نۇر- سۇلتاندا جىل بويى جۇمىس ىستەيتىن مۇز ايدىنى سالىنادى
ەلوردا اكىمى التاي كولگىنوۆ Instagram-پاراقشاسىندا ءمالىم ەتكەندەي، وڭىرلىك ينۆەستيتسيالىق كەڭەستە جەكە ينۆەستورلاردىڭ قارجىسىنا سالىناتىن ءبىرقاتار جوبا قولداۋ تاپتى.
«وڭىرلىك ينۆەستيتسيالىق كەڭەستە جەكە ينۆەستورلاردىڭ ەسەبىنەن سالىناتىن ءبىرقاتار جوبا قولداۋ تاپتى. ماسەلەن، ۇستەل تەننيسى سپورت ورتالىعىنىڭ قۇرىلىسى. بۇدان بولەك، حوككەي مەن مانەرلەپ سىرعاناۋعا ارنالعان جابىق مۇز ايدىنى سالىنادى. بۇل تەك بۇقارالىق سپورت تۇرىنە جاعداي جاساپ قانا قويماي، سونىمەن قاتار قىسقى سپورت تۇرلەرى بويىنشا فەدەراتسيالارىمىزدى تەحنيكالىق بازامەن قولداۋعا مۇمكىندىك بەرەدى. سپورت فەدەراتسيالارىمەن كەزدەسۋ بارىسىندا سپورتشىلار نىساندار بويىنشا، سونىڭ ىشىندە مۇزدا سپورتپەن اينالىسۋ ءۇشىن ساعاتتاردىڭ جەتىسپەۋشىلىگى ماسەلەلەرىن كوتەرگەن بولاتىن. ات سپورتى كەشەنىندە يپپوتەراپيا ساباقتارى جوسپارلانعان. بۇل، بالالاردىڭ سال اۋرۋى دياگنوزى بار ادامداردى قاجەتتى ساباقتارمەن قامتۋعا مۇمكىندىك بەرەدى. جۇمىس ىستەپ تۇرعان يپپودروم بازاسىندا ەرەكشە قاجەتتىلىگى بار بالالاردى وڭالتۋعا ارنالعان ات سپورتى كەشەنىنىڭ قۇرىلىسىن جۇرگىزىپ جاتىرمىز. كەشەن جابىق مانەجدەن، مىنبەدەن، الاڭداردان تۇرادى. يپپودروم بازاسىن 3 باعىت بويىنشا دامىتامىز: يپپوتەراپيا، ۇلتتىق جانە كلاسسيكالىق سپورت تۇرلەرىن وتكىزۋ جانە دايىنداۋ. سونىمەن بىرگە تۋريستىك مارشرۋتتار- اتپەن سەرۋەندەۋ دامىتىلادى»، - دەيدى ا. كولگىنوۆ.
قالا باسشىسىنىڭ ايتۋىنشا، پرەزيدەنتتىڭ تاپسىرماسىنا سايكەس بۇقارالىق سپورت ءتۇرىن ناسيحاتتاۋ ءۇشىن ءبىرقاتار سپورت نىسانى اشىلادى.
«كاسىبي سپورت فەدەراتسيالارىن قولدايمىز، اۋلالار مەن قوعامدىق كەڭىستىكتەردى (ساياباقتار، سكۆەرلەر، بۋلۆارلار) سالىپ، اباتتاندىرامىز. ينۆەستيتسيالىق كەڭەستە ۇننان جاسالعان كونديتەرلىك ونىمدەر شىعاراتىن زاۋىتتىڭ، ءبىلىم بەرۋ نىساندارىنىڭ جانە ت. ب. قۇرىلىسىن قولدادىق. پاندەميا كەزىندە جەكە ينۆەستيتسيالاردى تارتۋ قارقىنى تومەندەگەن جوق، كەرىسىنشە ارتتى. قولداۋ تاپقان جوبالار باقىلاۋدا، ءاربىر ينۆەستورمەن جەكە جۇمىس ىستەيمىز»، - دەپ جازدى التاي كولگىنوۆ.
