يت جۇگىرتىپ، قۇس سالاتىن مۇعالىم
بۇگىندە مەكتەپ وقۋشىلارىن قىران باپتاپ، اڭعا سالۋعا باۋلىپ ءجۇر.
«قاشىقتان جۇمىسقا كوشكەلى قول قۋسىرىپ وتىرعىم كەلمەيدى. ۇيدە وتىراتىن ۋاقىتىم دا از. ەڭ الدىمەن قىران قۇسىمدى باپتايمىن. قۇستارىمنىڭ بىرەۋىنىڭ مىنەزى اۋىر. ەكى بۇركىت، بەس- التى يتەلگىم بار. شاكىرتتەرىممەن تاۋعا شىعىپ، قىراندارىمدى اڭعا سالامىن. قولىم بوساعاندا سۋرەت سالىپ، ءاميان تىگەمىن. بۇركىتتىڭ توماعاسىن، ەر ازاماتتارعا ارنالعان تازا بىلعارىدان بەلبەۋ، قول سومكە، ءاميان تىگەمىن»، - دەيدى ول.
جىگىتكە جەتى ونەر دە از دەمەكشى ە. ەشانوۆ الماتى قالاسىنان ارنايى بىلعارى تەرىلەرىن الدىرتىپ، ەر ادامدارعا ارنالعان قول سومكە مەن ءاميان تىگۋدى دە قولعا العان. ءتىپتى قىلقالامنىڭ بوياۋىن سويلەتىپ، پورترەت سالادى.
«ءاميان تىگۋدىڭ دە ەرەكشە سىرى بار. اۋەلى بىلعارىنى دايىنداپ، جان- جاعىن تەگىستەيمىن. ويتكەنى تەرىنى كەسكەندە ءجىبى تارقاتىلىپ كەتەدى. جىپتەرى شىعىپ تۇرماس ءۇشىن تەگىستەپ، كەيىن ارنايى قۇرالمەن بىركەلكى ەتىپ تەسىپ، قالىڭ ارنايى جىپپەن تىگىپ شىعامىن. ءامياننىڭ بىلعارىسى بولەك، بۇركىتتىڭ توماعاسىن تىگەتىن بىلعارى بولەك بولىپ كەلەدى. بۇل بىلعارىنى ارنايى تاپسىرىسپەن الدىرتامىن»، - دەيدى شەبەر.
ەرتىس ەشانوۆتىڭ جۇمىس بولمەسىندە بىرنەشە مايلى بوياۋ سۋرەتتەر دە بار. «بوزجىرا» ، «شەرقالا» تاۋى، ماڭعىستاۋدىڭ تاريحي ولكەلەرى، كەڭ دالاداعى قازاق ۇيلەرى بەينەلەگەن پورترەتتەر دە كەزدەسەدى. قىلقالامنىڭ ۇشىمەن جىلقىنى بەينەلەپ جاتقان ونەر يەسىنىڭ بويىنان قازاقتىڭ سال سەرىلەرىنىڭ مىنەزى بايقالادى.
