ق. قۋانىشبايەۆ اتىنداعى قازاق مۋزىكالىق دراما تەاترى جاڭا ماۋسىمىن اشادى
ماۋسىماشار ق ر مادەنيەت جانە سپورت ءمينيسترى اقتوتى رايىمقۇلوۆا، نۇر-سۇلتان قالاسىنىڭ اكىمى التاي كولگىنوۆتىڭ قاتىسۋىمەن وتەدى، دەپ حابارلايدى ونەر ورداسىنىڭ باسپا ءسوز قىزمەتى.
وتىز جىلدىق تاريحى بار ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى جاڭا عيماراتقا كوشتى. جاڭا عيمارات ەلباسى ن. ءا. نازاربايەۆتىڭ تاپسىرماسىمەن سالىندى. قاراشا ايىنىڭ 26-كۇنى نۇرسۇلتان ءابىش ۇلى تەاتر عيماراتىنا كەلىپ، شىعارماشىلىق ۇجىممەن كەزدەستى.
جاڭا ورداداعى تەاتر ماۋسىمى قالىپتاسقان ءداستۇر بويىنشا م. اۋەزوۆتىڭ «اباي» قويىلىمىمەن اشىلادى. قويۋشى رەجيسسەرى - قازاقستاننىڭ ەڭبەك سىڭىرگەن قايراتكەرى ءا. ورازبەكوۆ. سوڭعى جىلدارى الەمدە ورىن العان جاعدايلارعا بايلانىستى ادامزات بالاسى مەيىرىمدىلىك، قايىرىمدىلىق سىندى ارەكەتتەرگە ۇلكەن ءمان بەرۋدە.
ەلىمىزدە دە قايىرىمدىلىق سالاسىنا ءجىتى كوڭىل ءبولىنىپ كەلەدى. حالقىمىز مۇقتاج ادامعا كومەك كورسەتىپ، قايىرىمدىلىق جاساۋدى، كىرىپتارعا قايىر بەرىپ، قارتتاردى ايالاۋدى، مۇقتاج جانداردى قولداپ- قورعاۋدى ءاربىر ادامنىڭ ادامگەرشىلىك بورىشى دەپ ەسەپتەيدى. سوندىقتان قازىرگى تاڭدا مەملەكەت تاراپىنان دا قايىرىمدىلىقتى قولداۋعا كوپ كوڭىل ءبولىنىپ وتىر.
قازاق تەاتر ۇجىمى دا العاشقى اشىلۋىن وسى باعىتتا جاريالاعاندى ءجون سانادى. ەلوردا تورىندە اراعا 29 جىل سالىپ بوي كوتەرگەن جاڭا قازاق دراما تەاترى عيماراتتىڭ سالتاناتتى اشىلۋى مەن مەرەيلى XXX ماۋسىمىن قايىرىمدىلىق شاراسىمەن باستاۋدى ماقسات ەتىپ وتىر. 14-15-16-جەلتوقسان كۇندەرى، ساعات:19.00-دە اباي قۇنانباي ۇلىنىڭ 175 جىلدىق مەرەيتويى اياسىندا «اباي» تراگەدياسىنىڭ جاڭاشا نۇسقاسىن ۇسىنادى.
