. تۇركىستان وبلىسىندا ىسكە اسىرىلعان ماگيسترالدىق ارنانى سيفرلاندىرۋ بويىنشا قاناتقاقتى جوبانى سۋ شارۋاشىلىعىنىڭ بارلىق نەگىزگى نىساندارىنا تاراتۋ كەرەك»، - دەدى ۇكىمەت باسشىسى.
ونىڭ ايتۋىنشا، سۋمەن قامتاماسىز ەتىلۋدىڭ تومەندەپ بارا جاتقانىن ەسكەرىپ، سۋ الۋدىڭ قولدانىستاعى ءليميتى اياسىندا سۋ رەسۋرستارىن ۇتىمدى پايدالانۋدى قامتاماسىز ەتۋ كەرەك.
«سونىمەن قاتار، قىزىلوردا، الماتى جانە تۇركىستان وبلىستارىندا ىلعالدى كوپ قاجەت ەتەتىن داقىل - كۇرىش، جوسپاردان ارتىق ەگىلگەن. بۇعان جۇمسالعان ەلەۋلى سۋ كولەمىن ەكونوميكالىق تۇرعىدان تيىمدىرەك داقىلداردى - كوكونىستەر، جەمىس- جيدەكتەر، راپس، سويا وسىرۋگە جۇمساۋعا بولار ەدى. سوندىقتان اكىمدىكتەر بەكىتىلگەن ەگىس جوسپارىن قاتاڭ ۇستانۋى ءتيىس»، - دەدى پرەمەر-مينيستر.
وسىعان وراي ا. مامين ءبىرقاتار تاپسىرمالاردى جۇكتەدى.
«اۋىل شارۋاشىلىعى، ەكولوگيا، ساۋدا مينيسترلىكتەرى ىشكى قاجەتتىلىكتەر مەن ەگىس الاڭىنىڭ قۇرىلىمىن ءارتاراپتاندىرۋ بويىنشا مىندەتتەردى ەسكەرە وتىرىپ، ىلعالدى كوپ قاجەت ەتەتىن داقىلدار ەگىسىن اۋىستىرۋ ماسەلەسىن اكىمدەرمەن پىسىقتاسىن. بۇل اگروونەركاسىپتىك كەشەندى دامىتۋدىڭ جاڭا باعدارلاماسىنا ەنگىزىلۋى كەرەك»، - دەدى ول.
ۇكىمەت باسشىسىنىڭ سوزىنە قاراعاندا، دۇنيەجۇزىلىك بانكتىڭ بولجامىنا سايكەس الداعى 20-30 جىلدا ورتالىق ازيا ەلدەرىندە سۋ تاپشىلىعى وسەدى. سوندىقتان سۋ رەسۋرستارىن بارلىق مەملەكەتتەردىڭ مۇددەلەرىن ەسكەرىپ، ءتيىمدى پايدالانۋ ماسەلەسىنىڭ ماڭىزى ارتىپ وتىر.
«وسىعان وراي ەكولوگيا مينيسترلىگىنە مۇددەلى مەملەكەتتىك ورگاندارمەن بىرلەسىپ، كورشى مەملەكەتتەردىڭ سالالىق ۆەدومستۆولارىمەن شەكاراارالىق وزەندەردى ءوزارا ءتيىمدى پايدالانۋدى قامتاماسىز ەتۋ بويىنشا جۇمىستى كۇشەيتۋدى تاپسىرامىن»، - دەدى پرەمەر-مينيستر.
«ەكولوگيا جانە اۋىل شارۋاشىلىعى مينيسترلىكتەرى اكىمدىكتەرمەن بىرگە سۋ شارۋاشىلىعى نىساندارىن سالۋ جانە رەكونسترۋكتسيالاۋ، سونىمەن قاتار سۋ ۇنەمدەۋ تەحنولوگيالارى مەن سۋدى ەسەپكە الۋدىڭ سيفرلىق جۇيەلەرىن ەنگىزۋ بويىنشا جوبالاردى ىسكە اسىرۋ بويىنشا جۇمىستى جالعاستىرسىن»، - دەدى اسقار مامين.
بۇدان بۇرىن حابارلانعانداي، ۇكىمەت باسشىسى سۋ رەسۋرستارىن باسقارۋدىڭ مەملەكەتتىك باعدارلاماسىنىڭ جوباسى ازىرلەنگەندىگىن ءمالىم ەتكەن بولاتىن.
ايتا كەتەيىك ، بۇگىن ۇكىمەت وتىرىسىندا ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى ەلىمىزدە سۋ ۇنەمدەۋشى تەحنولوگيالاردى ەنگىزۋ قانداي ناتيجە بەرەتىنىن ايتتى.
