كوروناۆيرۋستان ەمدەلگەندەر قانداي تالاپتاردى ورىنداۋى كەرەك
سونىمەن قاتار قاراشا ايىندا ق ر دەنساۋلىق ساقتاۋ مينيسترلىگى وكىلدەرى ىندەتتى قايتا جۇقتىرۋ دەرەگى قاراعاندى وبلىسىندا تىركەلگەنىن ايتقان بولاتىن.
وسى ورايدا قوعامدىق دەنساۋلىقتى نىعايتۋ ورتالىعىنىڭ باسشىسى جازيرا ەمبەردييەۆا كوروناۆيرۋس ينفەكتسياسىمەن اۋىرىپ جازىلعاندارعا پايدالى كەڭەسىن ايتتى.
«دۇرىس تاماقتانۋ كەرەك. ادام اعزاسىنا اقۋىز، مايلار جانە كومىرسۋ قاجەت. كوكونىس پەن جەمىس- جيدەككە كوبىرەك ءمان بەرىڭىز. تاتتىلەردەن دە باس تارتپاڭىز (تەك بەلگىلى ءبىر كولەمدە) - ولار كوڭىل- كۇيىڭىزدى جاقسارتادى. تازا اۋادا كۇن سايىن سەرۋەندەۋگە دە ءمان بەرۋ كەرەك. كوروناۆيرۋس ينفەكسياسىنان سوڭ جانە اعزانىڭ ۇزاق ۋاقىت السىرەۋىنەن كەيىن سىزگە وتە قاجەت كۇش قۋات بەرەدى»، - دەدى ج. ەمبەرديەۆا.
بۇل تۇرعىدا ول ول كۇن سايىنعى تىنىس الۋ گيمناستيكاسىنا توقتالدى. دەم الۋدى - دەم شىعارۋدى باقىلاۋ ارقىلى قاراپايىم جاتتىعۋ جاساۋ كەرەك. اۋرۋدان كەيىن اعزا ءالى دە كۇشەيمەگەندىكتەن، جاتتىعۋدى شامادان تىس كوپ جاساماڭىز، جۇكتەمەلەردى بىرتىندەپ ارتتىرعانىڭىز دۇرىس. تىنىس الۋ گيمناستيكاسى وكپەنىڭ قالىپتى جۇمىس ىستەۋىنە ىقپال ەتەدى جانە ونى وتتەگىمەن قانىقتىرادى.
«7-8 ساعاتتان كەم بولمايتىن تولىققاندى ۇيقى كەرەك. ۇيىقتار الدىندا بولمەنى مىندەتتى تۇردە جەلدەتۋ كەرەك جانە 2 - 3 ساعات بۇرىن تاماقتانعان دۇرىس. بۇل تەز قالىپقا كەلۋىڭىزگە كومەكتەسەدى. سترەسكە جانە ۇرەيگە، ۋايىمعا سالىنباۋ كەرەك. ءقازىر بارلىعىمىز - اۋىرعاندار دا، اۋىرماعاندار دا سترەسس جاعدايىندامىز. اتالعان ينفەكسيانىڭ ەرەكشەلىگى گيپوكسيا، وتتەگىنىڭ جەتىسپەۋى. بۇل قورقىنىشتىڭ جانە دەپرەسسيانىڭ العىشارتى بولۋى مۇمكىن. مۇنداي جاعدايدا پسيحولوگتەن كەڭەس الۋىڭىزعا بولادى. ول سىزگە الاڭداماۋعا جانە سەنىمدى بولۋعا كەڭەس بەرەدى. الدە جاقىن ادامدارىڭىزبەن قارىم-قاتىناستى كۇشەيتىڭىز، تابيعات اياسىنا شىعىڭىز، ياعني جاقسى كوڭىل- كۇي تەزىرەك قالىپقا كەلۋگە كومەكتەسەدى»، - دەدى مامان.
