«قىزىل» ايماقتاعى نۇر-سۇلتان: قالانىڭ باس سانيتارى تۇرعىندارعا ساق بولۋدى ەسكەرتتى
ەلوردا 10-جەلتوقساننان بەرى «قىزىل» ايماققا ەنگەندىكتەن، قالا ىشىندە اۋرۋ جۇقتىرۋ ىقتيمالدىعى ارتا تۇسكەن. ينفەكسيالىق اۋرۋحانالار ناۋقاسقا تولىپ كەتپەسە دە جازداعى احۋال بۇل قاۋىپتىڭ كەنەت كەلۋى مۇمكىن ەكەنىن كورسەتىپ بەردى. مىنە، سول سەبەپتى قالانىڭ باس سانيتارى مەرەكە كۇندەرى شاھار تۇرعىندارىن ساق بولۋعا شاقىرادى.
«قىزىل» ايماقتاعى ەپيدەميولوگيالىق احۋال
جالپى نۇر-سۇلتان قالاسىندا 2020 -جىلعى 13-ناۋرىز بەن 10-جەلتوقسان ارالىعىندا 16880 ادام COVID-19 ۆيرۋسىن جۇقتىرعان. ونىڭ ىشىندە 10440 اۋرۋ بەلگىلەرى بار بولسا، 6440 سيمپتومسىز ناۋقاستار. قالا بويىنشا سىرقاتتانۋشىلىق كورسەتكىشى ورتاشا رەسپۋبليكالىق كورسەتكىشتەن 1,9 ەسە جوعارى جانە 100 مىڭ حالىققا شاققاندا 1461,2 نى قۇرايدى. 16880 جاعدايدىڭ 416 ى سىرتتان كەلگەندەر، 11534 ى جەرگىلىكتى تۇرعىندار بولسا، 4930 ى بايلانىستا بولعان ادامدار.
«15583 ادامنىڭ امبۋلاتوريالىق ەمدەۋدەن ءوتىپ، اۋرۋحانادان جازىلىپ شىقتى. 340 ادام قايتىس بولدى. 837 ادام ستاتسيونارلىق جانە امبۋلاتوريالىق ەم الۋدا. COVID-19 جاعدايلارى ءالى دە تىركەلىپ جاتىر. تاۋلىگىنە 50 دەن 120 عا دەيىن اۋرۋ بەلگىلەرى بار جاعدايلار تىركەلەدى. ەرەسەكتەر، مەكتەپكە دەيىنگى جانە مەكتەپ جاسىنداعى بالالار اراسىندا دا جۇقتىرىپ جاتقاندار بار»، - دەدى جاننا پراليەۆا قالا اكىمدىگىنىڭ باسپا ءسوز ورتالىعىندا.
ءبىر قيىنى، جازبەن سالىستىرعاندا 14 جاسقا دەيىنگى بالالار اراسىندا COVID-19 ۆيرۋسىن جۇقتىرعاندار سانى %7 عا دەيىن، جاسوسپىرىمدەر %1,4 عا دەيىن جانە 50 جانە ودان جوعارى جاستاعى ادامدار اراسىندا %37 عا دەيىن وسكەنى بايقالىپ وتىر.
«قىركۇيەك ايىندا جانە قازان ايىنىڭ ءبىرىنشى ونكۇندىگىندە قالاداعى ەپيدەميولوگيالىق جاعداي تۇراقتى دەپ باعالاندى. ءبىراق قازان ايىنىڭ ەكىنشى جارتىسىنان باستاپ رەپرودۋكتيۆتى ساننىڭ (R) بىرلىكتەن اسىپ كەتۋى بايقالدى. R سانىنىڭ قازان ايىندا 11 كۇن بويى جانە قاراشا ايىندا 6 كۇن بويى تومەندەدى. قالعان ۋاقىتتا R سانى 1 دەن استى، سوندىقتان قالا «سارى ايماقتا» بولدى. قازان ايىمەن سالىستىرعاندا وزدىگىمەن مەديتسينالىق قىزمەتكە قارالىپ انىقتالعاندار (اپتاسىنا 18-دەن 213 جاعدايعا دەيىن) جانە ءۇي وشاقتارىندا قاتىناستا بولىپ اۋىرعاندار (اپتاسىنا 15-تەن 217 جاعدايعا دەيىن) سانى كوبەيگەن. وتكەن اپتادا سىرقاتتانۋ كورسەتكىشى 100 مىڭ تۇرعىنعا شاققاندا 51,0 دەن اسقان. 10-جەلتوقساننان باستاپ قالا «قىزىل ايماققا» اۋىستى. بۇل ءبىرىنشى كەزەكتە قالا تۇرعىندارىنىڭ الدىن الۋ شارالارىن ساقتاماۋىنا بايلانىستى بولىپ وتىر»، - دەدى ول.
10-جەلتوقساندا COVID-19 ۆيرۋسىن 118 ادام جۇقتىرىپتى. كاسىبي قۇرام بويىنشا جۇمىس ىستەمەيتىن 22, 13 زەينەتكەر، جۇمىس ىستەيتىن 52, 3 مەديتسينا قىزمەتكەرى، 3 اسكەري قىزمەتكەر، وقۋشىلار - 14، 1 ستۋدەنت كوروناۆيرۋس جۇقتىرعان.
وقۋشىلاردىڭ ءبارى دە قاشىقتان وقۋى مۇمكىن
جاننا پراليەۆانىڭ سوزىنشە وقۋشىلار مەن وقىتۋشىلار اراسىندا COVID-19 جاعدايلارىنىڭ تىركەلۋى كۇن سايىن جالعاسىپ جاتقاندىقتان، مەنشىك نىسانىنا قاراماستان، مەكتەپتەردى قاشىقتان وقىتۋ جۇيەسىنە كوشۋ ماسەلەسى قاراستىرىلۋدا. 10 -جەلتوقسانداعى جاعداي بويىنشا، اۋداندىق سانەپيدباقىلاۋ باسقارمالارىنىڭ باس مەملەكەتتىك سانيتارلىق دارىگەرلەرىنىڭ قاۋلىلارىمەن 20 مەكتەپتە وقۋ پروتسەسى 14 كۇنگە ونلاين رەجيمگە اۋىستىرىلعان.
جالپى ەلوردادا وقۋ جىلىنىڭ باسىنان بەرى بارلىعى 224 وقۋشى اۋىرعان. ونىڭ 179 ى قاشىقتان (قالادان تىس جەرلەردەن كەلگەن وقۋشىلار سانى - 15، ونىڭ ىشىندە وففلاين رەجيمدە - 2) وقىعاندار. مەكتەپ بويىنشا بارلىعى 590 قاتىناستا بولعان ازامات تەكسەرىلدى. 8 جاعدايدا مەكتەپ وقۋشىلارى جانە 1 جاعدايدا وقىتۋشى قارىم- قاتىناستا بولعاندىقتان اۋىرعان . قالادا COVID-19 دياگنوستيكاسى بويىنشا تاۋلىكتىك قۋاتتىلىعى 11680 زەرتتەۋ بولاتىن 18 زەرتحانا جۇمىس ىستەيدى. بارلىق زەرتحانانىڭ جۇكتەمەسى 25 تەن %40 عا دەيىن، كۇنىنە 4500 گە دەيىن زەرتتەۋ جۇرگىزەدى. «كوروناۆيرۋس جۇقتىرعان ازاماتتاردى ۋاقتىلى انىقتاۋ ماقساتىندا پ ت ر انىقتاماسىنسىز كەلگەن ادامدار كارانتيندىك ستاتسيونارعا جاتقىزىلىپ، ولار قاتاڭ تۇردە تەكسەرىلىپ جاتىر. وسى جىلدىڭ 2-قازانى مەن 10-جەلتوقسانى ارالىعىندا 283 رەيسپەن استاناعا 35450 ادام كەلدى. ونىڭ ىشىندە تەرىس پتر ناتيجەسى بار انىقتامامەن 30767 ازامات جەتتى. دەپورتاتسيالانعانداردىڭ سانى 15. كارانتيندىك ستاتسيونارعا جاتقىزىلعاندار جانە تەكسەرىلدەر - 4668. 22 سيمپتومسىز ناۋقاس انىقتالىپ ونىڭ 4 ى ەمدەۋگە جاتقىزىلدى»، - دەپ اتاپ ءوتتى جاننا پراليەۆا.
ونىڭ ايتۋىنشا اۆتووتپە جولدار ارقىلى باسقا ەلدەردەن كەلگەن ادامداردىڭ دەنساۋلىق جاعدايىنا مونيتورينگ جۇرگىزىلۋدە. قازان ايىنان باستاپ ەلورداعا اۆتووتپە جولدار ارقىلى بارلىعى 4197 ادام كەلگەن. ونىڭ ىشىندە اۆتووتپە جولدار ارقىلى وتكەندەردىڭ ىشىنەن COVID-19 ۆيرۋسىن جۇقتىرۋدىڭ 6 جاعدايى جۇك تاسىمالداۋشىلار اراسىندا تىركەلگەن.
6 نىساننىڭ جۇمىسى 3 ايعا دەيىن توقتاتىلۋى مۇمكىن
«وسى جىلدىڭ 10-قاراشا مەن 10-جەلتوقسان ارالىعىندا مونيتورينگ توپتارى شەكتەۋ جانە كارانتين شارالارىنىڭ بۇزىلۋىنا قاتىستى 158 شۇعىل حابارلاما جىبەردى: وسىلايشا ۇيلەستىرۋ ورتالىعىنان شۇعىل حابارلامالار كەلىپ ءتۇستى. جوسپاردان تىس تەكسەرۋ ناتيجەلەرى بويىنشا جالپى سوماسى 28933070 تەڭگە بولاتىن 107 اكىمشىلىك ايىپپۇل سالىندى (ونىڭ ىشىندە ءبىر نىسانداعى 4 قىزمەتكەرگە ايىپپۇل سالىنعان).
كەمشىلىكتەردى رەتتەۋ جونىندە 105 نۇسقاما بەرىلدى»، - دەيدى جاننا پراليەۆا.
شەكتەۋ جانە كارانتين شارالارىنىڭ «ادەيى بۇزعاندارعا» قاتىستى نۇسقامانى ورىنداماعانى ءۇشىن نۇر-سۇلتان قالاسىنىڭ مامانداندىرىلعان اۋدانارالىق اكىمشىلىك سوتىنا ق ر ا ق ب ت ك- ءنىڭ 462-بابىنىڭ 3-بولىگى بويىنشا 7 اكىمشىلىك حاتتاما جىبەرىلدى.
ولار: «sova» كاراوكە بارىنىڭ، «جانىم سول» كاراوكە- بارىنىڭ، «Alanya» تۇنگى كلۋبى، «Teqila» لاۋندج- بارى، «Echo « بارى، «التىن» مەيرامحاناسى. اكىمشىلىك كودەكستىڭ 462-بابىنىڭ 3-بولىگىنىڭ سانكسياسى نىسان قىزمەتىن توقتاتا وتىرىپ، اكىمشىلىك ايىپپۇل تۇرىندەگى جازا بەرۋدى كوزدەيدى. باسقارما وكىلدەرى جوعارىدا اتالعان نىسانداردىڭ قىزمەتىن 3 ايعا دەيىن توقتاتا تۇرۋ تۇرىندە قوسىمشا جازا شاراسىن قولدانۋ تۋرالى سوتقا ءوتىنىش جاساماق. ءسوز سوڭىندا جاننا پراليەۆا الداعى تاۋەلسىزدىك مەرەكەسىندە ەلوردا تۇرعىندارى 4 كۇن دەمالاتىنىن، بۇل ۋاقىتتى تۋىستارى مەن جاقىندارىنىڭ ورتاسىندا وتكىزۋگە مۇمكىندىك الاتىنىن جەتكىزدى.
«وسى رەتتە مەن نۇر- سۇلتان قالاسىنىڭ باس مەملەكەتتىك سانيتارلىق دارىگەرى رەتىندە ەلوردانىڭ ءاربىر تۇرعىنىنا ءوز دەنساۋلىعىڭىز بەن جاقىندارىڭىزدىڭ دەنساۋلىعىن ۇمىتپاۋعا شاقىرامىن»، - دەپ ءتۇيدى قالانىڭ باس سانيتارى.
