استانادا ازىق-تۇلىك باعاسىن وسىرمەۋ ءۇشىن قانداي شارالار قولعا الىنعان؟
«ازىق-تۇلىك قاۋىپسىزدىگى ماسەلەسى - باستى نازاردا. ءبىز الەۋمەتتىك ماڭىزداعى ازىق-تۇلىكتىڭ باعاسىن تۇراقتاندىرۋ ءۇشىن ءبىرقاتار شارالاردى جۇزەگە اسىردىق. ساۋدا جەلىلەرىنە «اينالىم مەحانيزمى» بويىنشا بولىنەتىن سومانى 13 ەسەدەن استام - 180 ميلليون تەڭگەدەن 2,4 ميلليارد تەڭگەگە دەيىن وسىردىك. بۇل ارەكەتىمىز الەۋمەتتىك ماڭىزدى تاۋارلاردىڭ 16 ءتۇرىنىڭ قۇنىن ۇستاپ تۇرۋعا مۇمكىندىك بەردى. سونىمەن بىرگە، ساتىپ الۋدى ۇلعايتتىق جانە باعانى تۇراقتاندىرۋعا قاتىساتىن ساۋدا جەلىلەرىنىڭ سانىن 4 تەن 12 گە دەيىن كوبەيتتىك.
ولار - ماگنۋم، استىقجان، كەڭمارت، ۆكۋسمارت، ا2، مەترو، انۆار، راحمەت، اقمول، سمولل، «استانالىق» بازارى، شاپاعات» دەپ جازدى شاھار باسشىسى Instagram پاراقشاسىندا.
اكىمنىڭ ايتۋىنشا، شارۋا قوجالىقتارىمەن قوسىمشا 704 ميلليون تەڭگەگە 5 مىڭ توننا كوكونىس ساتىپ الۋعا فورۆاردتىق كەلىسىم جاسالعان. نان ونىمدەرى باعاسىن تۇراقتاندىرۋعا جەرگىلىكتى ناۋبايحانالارعا 600 ميلليون تەڭگەدەن اسا قارجى بولىنگەن.
«بۇل شارالار الەۋمەتتىك ماڭىزدى ازىق-تۇلىك تاۋارلارىنىڭ باعاسىن ۇستاپ تۇرۋعا كادىمگىدەي كومەكتەستى. ءبىرقاتار ءىرى ساۋدا جەلىلەرى مەن تاۋار وندىرۋشىلەردىڭ باسشىلىعىمەن كەزدەسۋ كەزىندە وسىنداي ارىپتەستىكتى ءارى قاراي جالعاستىرۋ جاعىن تالقىلادىق. ساۋدا جەلىلەرىنە «اينالىم مەحانيزمى» بويىنشا بولىنەتىن سومانى 2021-جىلدان باستاپ ۇلعايتۋدى تاپسىردىم. ەلوردادا 7 لوگيستيكالىق كەشەن بار، 4 كوتەرمە-تاراتۋ ورتالىعىنىڭ قۇرىلىسى ءجۇرىپ جاتىر (ۇشەۋى - جەكە ينۆەستورلاردىڭ ەسەبىنەن)» دەپ تۇيىندەدى التاي كولگىنوۆ.
ايتا كەتەيىك، ينۆەستورلار سونىمەن بىرگە جىلىجاي، ازىق-تۇلىك بازارلارى، كوكونىس قويمالارى، ءسۇت زاۋىتى جانە باسقا نىسانداردى سالۋ جونىندەگى جەكە جوبالاردى قولداپ وتىر.
بۇل شارالار دا ازىق-تۇلىك قاۋىپسىزدىگىن نىعايتا ءتۇسىپ، نارىقتى جەرگىلىكتى تاۋارلارمەن تولتىرۋعا مۇرىندىق بولادى.
