«ەلباسى مەدالى» ، «ەل ماقتانىشى» جانە «مىڭ بالا» جوباسىنىڭ جەڭىمپازدارى ماراپاتتالدى
ماراپاتتاۋ ءراسىمى نۇرسۇلتان نازاربايەۆ قورى ۇيىمداستىرعان «تاۋەلسىزدىك جولىن جالعاستىرار ۇرپاق» اتتى جاستار فورۋمىندا ءوتتى. ەلباسى نۇرسۇلتان نازاربايەۆ فورۋم قاتىسۋشىلارى الدىندا سويلەگەن سوزىندە تاۋەلسىزدىكتىڭ العاشقى جىلدارىنان باستاپ مەملەكەتتىڭ باسەكەگە قابىلەتتى جاستاردى تاربيەلەۋگە باسا نازار اۋدارىپ كەلە جاتقانىن اتاپ ءوتتى.
«جاستار جىلى اياسىندا دارىندى بالالاردى قولداۋ ماقساتىندا مەن «ەل ءۇمىتى» باستاماسىن ۇسىندىم. سونىمەن قاتار، ءبىز «قامقورلىق» اتتى ماڭىزدى جوبانى ىسكە اسىرا باستادىق»، - دەدى ەلباسى.
نۇرسۇلتان نازاربايەۆ «ەل ءۇمىتى» جوباسى ەلدىڭ بەلسەندى جاستارىن زياتكەرلىك جانە شىعارماشىلىق دامۋ، ۇلتتىق مادەنيەت پەن ءداستۇردى ءتۇسىنۋ، مۇقتاج جاندارعا كومەك كورسەتۋ جولىندا بىرىكتىرگەنىن ايتتى.
فورۋم اياسىندا «ەلباسى مەدالى» جوباسىنىڭ قاتىسۋشىلارىنا قولا مەدالدار، حالىقارالىق وليمپيادا جۇلدەگەرلەرى مەن ولاردىڭ جاتتىقتىرۋشىلارىنا «ەل ماقتانىشى» سىيلىعى جانە اۋىل وقۋشىلارى اراسىندا وتكەن «مىڭ بالا» وليمپياداسىنىڭ جەڭىمپازدارىنا سىيلىقتار تابىستالدى.
«بۇگىن «ەل ءۇمىتى» جانە «قامقورلىق» باستامالارىنا ارنالعان «تاۋەلسىزدىك جولىن جالعاستىرار ۇرپاق» فورۋمى ءوتتى. «ەل ءۇمىتى» باستاماسى اياسىندا ءبىرقاتار اۋقىمدى جوبالار جۇزەگە اسىرىلۋدا.
ءبىرىنشى جوبا - اۋىل وقۋشىلارىنا ارنالعان «مىڭ بالا» وليمپياداسى. وسىلايشا قازاقستان تاريحىندا العاش رەت اۋىل وقۋشىلارى ءۇشىن جالپىۇلتتىق وليمپيادا ۇيىمداستىرىلدى. وعان بارلىق اۋىل مەكتەپتەرىنىڭ 5-6 سىنىپ وقۋشىلارى قاتىسا الادى. بيىل 300 مىڭعا جۋىق وقۋشى قامتىلىپ، ەكىنشى كەزەڭدەگى اقتىق سايىسقا 5 مىڭ ادام جىبەرىلدى. بۇگىن بارلىق وڭىرلەردە مىڭ جەڭىمپاز بالا ماراپاتتالادى. وسى وقۋ جىلىنان باستاپ 300 دەن استام جەڭىمپاز وڭىرلەردەگى دارىن، ءبىلىم يننوۆاتسيا ليتسەيى، رەسپۋبليكالىق فيزمات سىندى دارىندى بالالارعا ارنالعان مەكتەپتەردە وقي الادى. قازىر فيناليستەر مەن جەڭىمپازدار ەلباسى اكادەمياسى جانىنداعى «Birge Oq» ونلاين مەكتەبىندە پاندىك دايىندىقتان ءوتىپ جاتىر» ، - دەدى «ەلباسى اكادەمياسى» ك ق ديرەكتورىنىڭ ورىنباسارى ءانۋار جانعوزين تىلشىلەرگە بەرگەن سۇحباتىندا.
كەلەسى جوبا - «ەلباسى مەدالى» دەپ اتالادى. 14-29 جاس ارالىعىنداعى جاستارعا ارنالعان جوبا جاستاردى 7 نەگىزگى باعىت بويىنشا تاربيەلەۋگە باعىتتالعان. وندا 6-ايدان 1,5 جىلعا دەيىنگى قولا، كۇمىس، التىن سىندى قاتىسۋ دەڭگەيىن تاڭداي الاسىز.
«بۇگىن ءبىز العاش رەت جوباعا جارتى جىل قاتىسقاندارعا قولا مەدال تابىستادىق. كەلەسى جىلى مەداليستەر سانى كوبەيەدى. بۇگىنگە دەيىن 300 مەداليست بولسا، كەلەر جىلى 6 مىڭنان استام قولا، كۇمىس جانە التىن مەدال يەگەرلەرى بولادى دەپ كۇتىلۋدە. ال «ەل ماقتانىشى» جوباسى ماتەماتيكا، فيزيكا، حيميا، بيولوگيا، ينفورماتيكا، گەوگرافيا، لينگۆيستيكا پاندەرى بويىنشا جەتى نەگىزگى وليمپيادانىڭ جەڭىمپازدارىنا ارنالعان. وتكەن جىلى ەلباسى ماراپاتتى العاش رەت تابىستادى، بيىل دا ونى جالعاستىرامىز. اقشالاي ىنتالاندىرۋ تەك جەڭىمپازدار ءۇشىن عانا ەمەس، ولاردىڭ جاتتىقتىرۋشىلارى ءۇشىن دە قاراستىرىلعان. سىياقى مولشەرى 500 مىڭنان 2 ميلليون تەڭگەگە دەيىن جەتەدى. بيىل 11 جەڭىمپاز بەن 17 جاتتىقتىرۋشى ماراپاتتالدى»، - دەپ ءتۇسىندىردى ءا. جانعوزين.
«سالالىق مەنەدجەر» جوباسى ۇلكەن بۋىن مەن كاسىبي ماماندارعا ارنالعان. بۇل جوبادا 3 مىڭ ۇمىتكەردەن 230 مامان ىرىكتەلىپ الىندى، ولار 11 سالا بويىنشا باعدارلامالاردى جۇزەگە اسىرۋدا. ولارعا 37 تاپسىرما بەرىلدى جانە ولاردى توپتاسىپ ازىرلەدى.
«جوسپارلاردىڭ بارلىعى دەرلىك ۇكىمەتكە، پرەمەر- مينيسترگە تانىستىرىلدى. بۇل جوسپارلار تەك باعدارلامالار دەڭگەيىندە قالىپ قويماي، كەلەسى جىلى جۇزەگە اسۋى ءۇشىن سالالىق مينيسترلىكتەرمەن جۇمىس ءجۇرىپ جاتىر» ، - دەدى ءا. جانعوزين.
