وتاندىق كينو وندىرىسىنە «اباي» مەن «ءال- فارابي» تەلەحيكايالارى تىڭ سەرپىن بەردى – اشىمبايەۆ
بۇل تۋرالى ق ر پارلامەنتى سەناتىنىڭ ءتوراعاسى ماۋلەن اشىمبايەۆ Facebook-تەگى پاراقشاسىندا جازدى، دەپ حابارلايدى قازاقپارات.
«بيىل ەلىمىز ۇلى دالانىڭ ۇلىق تۇلعالارى ءال- فارابي مەن ابايدىڭ مەرەيتويلارىن اتاپ ءوتتى. مەملەكەت باسشىسى ايتقانداي، بۇل توي تويلاۋ ءۇشىن ەمەس، وي ويلاۋ ءۇشىن قولعا الىنعان دۇنيە ەكەنى بەلگىلى. وسى ءبىر اتاۋلى جىلدى «قازاقستان» ۇلتتىق تەلەارناسى تاماشا تۇيىندەدى دەسەك، ارتىق بولا قويماس. بارشاڭىزعا بەلگىلى، مەرەكە كۇندەرى ەلىمىزدىڭ باستى ارناسىنان «اباي» جانە «ءال- فارابي» اتتى جاڭا تەلەحيكايالار قالىڭ كورەرمەنگە جول تارتتى. تاۋەلسىزدىك كۇنىنە تارتۋ رەتىندە ۇسىنىلعان بۇل تۋىندىلار وتاندىق كينو وندىرىسىنە تىڭ سەرپىن بەردى دەۋگە تولىق نەگىز بار. ويتكەنى، ەكى تەلەحيكايانىڭ دا ساپاسى، اكتەرلەر قۇرامىنىڭ شەبەرلىگى جوعارى دەڭگەيدە. شىن مانىندە، وسىنداي كوركەم تۋىندىلاردى كوپتەن كۇتكەن ەدىك. سول سەبەپتى، ەرەكشە ىقىلاسپەن قارادىق. اسىرەسە، «ابايدا» ويشىلدىڭ ەستەلىكتەرى ارقىلى سول كەزدەگى قازاقتىڭ قيلى تاعدىرىنا ەرەكشە ەكپىن بەرىلگەنى كوڭىلگە قونىمدى بولدى. وسى جەردە بارشامىزعا اباي بەينەسىمەن تانىلىپ كەتكەن اكتەر بولات ءابدىلمانوۆتىڭ تالانتىن ايرىقشا اتاپ وتكەن ءجون»، - دەيدى سەنات ءتوراعاسى.
سونداي- اق ول سوزىندە «ءال- فارابي» سەريالى ءابۋ ناسىردىڭ بالا كۇنىنەن الەمگە اتى ءماشھۇر عۇلاما بولعانعا دەيىنگى ءومىرىن سۋرەتتەيتىنىن ايتادى. ۇلى ۇستازدىڭ عيبراتتى عۇمىرى، ءبىلىم جولىنداعى قاجىر- قايراتى اسەرلى كورسەتىلگەن. بۇل تاريحي تۋىندىنى ناعىز تاباندىلىقتىڭ، عىلىمعا، ونەرگە دەگەن قۇشتارلىقتىڭ، وتانعا، تۋعان جەرگە دەگەن ماحابباتتىڭ وزىق ۇلگىسى دەۋگە ابدەن بولادى.
«جالپى، كينو ونەرى - ادامنىڭ كوزقاراسىنا، جان- دۇنيەسىنە، مورالدىق قۇندىلىقتارىنا ەرەكشە ىقپال ەتەتىنى بەلگىلى. سونىڭ ىشىندە، وسكەلەڭ ۇرپاق ءۇشىن ماڭىزى زور. سوندىقتان وسىنداي تاعىلىمى مول دۇنيەلەردى زور قۋانىشپەن قابىلداپ وتىرمىز. ونىڭ ۇستىنە، دالانىڭ دارا دانىشپاندارى ءال- فارابي مەن اباي تۇلعاسى - ومىرلىك ونەگە مەكتەبى ەكەنى ءسوزسىز. ولاردى تانۋ ارقىلى ءبىز ۇلت رەتىندە ءوزىمىزدى تاني تۇسەمىز. ءال- فارابي مەن ابايدىڭ وسيەتتەرى ارقىلى قوعامدا ءبىلىم كۋلتىن بەرىك ورنىقتىرا الامىز. ال، بۇل قازىرگى زاماننىڭ ەڭ باستى تالابى ەكەنى بارشامىزعا ءمالىم. سول ءۇشىن Qazaqstan ۇلتتىق تەلەارناسى- نىڭ ۇجىمىنا العىسىمىزدى بىلدىرە وتىرىپ، ۇلتتىق مۇددەنى ورگە جەتەلەيتىن وسىنداي تىڭ باستامالار مەن جارقىن جوبالار كوپ بولسىن دەپ تىلەيمىز»، - دە جازدى ماۋلەن اشىمبايەۆ.
