ەكولوگيا ءمينيسترى وزەن سۋلارىن پايدالانۋ كورسەتكىشىن ايتتى
«سوڭعى جىلدارى وزەن اعىنىنىڭ ناقتى رەسۋرستارى جىلىنا 90-100 تەكشە شاقىرىمدى قۇرادى. ونىڭ 51 گە جۋىق تەكشە شاقىرىمى - جەرگىلىكتى اعىن، ال قالعانى قىتايدان، ورتالىق ازيا ەلدەرىنەن جانە رەسەيدەن ترانسشەكارالىق وزەندەر ارقىلى كەلىپ تۇسەدى. حالىقتىڭ جانە ەكونوميكا سالالارىنىڭ قاجەتتىلىكتەرى ءۇشىن پايدالانىلاتىن سۋدىڭ جالپى كولەمى شامامەن 25 تەكشە شاقىرىمدى قۇرايدى. ونىڭ ىشىندە اۋىل شارۋاشىلىعىنا - 15 تەكشە شاقىرىم ، ونەركاسىپكە - 6 تەكشە شاقىرىم جانە كوممۋنالدىق شارۋاشىلىققا ءبىر تەكشە شاقىرىم تيەسىلى. ال تاسىمالداۋ كەزىندەگى شىعىندار ءۇش تەكشە شاقىرىمدى قۇرايدى. سونىمەن قاتار، ەكولوگيالىق جۇيەلەردى قولداۋ ءۇشىن شامامەن 50 تەكشە شاقىرىم قاجەت»، - دەدى مينيستر ۇكىمەت وتىرىسىندا.
ونىڭ ايتۋىنشا، سوڭعى ءۇش جىلدا قازاقستان سۋ از تسيكلىنە كىردى.
2019-جىلى وزەن اعىسىنىڭ جالپى كولەمى 83 تەكشە شاقىرىمدى قۇرادى. بۇل ورتاشا كوپ جىلدىق كورسەتكىشتەن جيىرما پايىزعا از.
«ايتا كەتۋ كەرەك، رەسپۋبليكا بويىنشا پايدالانىلاتىن سۋدىڭ %97 وڭتۇستىكتەگى ءتورت وبلىسقا تيەسىلى. رەسپۋبليكا بويىنشا پايدالانىلعان سۋدىڭ ناقتى كولەمى 13,3 تەكشە شاقىرىمدى قۇرادى. بۇل 2019-جىلمەن سالىستىرعاندا 1 ك م3 ارتىق»، - دەدى مىرزاعاليەۆ.
