برەندتى ارزان تەلەفون: ەلوردالىق بويجەتكەندەر ينتەرنەت-الاياققا الداندى

سىيلىقتارعا سۇرانىستىڭ ارتقانىن بايقاعان الاياقتار دا الداپ- ارباۋدىڭ جاڭا تۇرلەرىن ويلاپ تابۋدا، دەپ حابارلايدى قازاقپارات ءتىلشىسى.

ماسەلەن، ەلوردا پوليتسياسىنا قالا تۇرعىندارىنان بىرنەشە شاعىم ءتۇسىپ ۇلگەرگەن. قىز- كەلىنشەكتەر الەۋمەتتىك جەلى ارقىلى برەندتى ۇيالى تەلەفونداردىڭ سوڭعى ۇلگىلەرىنە تاپسىرىس بەرىپ، جەتكىزۋ قىزمەتى ءۇشىن دە اقى تولەگەن.

«جاڭاجىلدىق جەڭىلدىكتەر كورسەتىلگەن كوزتارتارلىق اككاۋنت ەلوردالىق بويجەتكەندەردىڭ نازارىن وزىنە اۋدارعان. الاياقتىڭ ەلەكتروندى ءاميانىنا الدىن الا تولەم جاساعان ولاردىڭ بارلىعى دا تاۋاردىڭ بار- جوعىنا كوز جەتكىزبەگەن. ءاميانعا اقشا تۇسكەننەن كەيىن اككاۋنت بۇعاتتالىپ، ال ەلەكتروندى ءاميان يدەنتيفيكاتسيالانباي قالعان. وسىلايشا زارداپ شەگۋشىلەر اقشاسىز دا، سىيلىقسىز دا قالىپ وتىر»، - دەپ اتاپ وتەدى نۇر-سۇلتان قالالىق پوليتسيا دەپارتامەنتىنەن.

تەرگەۋ امالدارى بارىسىندا پوليتسيا قىزمەتكەرى الماتى قالاسىندا تۇراتىن رەسەي ازاماتشاسىن ۇستادى. ايەلدىڭ ۇيالى تەلەفوندار ساتۋمەن اينالىسۋعا نيەتى دە بولماعان. ال اككاۋنتتى الداۋ ماقساتىندا اشقان. زارداپ شەگۋشىلەردەن تۇسكەن اقشانى قاجەتىنە جاراتىپ ۇلگەرگەن. قازىرگى ۋاقىتتا زارداپ شەگۋشىلەردىڭ ناقتى سانى انىقتالۋدا. كۇدىكتىگە قاتىستى سوتقا دەيىنگى تەرگەۋ امالدارى قولعا الىنعان. جالپى ماتەريالدىق شىعىن 600 مىڭ تەڭگە مولشەرىندە باعالانىپ وتىر. وسىعان وراي نۇر-سۇلتان قالالىق پوليتسيا دەپارتامەنتى ازاماتتارعا مىناداي قاراپايىم ساقتىق شارالارىن ۇستانۋعا كەڭەس بەرەدى:

- ۆيدەوبايلانىس ارقىلى تاۋاردىڭ بار ەكەندىگىنە كوز جەتكىزۋ قاجەت؛

- تولەمدى تاۋاردى قولعا الىپ، ونى تەكسەرگەننەن كەيىن عانا اۋدارۋ كەرەك. ينتەرنەت- ساۋداداعى الاياقتىقتىڭ بەلگىلەرى:

- ساتۋشىنىڭ تەلەفونى مەن مەكەنجايى كورسەتىلمەيدى؛

- ساتۋشىمەن بايلانىستى تەك جازبا ارقىلى جۇرگىزۋگە ۇسىنادى؛

- تاۋار باعاسى وزگە ساتۋشىلار ۇسىنعان ءدال سونداي زاتتىڭ باعاسىمەن سالىستىرعاندا تىم تومەن بولادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى