ءۇندىستاندا ارالاردىڭ كەسىرىنەن اۋە رەيستەرى كەشىكتى
ءتىپتى تاياۋدا ارالاردىڭ كەسىرىنەن كالكۋتتا اۋەجايىندا ەكى رەيس ۋاقىتىلى ۇشا الماي قالدى. بۇل ونسىز دا پروبلەمادان كوز اشا الماي وتىرعان ەلدىڭ دەنساۋلىق ساقتاۋ جۇيەسى مەن ەكولوگياسى ءۇشىن جىعىلعانعا جۇدىرىق بولدى.
جاقىندا كالكۋتتا اۋەجايى ارالاردان كوز اشپاي كەتتى. قۇجىناعان جاندىك جولاۋشىلار لاينەرىن قورشاپ الىپ، ۇشۋىنا كەدەرگى كەلتىرگەن. اۋە ايلاعىنىڭ قىزمەتكەرلەرى ولاردى قۋۋ ءۇشىن ءورت ءسوندىرۋ كولىگىن قولدانعان. الايدا بىرنەشە كۇننەن كەيىن ارالار ودان دا ۇلكەن ۇشاقتى باسىپ الدى. ءورت سوندىرۋشىلەر شاقىرتىلىپ، ولار جاندىكتەرمەن بىرنەشە ساعات ارپالىسقان. سالدارىنان اۋە كەمەسى جوسپارلانعان ۋاقىتتان كەش ۇشتى.
ۋديت ماني، نيۋ- دەلي زوولوگيا ينستيتۋتىنىڭ اعا وقىتۋشىسى:
- ارالار وزدەرىنە ۇيا سالاتىن ورىن ىزدەگەن بولۋى مۇمكىن. ولار قولايلى جەردى باسىپ الىپ، باسەكەلەستەرىن قۋا باستايدى. بۇل جاعدايدا باسەكەلەستەرى - ادامدار بولىپ وتىر. نەگىزى ارالاردىڭ شابۋىلى كوروناۆيرۋسپەن دە بايلانىستى بولۋى مۇمكىن. ويتكەنى كارانتين كەسىرىنەن ولاردىڭ پوپۋلياتسياسى باقىلانباي، سانى كۇرت ارتىپ كەتۋى دە عاجاپ ەمەس.
ەكولوگتار مۇنداي جاعدايدىڭ تاعى مۇمكىن سەبەبىن اتاپ وتىر. ماسەلەن، قوقىس پەن قالانىڭ لاس اۋاسى كەسىرىنەن ارالار قاپتاپ كەتۋى مۇمكىن.
سۋدانشۋ رادجمۋل، ەكولوگ:
- نيۋ- دەليدە ارالار ۇيلەردىڭ ءبىرىنىڭ شاتىرىنىڭ استىندا ۇيا سالعان. يەسى باسپاناسىنىڭ توبەسىن اشقان كەزدە عانا نە بولعانىن تۇسىنگەن. بۇعان ۇقساس وقيعالار وتە كوپ. جاندىكتەر شاعىپ، تۇرعىنداردىڭ اۋرۋحانا ءتۇسىپ جاتقان جۇزدەگەن دەرەگى جايلى بىلەمىز. ويتكەنى جابايى ارالار بىردەن ۇيىرىمەن شابۋىلدايدى.
نەگىزى جاقىندا عانا ءۇندىستان حالقى شەگىرتكە شابۋىلىنىڭ زاردابىن تارتقان ەدى. جاندىكتەر جۇزدەگەن ەگىس القابىن وتاپ كەتكەن. ولار جاڭبىر باستالعاندا عانا جوعالىپ كەتكەن. ەندى تۇرعىندار ارالاردان قالاي قۇتىلارىن بىلمەي الەك. جاعدايدىڭ ۋشىققانى سونشالىق، كەيبىر قالادا بيلىك بالاباقشالار مەن باستاۋىش مەكتەپتەردى جابۋعا ءماجبۇر بولعان. ال ساراپشىلار «ەگەر جاندىكتەر ۇيگە كىرىپ كەتسە، ولاردىڭ كوزىن جويۋعا اسىقپاي، مامانداردى شاقىرتقان ءجون» دەپ وتىر.
www.24.kz
