جەر ۇيدە پەش جاققان كەزدە ورتتەن قالاي ساقتانۋ كەرەك - مامان كەڭەسى
ش ق و توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، قىس كەزىندە جەر ۇيلەردە ءورت شىعۋدىڭ نەگىزگى سەبەپتەرىنىڭ ءبىرى - جىلىتۋ پەشتەرى بولىپ وتىر. وسى جىلدىڭ 11 ايىنداعى كورسەتكىش بويىنشا وڭىردە پەشتى پايدالانۋ كەزىندە قاۋىپسىزدىك تالاپتارىنىڭ ساقتالماۋىنان 284 ءورت تىركەلدى، بۇل جالپى ءورت سانىنىڭ %15 ىن قۇرايدى.
«دەمالىس كۇندەرى ءۇي يەلەرى مونشا جاققاندا دا ءجيى ءورت شىعىپ جاتادى. وسى رەتتە تۇرعىنداردى اسا ساق بولۋعا شاقىرىپ، جىلىتۋ پەشتەرىنىڭ تالاپقا ساي بولۋى قاجەتتىگىن ەسكەرتەمىز» دەپ حابارلادى ۆەدومستۆو وكىلدەرى.
مامانداردىڭ ايتۋىنشا، پەش قۇبىرى مەن مۇرجاسىنىڭ تىم جوعارى تەمپەراتۋرادا بولۋىنان وت تۇتانۋى قاۋپى بار. بۇدان بولەك، تۇتىندىكتەگى جارىقتان گاز بەن ۇشقىننىڭ جانعىش ماتەريالدارعا تارالۋىنان جالىن شىعۋى ىقتيمال.
«ءورتتىڭ جانە ءيىس ءتيۋدىڭ الدىن الۋ ءۇشىن ءبىرقاتار ساقتىق شارالارىن قاپەرىڭىزدە ۇستاڭىز. پەش پەن مۇرجا سىلانعان، اقتالعان بولۋى قاجەت. جىلىتۋ ماۋسىمى كەزىندە مۇرجانى ەكى ايدا كەمىندە ءبىر رەت تازالاۋ كەرەك. پەشتىڭ ماڭايىنا، ۇستىنە كيىم جايىپ، اياق كيىم كەپتىرۋگە، جيھازدى پەشكە جاقىن قويۋعا تىيىم سالىنادى. سونىمەن قاتار پەش جاققان كەزدە وتتى تەز تۇتاتاتىن سۇيىقتى پايدالانۋعا، جانىپ جاتقان پەشتى قاراۋسىز قالدىرۋعا بولمايدى. پەشتى ۇنەمى تەكسەرىپ، ساڭىلاۋى بولسا بىتەپ تاستاعان ابزال» دەيدى ماماندار.
