ماجىلىستە بالالاردى سپورتپەن اينالىسۋعا تارتۋدى كوزدەيتىن قۇجات ماقۇلداندى
زاڭ جوباسى قولدانىستاعى زاڭنامانى بۇقارالىق سپورتتى دامىتۋ جانە حالىقتى، ءبىرىنشى كەزەكتە بالالاردى سپورتپەن ءارى دەنە شىنىقتىرۋمەن اينالىسۋعا بارىنشا تارتۋ بولىگىندە جەتىلدىرۋگە باعىتتالعان.
«قۇجاتتىڭ نەگىزگى باعىتتارىنا توقتالساق، وكىلەتتى ورگاننىڭ قۇزىرەتىن كەڭەيتۋ، جەرگىلىكتى اتقارۋشى ورگانداردىڭ قۇزىرەتىن كەڭەيتۋ، سپورتتىق ينفراقۇرىلىمنىڭ قولجەمدىلىگى، ءبىلىم بەرۋ سالاسىنداعى جاڭالىقتار قامتىلعان. وكىلەتتى ورگاننىڭ قۇزىرەتى ۇلتتىق سپورت تۇرلەرى بويىنشا تىزبەنى بەكىتۋ قىزمەتىمەن تولىقتىرىلادى»، - دەدى مادەنيەت جانە سپورت ءمينيسترى اقتوتى رايىمقۇلوۆا.
جەرگىلىكتى اتقارۋشى ورگانداردىڭ قۇزىرەتى كەلەسى قىزمەتتەرمەن تولىقتىرىلادى: دارىگەرلىك- دەنە شىنىقتىرۋ ديسپانسەرلەرىنىڭ سانىن ارتتىرۋ، حالىقپەن جۇمىس ىستەۋ ءۇشىن دەنە شىنىقتىرۋ جانە سپورت نۇسقاۋشىلارىمەن قامتاماسىز ەتۋ، اۋىل حالقى اراسىنداعى دەنە شىنىقتىرۋ ساۋىقتىرۋ قىزمەتى، بالالار مەن جاس وسپىرىمدەرگە ارنالعان دەنە شىنىقتىرۋ دايارلىعى كلۋبتارىنىڭ جەلىسىن كەڭەيتۋ.
سونىمەن قاتار سپورت ينفراقۇرىلىمىنىڭ قولجەمدىلىگى اياسىندا مۇمكىندىگى شەكتەۋلى جاندار مەن حالىقتىڭ ءجۇرىپ-تۇرۋى شەكتەۋلى توپتارىن قوسا العاندا، ولاردىڭ تۇرعىلىقتى جەرى بويىنشا جانە كوپشىلىك دەمالاتىن ورىنداردا سپورت نىساندارىنىڭ قولجەتىمدىلىگىن قامتاماسىز ەتۋ ەسكەرىلگەن.
تۇرعىن ءۇي كەشەندەرىن سالۋ كەزىندە مۇمكىندىگى شەكتەۋلى توپتاردىڭ قولجەتىمدىلىگىن ەسكەرە وتىرىپ، سپورت الاڭدارىمەن قامتاماسىز ەتۋ قاجەتتىگى قاراستىرىلدى. مۇنىمەن قوسا، ءبىلىم بەرۋدىڭ بارلىق دەڭگەيلەرىندەگى دەنە تاربيەسى ساباقتارىندا ۇلتتىق سپورت تۇرلەرىنىڭ قۇرامداسىن ەنگىزۋ نازارعا الىندى.
«بارلىق جاس ساناتتارى اراسىندا دەنە شىنىقتىرۋمەن جانە سپورتپەن اينالىساتىن حالىقتىڭ قامتۋىن 45 پايىزعا دەيىن ۇلعايتۋ، وسكەلەڭ ۇرپاقتىڭ پاتريوتتىق سەزىمىن نىعايتۋ، سالاۋاتتى ءومىر سالتىن ناسيحاتتاۋ، تۇرعىلىقتى جەرى بويىنشا بۇقارالىق سپورتتى دامىتۋ جونىندە حالىقپەن جۇمىستى ۇيىمداستىرۋ، سپورتشىلاردى مەديتسينالىق باقىلاۋ ءۇشىن جاعداي جاساۋ ەسكەرىلگەن»، - دەدى مادەنيەت جانە سپورت ءمينيسترى.
