تۇركيا مەن رەسەي تاۋلى قاراباق بويىنشا بىرلەسكەن ورتالىق تۋرالى حاتتاماعا قول قويدى
بۇل تۋرالى بۇگىن تۇركيانىڭ ۇلتتىق قورعانىس مينيسترلىگىنىڭ Twitter پاراقشاسىندا جازىلدى.
حاتتامادا قاراباق بويىنشا بىرلەسكەن ورتالىقتىڭ نەگىزدەرى مەن پرينتسيپتەرى جازىلعان. تۇركيا مەن رەسەيدىڭ بىرىككەن ورتالىعىنىڭ جۇمىسىن باستاۋ ءۇشىن قاجەتتى شارالار اتقارىلىپ جاتىر.
بىرلەسكەن باقىلاۋ ورتالىعىن قۇرۋ تۋرالى كەلىسىمگە 11- قاراشادا تۇركيا مەن رەسەيدىڭ قورعانىس ۆەدومستۆولارىنىڭ باسشىلارى حۋلۋسي اكار مەن سەرگەي شويگۋ قول قويدى. ءار ەلدەن تاۋلى قاراباقتاعى اتىستى توقتاتۋ رەجيمىن باقىلاۋ بويىنشا بىرلەسكەن ورتالىق قىزمەتكەرلەرىنىڭ سانى تەڭ بولادى.
بۇل تۋرالى سەيسەنبىدە رەسەي قورعانىس مينيسترلىگىنىڭ رەسمي وكىلى يگور كوناشەنكوۆ مالىمدەدى، دەپ جازادى تاسس.
ونىڭ ايتۋىنشا، اتالعان ورتالىق ازەربايجان ايماعىندا ورنالاسادى.
«ورتالىقتا جۇمىس ىستەيتىن رەسەي جانە تۇركيا ساربازدارىنىڭ سانى تەڭ بولادى»، - دەيدى اسكەري ۆەدومستۆانىڭ رەسمي وكىلى.
كوناشەنكوۆتىڭ ايتۋىنشا، رەسەيدىڭ بىتىمگەرشىلىك كونتينگەنتىنىڭ اسكەري قىزمەتشىلەرى ستەپاناكەرتتەگى زورگە كوشەسى جانە شۋشا - ليسوگورسكي باعىتىنداعى گاز قۇبىرى مەن ەلەكتر جەتكىزۋ جەلىسىن جارىلعىش زاتتاردان تازارتقانىن ايتتى.
«ءبىر تاۋلىك ىشىندە 5 گەكتاردان استام اۋماق، ەكى شاقىرىم جول تازارتىلىپ، 109 جارىلعىش زات تابىلدى جانە ولار ارنايى جابدىقتالعان پوليگونعا جەتكىزىلىپ، جويىلدى»، - دەيدى ول.
سونداي-اق، ول تاۋلى قاراباقتاعى ينجەنەرلىك بولىمدەر 34 گەكتاردان استام جەر، 12 شاقىرىمعا جۋىق جولدى تازارتقانىن، 110 نان استام ءۇي مەن الەۋمەتتىك نىساندار تەكسەرىلىپ، 1077 جارىلعىش زات تابىلىپ، زالالسىزداندىرىلعانىن ايتتى.
سونىمەن قاتار، رەسەيدىڭ بىتىمگەرشىلىك كۇشتەرى تاۋلى قاراباقتاعى ماڭىزدى ينجەنەرلىك كوممۋنيكاتسيالاردى قالپىنا كەلتىرۋدە جوندەۋ بريگادالارىنا كومەك كورسەتۋدە، ال رەسەيدىڭ قورعانىس مينيسترلىگىنىڭ ارنايى ماقساتتاعى مەديتسينالىق بولىمشەسىنىڭ اسكەري دارىگەر-ماماندارىنىڭ توبى مامانداندىرىلعان مەديتسينالىق كومەك كورسەتەدى. رەسەيدىڭ بىتىمگەرشىلىك كۇشتەرى مەن حالىقارالىق قىزىل كرەست كوميتەتىنىڭ ۇيلەستىرۋىمەن قۇربان بولعانداردىڭ دەنەلەرىن ىزدەۋ جانە الماسۋ جۇمىستارى جالعاسۋدا.
