يتاليا چەمپيوناتى تاريحىنداعى ەڭ جىلدام گول سوعىلدى

ول 13-تۋرداعى ويىندا «ساسسۋولو» كومانداسى قاقپاسىنا 6,2 سەكۋندتا گول سوقتى.

بۇل رەكورد 2001 -جىلدان بەرى جاڭارماعان ەدى. سول كەزدە «پياچەنتسا» كومانداسىنىڭ شابۋىلشىسى پاولو پودجي «فيورەنتينا» قاقپاسىنا 8,9 سەكۋندتا گول سوققان بولاتىن.

رافاەل لەاۋ ەڭ جىلدام گول سوققان ويىندا «ميلان» «ساسسۋولونى» 2:1 ەسەبىمەن ۇتتى. قازىرگى تاڭدا بۇل كلۋب 31 ۇپايمەن تۋرنير كەستەسىندە 1-ورىندا كەلەدى.

فۋتبولدان قازاقستان پرەمەر- ليگاسىنداعى ەڭ جىلدام گول رەكوردى شابۋىلشى جاسۇلان مولداقارايەۆ ەنشىسىندە. ول 2017 -جىلى «توبىلدا» ويناپ جۇرگەندە «وقجەتپەس» كومانداسى قاقپاسىنا 10 سەكۋند ىشىندە گول سوققان ەدى.

ال قازىرگى تاڭدا الەمدەگى ەڭ جىلدام سوعىلعان گولدار سانى بىرنەشەۋ. ولاردىڭ بارلىعى دا تورەشى ىسقىرىعى شالىنىسىمەن، الاڭ ورتاسىنان باعىتتالىپ، ناتيجەلى اياقتالعان. ءبىراق، ونىڭ بىرەۋى عانا گيننەس رەكوردتار كىتابىنا ەنگەن. ول گولدى ارگەنتينالىق فۋتبولشى ريكاردو وليۆەيرا سوققان. ونىڭ ەسىمى جازىلعان رەكورد 1998 -جىلى تىركەلگەن. ارگەنتينانىڭ «سوريانو» كومانداسىنىڭ ويىنشىسى جەرگىلىكتى «ريو- نەگرو» قاقپاسىنا 2,8 سەكۋندتا گول سوققان. ازىرگە دەيىن بۇل رەكوردقا تۇزەتۋ ەنگىزىلگەن جوق.

2009 -جىلى ساۋد ارابياسىندا فۋتبول تاريحىنداعى ەڭ جىلدام گول سوعىلدى. ناۆاف ال ابەد ەسىمدى شابۋىلشى ويىن باستالعانىنا 2 سەكۋند وتپەستەن تابلوداعى ەسەپكە وزگەرتۋ ەنگىزگەن. ءبىراق، بۇل ناتيجە دە رەكورد رەتىندە ەسەپكە الىنبادى. سەبەبى، الاڭعا شىققان بارلىق ويىنشىلاردىڭ جاسى 23 تەن اسپاعان ەكەن. ناتيجەسىندە ناۆاف ال ابەدتىڭ گولى بەيرەسمي تۇردە، الەمدەگى ەڭ جىلدام سوعىلعان گول رەتىندە ەل ەسىندە قالدى.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى