قازاقستاندا كاسىپكەرلىكتى ىنتالاندىرۋعا ارنالعان ءۇشجاقتى كەلىسىمدەر جاساۋ تەتىگى ەنگىزىلەدى
بۇل تۋرالى بۇگىن ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.
«دۇنيەجۇزىلىك ساۋدا ۇيىمى الدىنداعى مىندەتتەمەلەردى ەسكەرە وتىرىپ، ىشكى نارىقتى ودان ءارى دامىتۋ ماقساتىندا وتاندىق ءوندىرىستى قولداۋدى جالعاستىرامىز. 2020 -جىلدىڭ سوڭىنا دەيىن مەملەكەتتىك ساتىپ الۋدا تاۋارلاردى، جۇمىستار مەن كورسەتىلەتىن قىزمەتتەردى ساتىپ الۋدىڭ ارنايى ءتارتىبى نورماسى قولدانىلادى. وعان 3400 گە جۋىق وتاندىق كاسىپورىن اككرەديتتەلگەن»، - دەدى مينيستر.
ونىڭ ايتۋىنشا، وسى جىلدىڭ 30-قاراشاسىندا يندۋستريا جانە ينفراقۇرىلىمدىق دامۋ، ەنەرگەتيكا مينيسترلىكتەرى مەن ءىرى مۇناي- گاز وپەراتورلارى اراسىندا مۇناي- گاز ماشيناسىن جاساۋدى دامىتۋدىڭ حالىقارالىق ورتالىعىن قۇرۋ نيەتى تۋرالى كەلىسىمگە قول قويىلدى
«ۇلتتىق رەجيمنەن الىپ تاستالاتىن اتاۋلار تىزبەسىن كەڭەيتۋ جۇمىستارى جاسالىپ جاتىر. 2021 -جىلى مەملەكەتتىك ورگاندار، «اتامەكەن» ۇلتتىق كاسىپكەرلەر پالاتاسى مەن جەر قويناۋىن پايدالانۋشىلاردىڭ قاتىسۋىمەن قازاقستان رەسپۋبليكاسىندا كاسىپكەرلىكتى ىنتالاندىرۋعا ارنالعان ءۇشجاقتى كەلىسىمدەر جاساۋ تەتىگى ەنگىزىلەدى»، - دەدى بەيبىت اتامقۇلوۆ.
