پاۆلودار وبلىسىنداعى پوليتسەيدە قوس ازاماتتىق بولعان
بۇل تۋرالى سەناتتىڭ جالپى وتىرىسىندا ق ر ىشكى ىستەر ۆيتسە-ءمينيسترى الەكسەي كالايچيدي ءمالىم ەتتى، دەپ حابارلايدى قازاقپارات ءتىلشىسى.
«بيىلدىڭ 11 ايىندا قوس ازاماتتىقتىڭ 431 فاكتىسىن انىقتادىق. ونىڭ ىشىندە شىعىس قازاقستان مەن پاۆلودار وبلىستارىنداعى ەكى فاكتى بويىنشا مەملەكەتتىك قىزمەتشىلەرگە قاتىستى بولدى»، - دەدى ا. كالايچيدي دەپۋتاتتار سۇراعىنا جاۋاپ بەرە وتىرىپ.
وسى ورايدا ول بۇل باعىتتاعى جۇمىستار ت م د ەلدەرىنىڭ قۇقىق قورعاۋ ورگاندارى اراسىندا ءتيىستى كونۆەنسيالار اياسىندا ىسكە اسىرىلىپ جاتقانىن جەتكىزدى.
ازىرگە رەسەيمەن ارادا وڭتايلى جاۋاپ بولماي تۇرعانىنا توقتالعان ول، «ت م د- نىڭ باسقا ەلدەرىمەن اتالعان ماسەلەدە ايتارلىقتاي تىعىز قارىم-قاتىناس ورناتىلعان. ءبىز وسىنداي اقپاراتتاردى تەكسەرىپ جاتىرمىز. اتاپ ايتقاندا، پاۆلودار وبلىسىنداعى جاعداي بويىنشا ىشكى ىستەر ورگانىنىڭ قىزمەتكەرى انىقتالدى. ارىپتەستەرمەن ءوزارا تۇسىنىستىك بار، بارشا الەمدە بۇل باعىتتاعى جۇمىستار رەسمي ساۋالدار مەن جەدەل اتقارۋ جۇمىستارى نەگىزىندە ىسكە اسىرىلادى»، - دەدى.
اۆتور: رۋسلان عابباسوۆ
