وتاندىق وندىرۋشىلەردى قولداۋدىڭ جاڭا شارالارى ازىرلەنىپ جاتىر
بۇل تۋرالى بۇگىن ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.
«ۋاكىلەتتى ورگاندار، «اتامەكەن» ۇلتتىق كاسىپكەرلەر پالاتاسى جانە جەر قويناۋىن پايدالانۋشىلار اراسىندا كاسىپكەرلىكتى ىنتالاندىرۋ تۋرالى ەنگىزىلەتىن ءۇشجاقتى كەلىسىمدەر ەرىكتى نەگىزدە ىسكە اسىرىلادى. كەلىسىمدە تاۋارلارداعى جەرگىلىكتى مازمۇن بويىنشا مىندەتتەمەلەر كورسەتىلەدى. جەر قويناۋىن پايدالانۋشىلار سونىڭ اياسىندا تاۋارلاردى ساتىپ الۋدىڭ رەتتەلەتىن ءتارتىبى نورمالارىن قولدانباي تاۋارلار ساتىپ الا الادى»، - دەدى بەيبىت اتامقۇلوۆ.
ونىڭ ايتۋىنشا، بۇل شارا تاۋارلاردى ساتىپ الۋ مەرزىمىن قىسقارتۋعا، سونداي- اق ءونىم بەرۋشىنى تاڭداۋ كەزىندە شەكتەۋلەردى الىپ تاستاۋعا مۇمكىندىك بەرەدى. اتالعان ۇسىنىستاردى ىسكە اسىرۋ ءۇشىن مەملەكەتتىك ساتىپ الۋ ماسەلەلەرى بويىنشا زاڭ جوباسى اياسىندا «جەر قويناۋى جانە جەر قويناۋىن پايدالانۋ تۋرالى» ق ر كودەكسىنە ءتيىستى تۇزەتۋلەر ەنگىزىلەدى.
«قابىلدانىپ جاتقان شارالار بولاشاقتا وتاندىق ءوندىرىستى ىنتالاندىرۋ ءۇشىن جەر قويناۋىن پايدالانۋشىلارمەن كەلىسىمدەر جاساۋعا مۇمكىندىك بەرەدى. سونداي- اق، قازىرگى ۋاقىتتا «ونەركاسىپتىك ساياسات تۋرالى» ق ر زاڭى جوباسى اياسىندا وتاندىق تاۋار وندىرۋشىلەردى قولداۋدىڭ جاڭا شارالارى ازىرلەنىپ جاتىر»، - دەدى مينيستر.
