الماتىلىق دارىگەر پاندەميا كەزىندەگى قيىندىقتار تۋرالى ايتتى
ەلىمىزدىڭ ءبىرقاتار ايماقتارىندا جاڭا ينفەكسيالىق كلينيكالار اشىلدى، مەديتسينالىق جابدىقتار ساتىپ الىندى. مەديتسينا ماماندارى حالىق اراسىندا ءتۇسىندىرۋ جۇمىستارىن جۇرگىزدى. پاندەميا كەزىندە قيىندىقتار دا بولدى.
بۇل تۋرالى قازاقپارات تىلشىسىنە الماتى قالالىق بالالار جۇقپالى اۋرۋلارى اۋرۋحاناسىنىڭ ينفەكسيونيست دارىگەرى رۋسلان يميندجانوۆ ايتىپ بەردى.
دارىگەردىڭ ايتۋىنشا، كوروناۆيرۋس ينفەكسياسىنىڭ بەلگىلەرى سپەتسيفيكالىق ەمەس.
«كوروناۆيرۋس ول دا تىنىس الۋ جولدارىنىڭ اۋرۋىنا جاتادى. ونى ج ر ۆ ي نەمەسە تۇماۋدىڭ بەلگىلەرىنەن اجىراتۋ قيىن. جوتەل، تاماق اۋرۋى، السىزدىك، دەنە قىزۋىنىڭ كوتەرىلۋى دە وسى اۋرۋعا ءتان. ءبىراق، مىنانى ەستەن شىعارماعان ابزال، سۋىق تيگەندە دەمىكپە بولمايدى. ال كوروناۆيرۋس دەرتىن جۇقتىرعان ناۋقاستاردىڭ بۋىن-بۋىنى سىرقىراپ، ءدام سەزبەيدى جانە ءيىس سەزۋ قابىلەتىنەن ايىرىلادى. كەيبىرەۋىنىڭ وكپەسى قابىنادى. سونىمەن قاتار، تۇماۋ قىسقا ينكۋباتسيالىق كەزەڭمەن سيپاتتالادى، بىرنەشە ساعاتتان 3 كۇنگە دەيىن، COVID-19-دىڭ ينكۋباتسيالىق كەزەڭى 14 كۇنگە دەيىن سوزىلادى. ەڭ باستىسى، دەنە قىزۋىنا نازار اۋدارۋ قاجەت. ءبىزدىڭ اۋرۋحانادا كلينيكالىق كورىنىستەرگە قاراماستان اۋرۋحاناعا جاتقىزىلعان ءار ناۋقاس ءجىتى تەكسەرۋدەن وتەدى. سونىمەن قاتار، دارىگەر كوروناۆيرۋس پەن تۇماۋدى كىمدەر تەز جۇقتىرۋى مۇمكىن ەكەنىن ايتتى.
«اتالعان ينفەكسيانى كوبىنە ۇزاق ۋاقىت تىنىس جولدارىنىڭ سوزىلمالى اۋرۋىمەن اۋىرعاندار، بالالار، جۇكتى ايەلدەر يممۋنيتەتى تومەن ادامدار جۇقتىرى مۇمكىن. كوروناۆيرۋستان جازىلعان ادامداردا انتيدەنەلەر قالىپتاسىپ، يممۋنيتەتى جاقسارادى دەگەن عالىمداردىڭ پىكىرى ەكىگە ءبولىندى. قايتا جۇقتىرۋ جاعدايلارى تۋرالى اقپاراتتار دا تاراپ جاتىر. مەنىڭ ويىمشا مۇنداي جاعداي كەزدەسەدى، ءبىراق وتە سيرەك. - قازاقستاندا كوروناۆيرۋستىڭ العاشقى جاعدايلارى تىركەلە باستاعاننان بەرى ءبىزدىڭ دارىگەرلەرگە ۇلكەن جۇك ارتىلدى»، - دەدى سپيكەر.
ونىڭ ايتۋىنشا، كوكتەم جانە جاز ايلارىندا دارىگەرلەر ناۋقاستاردى امان الىپ قالۋ ءۇشىن بارىن سالدى.
«دارىگەرلەردىڭ باسىنان كەشىرگەن قيىندىقتارى تۋرالى ايتار بولسام، بىرىنشىدەن، ولار وتباسىنان، بالالارىنان، تۋىستارىنان الشاق بولۋعا ءماجبۇر بولدى. ەكىنشىدەن، ىستىق كۇنى ارنايى كيىم كيىپ جۇمىس ىستەۋ بولدى. ارينە، دارىگەرلەرگە بارىنشا جاعداي دا جاسالدى. جاتىن ورىن مەن تاماقپەن قامتاماسىز ەتىلدى. ول ءۇشىن اكىمدىككە، اۋرۋحانامىزدىڭ باسشىلىعىنا جانە قايىرىمدىلىق ۇيىمدارىنا العىس ايتامىز. بۇگىنگى كۇنى بىزدە COVID-19 ەمدەۋ تاجىريبەسى بار، ءبىز پەدياتر بولعانىمىزعا قاراماستان، ەرەسەكتەردى دە، بالالاردى دا قابىلدادىق. ستۋدەنتتىك كەزدەن باستاپ پەدياترلار بالالار مەن ەرەسەكتەرگە قاتىستى تەراپيا جانە باسقا دا بايلانىستى ماماندىقتار بويىنشا نەگىزگى پاندەردەن وتەدى، سوندىقتان ءبىزدىڭ دارىگەرلەر ەرەسەك ناۋقاستاردى قابىلداۋعا تەز بەيىمدەلدى. اۋىر حالدە تۇسكەن پاتسيەنتتەردى امان الىپ قالۋ ءۇشىن ايانعان جوق»، - دەيدى رۋسلان يميندجانوۆ.
سپيكەر كوروناۆيرۋس ينفەكسياسىن جۇقتىرۋ ءقاۋپىن قالاي بولدىرماۋعا نەمەسە ازايتۋعا بولاتىنىن تىلگە تيەك ەتتى.
«كۇز بەن قىس مەزگىلىندە بالالار ماۋسىمدىق رەسپيراتورلىق ينفەكسيالارعا بەيىم بولادى. سوندىقتان الەۋمەتتىك اراقاشىقتىقتى جانە گيگيەنالىق شارالاردى ساقتاۋ قاجەت. بۇل - بالالار اراسىندا ىندەتتىڭ تارالۋىنا جول بەرمەيدى. ەڭ ماڭىزدى ۇسىنىس - بالالاردى ۇلكەن دۇكەندەرگە اپارماۋ، جابىق كەڭىستىكتە ادامداردىڭ كوپ جينالۋىن بولدىرماۋ، بۇل رەسپيراتورلىق ۆيرۋستىق ينفەكسيالارمەن جۇقتىرۋ قاۋپىن ەداۋىر ارتتىرادى. دالادا تازا اۋادا جۇرگەن جاقسى. ءۇي-جايلاردى جەلدەتۋ، دىمقىل تازالاۋ، دۇرىس تاماقتانۋ قاجەت»، - دەپ قورتىندىلادى دارىگەر.
اۆتور: الما مۇقانوۆا
