جاسوسپىرىمدەردىڭ دەنساۋلىعىنا قانداي تاماقتار كەرى اسەر ەتەدى

بالالار مەن جاسوسپىرىمدەر اراسىندا جەمىستەر مەن كوكونىستەردى از جەۋ، كوبىنەسە ءتاتتى سۋسىنداردى ءىشىپ، تاتتىلەردى جەۋ ادەتى بايقالادى، دەپ حابارلايدى د س م قوعامدىق دەنساۋلىق ساقتاۋ ۇلتتىق ورتالىعىنىڭ باسپا ءسوز قىزمەتى.

ق ر د س م قوعامدىق دەنساۋلىق ساقتاۋ ۇلتتىق ورتالىعىنىڭ عىلىم جانە كاسىبي دامۋ ءبولىمىنىڭ باس مامانى شىنار ابدراحمانوۆا 2020 -جىلى 4-5-جەلتوقساندا نيدەرلاندىداعى «Excellence of Pediatrics « پەدياتريا جونىندەگى حالىقارالىق ونلاين كونفەرەنسياسىندا قازاقستاندا 11-15 جاس ارالىعىنداعى 4864 وقۋشىعا جۇرگىزىلگەن «مەكتەپ جاسىنداعى بالالاردىڭ دەنساۋلىققا قاتىستى مىنەز- قۇلقى»، HBSC، ساۋالناماسىنىڭ ناتيجەلەرىن كورسەتتى. كۇن سايىن تاڭعى اس ىشپەيتىن 11-15 جاستاعى جاسوسپىرىمدەر، كۇن سايىن تاڭعى اس ىشەتىندەرگە قاراعاندا، باس اينالۋىنا، باس اۋرۋىنا جانە ءىشتىڭ اۋىرۋىنا ەكى ەسە كوپ شاعىمدانادى ەكەن.

كوكونىستەر مەن جەمىستەردى اپتاسىنا 5-6 رەتتەن از جەيتىن جاسوسپىرىمدەردىڭ باسى ءجيى اينالادى جانە ءىشى اۋىرادى. ال اپتاسىنا بولماعاندا 5-6 رەت تاتتىلەردى جەۋ جاسوسپىرىمدەردىڭ باسىن اۋىرتادى ەكەن.

«دۇرىس تاماقتانبايتىن جاسوسپىرىمدەر اراسىندا دەنساۋلىققا قاتىستى پروبلەمالاردىڭ قاۋپى ارتادى، سوندىقتان قوعامنىڭ ءتۇرلى سەكتورلارىنىڭ: دەنساۋلىق ساقتاۋ، ءبىلىم بەرۋ، بيزنەس، ازاماتتىق قوعام، باق جانە باسقا دا سەرىكتەستەردىڭ قاتىسۋىمەن ۇنەمى دۇرىس تاماقتانۋ ماسەلەسىن كوتەرۋ كەرەك»، - دەيدى ش. ابدراحمانوۆا.

اۆتور: اياۋلىم التىنبەك

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى