سولتۇستىك قازاقستانعا قانشا ادام قونىس اۋداردى
بۇل تۋرالى س ق و اكىمى قۇمار اقساقالوۆ ايتىپ بەردى، دەپ حابارلايدى قازاقپارات ءتىلشىسى.
«سولتۇستىك وڭىرگە قونىس اۋدارۋ «ەڭبەك» باعدارلاماسى اياسىندا جۇزەگە اسىرىلىپ جاتىر. ياعني، ەڭبەك كۇشى ارتىق وڭىرلەردە تۇراتىن ءاربىر ازامات كوشۋ مۇمكىندىگىنە يە. ول ءۇشىن وتباسىنىڭ ءاربىر مۇشەسىنە 35 ا ە ك كولەمىندە وتەماقى تولەنەدى، بۇل شامامەن 97 مىڭ تەڭگە. وتباسىندا 5 ادام بولسا، كوشكەنى ءۇشىن 500 مىڭ تەڭگە وتەماقى الادى دەگەن ءسوز. باسپانا جالداۋ ءۇشىن وتباسى اۋىلدىق جەردى تاڭداسا - 10-20 ا ە ك، قالانى تاڭداسا - 20-30 ا ە ك ارالىعىندا تاعى تولەنەدى. ياعني، مەملەكەت اقشانى بولەدى، ادام قايدا تۇراتىنىن ءوزى تاڭدايدى»، - دەدى اكىم ورتالىق كوممۋنيكاتسيالار قىزمەتىندە وتكەن بريفينگتە.
2019 -جىلدان باستاپ، قونىس اۋدارۋشىلارعا ءۇي سالىپ بەرۋ بويىنشا وبلىستىق باعدارلاما ىسكە قوسىلعان.
«اۋىل شارۋاشىلىعى تاۋارىن وندىرۋشىلەردى تۇراقتى ەڭبەك كۇشىمەن قامتاماسىز ەتۋ ءۇشىن ءتيىستى ەڭبەكاقى مەن الەۋمەتتىك جاعداي جاساۋ قاجەت. ول ءۇشىن تاۋار وندىرۋشىلەر مەن مەملەكەت قاجەتتى ماماندارعا ارناپ ءۇي سالادى. ءدال قازىر بىزگە تراكتورشىلار، مەحانيزاتورلار، مۇعالىمدەر، دارىگەرلەر، مال دارىگەرلەرى قاجەت. بۇل ۇيدە وتباسى 5 جىل تۇرعاننان كەيىن مەملەكەتتىڭ قۇرىلىسقا جۇمساعان قاراجاتىن وتەسە جەتكىلىكتى. بارلىق ۇيلەر تەحنيكالىق تەكسەرۋدەن وتەدى، كەپىلدىك بەرىلگەن 2-3 جىل بويى اقاۋلارىن تەگىن جوندەيدى. وتكەن جىلى 425 ءۇيدى پايدالانۋعا بەردىك، بيىل 700 ءۇي سالىنادى»، - دەپ ءتۇسىندىردى ق. اقساقالوۆ.
اكىمنىڭ ايتۋىنشا، وتكەن جىلى س ق و- عا ەڭبەك كۇشى كوپ وڭىرلەردەن 2200 ادام، بيىل - 1800 ادام كوشىپ كەلگەن.
«ارينە ولاردىڭ اراسىندا دەنساۋلىق جاعدايىمەن، وتباسىلىق سەبەپتەرمەن تۋعان جەرىنە كەرى ورالعاندار بار. ونسىز بولمايدى. ءبىراق كەرى ورالعاندار سانى ايتارلىقتاي كوپ ەمەس. سوندىقتان، بۇل باعدارلاما بىزگە قاجەت جانە ءارى قاراي دا جۇزەگە اسىرىلا بەرەدى» ، - دەدى قۇمار اقساقالوۆ.
