ەرجانات بايقاباي ۇلى حالىقارالىق ءمۇشايرادا باس جۇلدەنى قانجىعالادى

اتالعان شارانى اقيىق اقىن جاركەن بودەش ۇلىنىڭ شىنايى شىعارماشىلىعىن ناسيحاتتاۋ جانە ونەرگە قۇشتار ورەسى بيىك جاستارعا قولداۋ كورسەتۋ ماقساتىندا ۇلت رۋحانياتىنا جاناشىر كاسىپكەرلەردىڭ قولداۋىمەن، دۇنيەءجۇزى قازاقتارىنىڭ قاۋىمداستىعى جانە «وتانداستار قورى» ك ە ا ق، «Alash-CUP» قايىرىمدىلىق قورى بىرلەسە ۇيىمداستىردى.

اتالعان جىر دوداسىنا نۇر- سۇلتان، الماتى، شىمكەنت قالالارىمەن قاتار ەلىمىزدىڭ بارلىق وبلىستارىنان جانە الىس- جاقىن شەت ەلدەردەگى قانداستارىمىزدىڭ اراسىنان «ولەڭگە تالاسى بار» 40 جاسقا دەيىنگى قىرىققا جۋىق جاس اقىندار قاتىستى.

ولەڭ ولكەسىنە وزىندىك ورنەگىمەن كەلگەن ونەرلى جاستاردىڭ ءتول تۋىندىلارىن ساراپتاپ- سارالاۋعا، ادىلەتتى باعالاۋعا ەلىمىزدىڭ كورنەكتى اقىندارى رەسپۋبليكالىق «ءتورتىنشى بيلىك» باسىلىمىنىڭ باس رەداكتورى تولەمىرزا بالتابايەۆ ، ءال- فارابي اتىنداعى قازاق ۇلتتىق ۋنيۆەرسيتەتىنىڭ وقىتۋشىسى مۇرات شايماران ۇلى، قازاقستان جازۋشىلار وداعى ءتوراعاسىنىڭ ءبىرىنشى ورىنباسارى اقبەرەن ەلگەزەك، قازاقستان جازۋشىلار وداعى نۇر- سۇلتان قالالىق فيليالىنىڭ ءتوراعاسى داۋلەتكەرەي كاپ ۇلى، رەسپۋبليكالىق «انا ءتىلى» گازەتىنىڭ باس رەداكتورى جاناربەك ءاشىمجان جانە دۇنيەءجۇزى قازاقتارى قاۋىمداستىعى مەن «وتانداستار قورىنىڭ» وكىلى سەرىك ءابدۋالى سىندى تانىمال تۇلعالار قاتىسىپ، قازىلىق جاسادى.

قازىلار القاسىنىڭ شەشىمىمەن باس جۇلدە قىتايداعى قانداستار اراسىنان جاسىنداي جارقىراپ شىققان بەلگىلى ايتىسكەر اقىن ەرجانات بايقاباي ۇلىنا بەرىلدى. ءبىرىنشى ورىن تالانتتى جاس اقىن ادىلەت احمەت ۇلىنا (الماتى)، ەكىنشى ورىندى تولەگەن مەللات ۇلى (الماتى) مەن «قازاقپارات» حالىقارالىق اقپارات اگەنتىگىنىڭ شىعارۋشى رەداكتورى ريزابەك نۇسىپبەك ۇلى ( نۇر- سۇلتان) ەنشىلەدى. ال، ءۇشىنشى ورىندى ورازاي جەڭىس ۇلى (موڭعوليا)، ناۋرىزباي جاربوسىن ۇلى (وزبەكستان)، كوكبورى مۇباراك (ق ح ر) ەسىمدى اقىندار قانجىعاسىنا بايلادى.

سونداي- اق، جىر دوداسىندا الامانعا اتويلاپ ات قوسقان مارلەن عيلىمحان (ب ق و، ورال قالاسى)، مۇقاعالي مۇحانبەتقالي ۇلى سەيىتقازى (قاراعاندى)، ءدىلدا ۋاليبەكوۆا (نۇر- سۇلتان)، دۇيسەنالى ءالىماقىن (الماتى)، ۇمىتبەك باعدات ۇلى (تۇركىستان)، قۇندىز تاسقىنبەك (ش ق و) قاتارلى تالابى تاۋداي اقىندارعا ارنايى جۇلدە تاعايىندالدى. جەڭىمپازداردىڭ بارلىعىنا ۇيىمداستىرۋشىلار تاراپىنان قۇرمەت گروماتاسىمەن قوسا اقشالاي جۇلدە تابىستالادى.

ءمۇشايرادا وزا شاۋىپ، ولجا سالعان جەڭىمپازداردى الداعى ۋاقىتتا اقىن جاركەن بودەش ۇلىنىڭ قاتىسۋىمەن وتەتىن «ساركوبەلەك ساعىنىش» اتتى قورىتىندى شىعارماشىلىق كەشتە سالتاناتتى تۇردە ارنايى ماراپاتتاۋ جوسپارلانىپ وتىر.

اۆتور: باقىتجول كاكەش

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى