تۇركىستاندا ءشامشى قالداياقوۆقا ەسكەرتكىش ورناتىلدى
ەسكەرتكىش «اقجايىق» مۋزىكا مەكتەبىنىڭ الدىندا ورىن تەپتى. كومپوزيتسيانىڭ اشىلۋ سالتاناتىنا وبلىس اكىمى ءومىرزاق شوكەيەۆ، ق ر پارلامەنتى سەناتىنىڭ دەپۋتاتى ءالىمجان قۇرتايەۆ، حالىقارالىق «الاش» ادەبي سىيلىعىنىڭ لاۋرەاتى كوپەن امىربەك، مۋزىكالىق پروديۋسەر قالدىبەك قۇرماناليەۆ، «ش. قالداياقوۆ» پويىزىمەن الماتىدان ارنايى كەلگەن قوناقتار، زيالى قاۋىم وكىلدەرى مەن جۋرناليستەر قاتىستى.
«تۇركىستان وبلىسى - قازاق دالاسىنا قانشاما دارىندى سىيلاعان كيەلى مەكەن. انىمەن كەڭ دالانى تەربەتىپ، «قازاق ۆالسىنىڭ كورولى» اتانعان، قازاقستان رەسپۋبليكاسى ءانۇرانىنىڭ اۆتورى ءشامشى قالداياقوۆتىڭ بيىل تۋعانىنا 90 جىل تولىپ وتىر. وتىراردا تۋىپ، ءان پاديشاھى اتانعان، قايتالانباس دارىن يەسىنىڭ ەسىمىن ۇلىقتاۋ - بىزگە ارتىلعان ابىرويلى مىندەت. تۇركىستان قالاسىنىڭ جاڭا ورتالىعىندا بوي كوتەرگەن كومپوزيتوردىڭ ەسكەرتكىشى - وبلىس جۇرتشىلىعىنا، قازاق ەلىنە مەرەكە قارساڭىندا تاماشا تارتۋ بولىپ وتىر»، - دەدى وبلىس اكىمى.
دەمەۋشىلەر ەسەبىنەن قارجىلاندىرىلعان ەسكەرتكىش قولادان قۇيىلعان. بيىكتىگى - 2,5 مەتر، ۇزىندىعى - 3,5 مەتر.
اۆتورى - قازاقستاننىڭ ەڭبەك سىڭىرگەن ونەر قايراتكەرى، كاسىبي شەبەر ءمۇسىنشى تىلەۋبەردى بيناشيەۆ. كومپوزيتسيادا قالداياقوۆتىڭ شىعارماشىلىق وي ۇستىندە وتىرعان ءساتى بەينەلەنگەن.
«سازگەر بەينەسىنىڭ جاس جەتكىنشەكتەردى ونەرگە، مادەنيەتكە باۋليتىن «اقجايىق» مۋزىكا مەكتەبىنىڭ اۋلاسىندا بوي كوتەرۋى - زاڭدىلىق. حالىقتىڭ سۋرەتكە تۇسۋىنە، جاقىنىراق كەلىپ كورۋىنە ىڭعايلى. قازاق رۋحانياتىنىڭ جاندانۋىنا ولشەۋسىز ۇلەس قوسىپ، بۇكىل قازاق جەرىن تەربەتكەن ءشامشى بەينەسى جاس ونەرپازداردى ىزگىلىككە باعىتتايتىن باعدارى بولارى ءسوزسىز. تۇركى جۇرتىنىڭ رۋحاني استاناسى - تۇركىستان قالاسىندا دارىندى تۇلعالاردىڭ ەسىمى ۇلىقتالۋى - قازاق رۋحانياتىنداعى ىلكىمدى ءىستىڭ ءبىرى»، - دەدى تۇركىستان وبلىسى اكىمىنىڭ باسپا ءسوز قىزمەتىنەن.
