جاپون ءادىسى: سپورتپەن اينالىسپاي- اق قالاي ۇزاق ءومىر سۇرۋگە بولادى؟
قازىر فيتنەس- زال مەن جاتتىعۋ زالدارى كوبەيدى. اينالامىز قاپتاعان سپورت- جارناما. يوگا، كروسسفيت، جاتتىعۋ زالى - ءبارى كاسىپكە اينالعان. ءبىراق سپورتتى كۋلت سانامايتىن ءبىر مەملەكەت بار: ول - جاپونيا.
جاپونيا - حالقى ۇزاق جاسايتىن، دامىعان ەلدەردىڭ اراسىندا سەمىرۋ يندەكسى (%4,3) از مەملەكەتتىڭ ءبىرى. ءبىراق ەلدە جاتتىعۋ زالدارى از، سپورتپەن اينالىسۋشى جاندار دا كوپ ەمەس.
جاقىندا جاريالانعان Rakuten Insight ۇيىمىنىڭ زەرتتەۋىندە 20 مەن 60 جاس اراسىنداعى 1000 جاپون ازاماتىنىڭ جارتىسىنا جۋىعى مۇلدەم سپورتپەن شۇعىلدانبايتىنىن ايتقان. جاپونداردىڭ كوبى سپورتتى ءومىر سالتى سانامايدى. جۇمىستان قولى بوسامايتىن جاپوندار سپورتقا بارۋعا دا ۋاقىت تاپپايدى.
سىرى نەدە؟
مۇنىڭ سىرى قاراپايىم. ەگەر جاپونداردىڭ ءومىر سالتىنا قاراساڭىز، كوپ جاياۋ جۇرەتىنىن بايقايسىز. ۇنەمى جاياۋ ءجۇرۋ جاتتىعۋ زالىنا بارىپ، اۋىر سالماق كوتەرۋمەن، 10 شاقىرىمعا جۇگىرۋمەن بىردەي.
جاپوندار جاياۋ ءجۇرۋدى جاقسى كورەتىن حالىق. جۇمىسقا، اس ءىشۋ مەن قوناققا دا جاياۋ بارادى. تاڭنان كەشكە كەيىن ءجۇرۋ جاپونداردىڭ قانىنا سىڭگەن قاسيەت.
قارت ادامدار كۇنىنە، كەم دەگەندە، 6500 قادام جۇرەدى. ال 20-50 جاستاعى جىگىتتەر مەن ەر ازاماتتار 8 مىڭ، ايەلدەر 7 مىڭ قادام باسادى.
ال وكينوۆ ارالىندا تۇراتىن جاپوندار جاياۋ ءجۇرۋ مادەنيەتىنە ءجىتى ءمان بەرەدى. سونىڭ ارقاسىندا بۇل ارالدىڭ تۇرعىندارى جاپونيادا ەڭ كوپ ءومىر سۇرەتىن قاۋىمعا اينالعان. ال ناگانو ارالىندا تۇرعىنداردىڭ جاياۋ ءجۇرۋى ءۇشىن ارنايى 100 دەن استام مارشرۋت سالىنعان. بۇل ارالدا جۇرەك- قان اۋرۋلارىنا شالدىعاتىن، ينسۋلت الاتىن ادامدار از.
جاپونيا قالالارىندا جاياۋ ءجۇرۋ ءۇشىن جاعداي جاسالعان: سوقپاق جول، ساياجول، ساياباق، جاياۋ جۇرگىنشىلەر جولى كوپ. قوعامدىق كولىك جەلىسى دامىعان.
جاياۋ ءجۇرۋ - جاپوندار ءۇشىن ءومىردىڭ سالتى، تىنىس الۋ مەن تاماق جەۋ سىندى قاجەتتىلىك، بويعا سىڭگەن ادەت.
ارينە، بۇدان سپورتپەن اينالىسپاي- اق قويۋ كەرەك دەگەن قورىتىندى شىقپاۋى كەرەك. ۇناعان سپورتپەن شۇعىلدانىپ، ۋاقىتىڭىزدى سوعان ارناۋى تولىق قاقىڭىز بار. ءبىراق جۇمىستان قولى بوسامايتىندار ءۇشىن جاياۋ ءجۇرۋ - ناعىز تايم- مەنەدجمەنت. سپورتقا كوڭىل بولمەدى دەگەننىڭ وزىندە كوبىرەك جاياۋ جۇرۋگە تىرىسقان ابزال.
massaget.kz
