قازاقستاندا ءبىر جىلدا ءدارى باعاسى قانشالىقتى قىمباتتادى

2020 -جىلدىڭ قاڭتار- قازان ايلارى ارالىعىندا ەلىمىزدە قۇنى 109,6 ميلليارد تەڭگە بولاتىن نەگىزگى فارماتسيەۆتيكالىق ونىمدەر وندىرىلگەن.

بۇل 2019 -جىلمەن سالىستىرعاندا 44,7 پايىزعا جوعارى كورسەتكىش. Energyprom.kz زەرتتەۋىنشە، ءوندىرىستىڭ باسىم بولىگى (81,2 پايىز) ءۇش ايماقتا جۇرگىزىلەدى: شىمكەنتتە (40,8 ميلليارد تەڭگە، بىلتىرمەن سالىستىرعاندا 52,1 پايىزعا كوپ)، الماتى وبلىسىندا (25,1 ميلليارد تەڭگە) جانە الماتىدا (23,1 ميلليارد تەڭگە).

سونداي-اق ەلگە جالپى قۇنى 868,4 ميلليون دوللار بولاتىن 23,1 مىڭ توننا مەديكامەنتتەر اكەلىنگەن. تمد ەلدەرىنەن 117,3 ميلليون دوللارعا 11,4 مىڭ توننا مەديكامەنت الىنعان.

مەديكامەنتتەردى بىزگە ەكسپورتتاۋشى ەلدەر - رەسەي، بەلارۋس جانە وزبەكستان. وزگە ەلدەردەن قازاقستان 751,1 ميلليون دوللارعا 11,6 مىڭ توننا مەديكامەنت يمپورتتاعان. ونىڭ ىشىندە قىتاي، ءۇندىستان، گەرمانيا ەلدەرى بار.

جۇرگىزىلگەن زەرتتەۋ بويىنشا 2020 -جىلدىڭ قاراشا ايىندا فارماتسيەۆتيكالىق پرەپاراتتار 2019 -جىلدىڭ قاراشاسىمەن سالىستىرعاندا 9,7 پايىزعا قىمباتتاعان. پرەپاراتتار ىشىندە اسىرەسە انتيسەپتيك (33,2 پايىزعا)، قىزۋ تۇسىرەتىن دارىلەر (16,3)، بۇيرەك دارىلەرى (11,5)، انتيبيوتيكتەر (10) باعاسى كوتەرىلگەن. گيستامينگە، اللەرگيا قارسى دارىلەردىڭ باعاسى ارزانداعان. ءبىراق كوپ ەمەس، ءبىر جىل ىشىندە نەبارى 0,4 پايىزعا عانا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى