اقمولا وبلىسىندا اكىم قازا بولعان جول اپاتىنا قاتىستى جاڭا مالىمەتتەر انىقتالدى
جاقسى اۋدانى اكىمدىگىنىڭ مالىمەتىنشە، تاراسوۆ سەلولىق وكرۋگىنىڭ اكىمى ميراسحان مۇراتوۆ قىزمەتتىك كولىكپەن اتباسار قالاسىنا جۇمىس بابىمەن بارعان.
«14- جەلتوقسان كۇنى ساعات 23.10 دا «الماتى-ەكاتەرينبور» اۆتوجولىنىڭ 978-شاقىرىمىندا اتباسار قالاسىنان قايتىپ كەلە جاتقان تاراسوۆ سەلولىق وكرۋگىنىڭ اكىمى ميراسحان بالعابەك ۇلى مۇراتوۆ قازا بولدى. ول اتباسار قالاسىنا ستەندتەرگە تاپسىرىس بەرۋ، قىزمەتتىك كولىگىنىڭ مايىن اۋىستىرىپ، تەحنيكالىق بايقاۋدان وتكىزۋ ءۇشىن باردى»، - دەدى اۋدان اكىمدىگىنەن.
ءمالىم ەتىلگەندەي، ميراسحان مۇراتوۆ 1969-جىلى 10- مامىردا تۋعان. 2019-جىلدىڭ قاراشا ايىنان باستاپ جاقسى اۋدانى تاراسوۆ سەلولىق وكرۋگىنىڭ اكىمى.
«قازىرگى كەزدە، وسى وقيعاعا بايلانىستى ءىس قوزعالىپ، تەرگەۋ شارالارى جۇرگىزىلۋدە»، - دەپ ناقتىلادى اكىمدىكتەن.
ەسكە سالايىق، 51 جاستاعى م. مۇراتوۆ جول-كولىك اپاتىنان كوز جۇمعانىن بۇعان دەيىن جازعان بولاتىنبىز. الدىن الا مالىمەت بويىنشا، «DAF» جۇك كولىگىنىڭ جۇرگىزۋشىسى رۋلگە يە بولا الماي قالىپ، جولدىڭ قارسى باعىتىنا شىعىپ كەتكەن. سولاي، سەلولىق وكرۋگ اكىمى تىزگىندەگەن «ۆاز-21214» كولىگىمەن سوقتىعىسقان. اكىم دەنە جاراقاتىنان وقيعا ورنىندا كوز جۇمدى.
