كوروناۆيرۋستى قايتا جۇقتىرۋ مۇمكىن بە - مامان پىكىرى
پۋلمونولوگ كوروناۆيرۋستىڭ سۋىققا قالاي اسەر ەتەتىنىن ءتۇسىندىردى جانە COVID-19 كەلەسى تولقىنىنىڭ قالاي وتەتىنى تۋرالى پىكىرىن ءبىلدىردى.
«سۋىقتىڭ ءوزى كوروناۆيرۋس ينفەكسياسىنىڭ تارالۋىنا ەش اسەر ەتپەيدى. ءبىز رەسەي مەن ەۋروپادا كوروناۆيرۋستىڭ جازدا جانە قىستا بىردەي تەز تارالاتىنىن كورىپ وتىرمىز. كوروناۆيرۋستىڭ ەكىنشى تولقىنىنا كەلسەك، عالىمدار كوروناۆيرۋستىڭ تارالۋىنىڭ بىرنەشە نۇسقاسىن مودەلدەپ كوردى. ءبىرىنشىسى - جازىقتاعى توبەلەر، ياعني ازداپ كوتەرىلەدى، سوسىن جاعداي تۇراقتانادى، سودان كەيىن قايتادان كوتەرىلەدى. ەكىنشىسى - كىشكەنتاي وزگەرىستەر بولاتىن باياۋ شەڭبەر، ال ءۇشىنشى نۇسقا - ۇلكەن داۋىل، ياعني جاپپاي جۇقتىرۋ بولادى، كۇرت تومەندەيدى، سودان كەيىن اۋرۋدىڭ تومەن دەڭگەيى قالادى»، - دەدى ك. گاركالوۆ قازاقپارات تىلشىسىنە بەرگەن سۇحباتىندا.
ونىڭ ايتۋىنشا، قازاقستاندا كوروناۆيرۋستىڭ تارالۋىنىڭ ءۇشىنشى نۇسقاسى بايقالدى.
«ەندى شىلدە ايىنداعىداي جۇقتىرۋ سانى كوپ بولمايدى دەپ ويلايمىن. ارينە، كوروناۆيرۋس ينفەكسياسى ەشقايدا كەتپەدى، ءالى اۋىرماعان ادامدار بار. ءبىراق ماۋسىم-شىلدە ايلارىندا بولعان ەكىنشى تولقىن ەندى بولمايدى دەپ ويلايمىن. ءبىرىنشى تولقىننىڭ تاجىريبەسى بار جانە دەنساۋلىق ساقتاۋ جۇيەسى تىڭعىلىقتى دايىندالدى. ەكىنشىدەن، قازىر حالىق ۆيرۋستىڭ قاۋپىن بۇرىنعىدان دا جاقسى تۇسىنەدى جانە ساقتانۋ شارالارىن جاسايدى. ۇشىنشىدەن، قازىر جازدا اۋىرماعاندار اۋىرۋى مۇمكىن. ال كوپشىلىگى جازدا اۋىرىپ قويعان ەدى»، - دەيدى پۋلمونولوگ.
سونىمەن بىرگە، دارىگەر كوروناۆيرۋسپەن قايتا اۋىرۋ جاعدايلارىن مۇقيات زەرتتەپ، دالەلدەۋ قاجەتتىگىن ايتتى.
«دۇنيەجۇزىلىك دەنساۋلىق ساقتاۋ ۇيىمى كوروناۆيرۋستى قايتا جۇقتىرۋ جاعدايىن رەسمي راستاعان جوق. ءبىراق د د ۇ جانىنان وسى جاعدايلاردى زەرتتەيتىن عالىمداردىڭ ارنايى توبى قۇرىلدى. قىتايداعى ءبىر پاتسيەنتتە پ ت ر سىناماسى ءۇش اي بويى وڭ ناتيجە كورسەتىپ كەلدى. وعان ءار اپتا سايىن زەرتتەۋ جۇرگىزىلدى. مۇندا شىرىشتى قاباتتا قالعان ۆيرۋس بولىكتەرى تەستكە رەاكسيا جاسادى دەگەن دالەلدەر بار. نەگىزى ناۋقاس كلينيكالىق تۇردە جازىلعان، ءبىراق پ ت ر تەستى وڭ ناتيجە كورسەتە بەرگەن. بۇل وتە قيىن ماسەلە، مۇندا جۇقتىرۋدىڭ شىنىمەن قايتالانعانىن دالەلدەۋ كەرەك. ۇلى بريتانيا عالىمدارىنىڭ يممۋنيتەت ءبىر جىلعا، ءتىپتى كەيبىر ادامداردا ءۇش جىلعا سوزىلۋى كەرەك دەگەن زەرتتەۋلەرى بار. ەگەر انتيدەنەلەر بولسا، ولار جۇمىس ىستەۋى كەرەك»، - دەيدى مامان.
سوندا دا دارىگەر قاراپايىم ۆيرۋستان قورعانۋ جولدارىن ۇستانۋعا شاقىردى.
«ارينە، قورعانىس قۇرالدارىن پايدالانۋ كەرەك. ماسكا تاعىپ، الەۋمەتتىك قاشىقتىقتى ساقتاڭىز، قولىڭىزدى سابىنمەن ءجيى جانە مۇقيات جۋىڭىز. جاقسى ۇيقى، تازا اۋادا سەرۋەندەۋ، جاقسى كوڭىل-كۇي يممۋنيتەتتىڭ كۇشەيۋىنە ىقپال ەتەدى»، - دەپ تولىقتىردى كونستانتين گاركالوۆ.
اۆتور: ايجان سەرىكجان قىزى
