كوروناۆيرۋس: ەلورداعا پ ت ر انىقتاماسىز ۇشىپ كەلگەن جولاۋشىلار قالاي تەكسەرىلەدى
اۋە رەيسىمەن كەلگەن جولاۋشىلاردىڭ ىشىندە كۇندەلىكتى قانشا ادامنان كوروناۆيرۋس انىقتالادى؟ بۇل ساۋالدارعا ەلورداداعى 3№ قالالىق كوپبەيىندى اۋرۋحانانىڭ ديرەكتورى جۇلدىز دانبايەۆا جاۋاپ بەرگەن بولاتىن، دەپ حابارلايدى قازاقپارات ءتىلشىسى.
«قازىرگى ۋاقىتتا كوروناۆيرۋس ينفەكتسياسىنا بايلانىستى كارانتين ستاتسيونارى رەتىندە بۇرىنعى «رامادا پلازا» قوناق ءۇيى جۇمىس ىستەپ تۇر. ول جەردە 500 توسەك- ورىنعا ارنالعان كارانتيندىك ستاتسيونار قۇرىلعان. قالانىڭ باس سانيتار دارىگەرىنىڭ قاۋلىسىنا سايكەس، وعان شەتەلدەن اۋە رەيسىمەن ۇشىپ كەلگەنىمەن قولىندا پ ت ر تەستىنىڭ ناتيجەلەرى جوق جولاۋشىلار جەتكىزىلەدى. تاۋلىك ىشىندە شامامەن ەلورداعا 5-6 رەيس ۇشىپ كەلەدى دەيتىن بولساق، سولاردىڭ ىشىندە زەرتتەۋ ناتيجەسى جوق شامامەن 50-60 جولاۋشى وسى ستاتسيونارعا جاتقىزىلادى»،-دەدى جۇلدىز دانبايەۆا.
دەگەنمەن، ول سوڭعى ۋاقىتتا شەتەلدەن ۇشىپ كەلگەن قازاقستان ازاماتتارىنىڭ اراسىندا تەك 5 جولاۋشىدان عانا كوروناۆيرۋس انىقتالعانىن ايتادى.
«ەگەر ادامنان ينفەكتسيا انىقتالماسا، وندا ءبىز ونى ۇيىنە جىبەرەمىز. ولاردى تەك 2 تاۋلىك قانا ۇستايمىز. دەگەنمەن، ادەتتە ۇشاقپەن كەلگەن جولاۋشىلار بىزدە تاۋلىككە جەتپەيتىن ۋاقىت ىشىندە عانا بولادى. سەبەبى ساراپتامالاردى جىلدام جاسايمىز. ناۋقاستا كوروناۆيرۋستىڭ سيمپتومسىز فورماسى بولسا، وندا ءۇي كارانتينىنە جىبەرەمىز. ونىمەن بايلانىستا بولعان ادامدار دا ۆيرۋس بەلگىلەرى بايقالماسا ۇيدەن ەمدەلۋگە جىبەرىلەدى. ال كوروناۆيرۋس بەلگىلەرى بار ادامداردى 40-شى ستانسادا ورنالاسقان قالالىق مودۋلدىك جۇقپالى اۋرۋلار اۋرۋحاناسىنا اۋىستىرامىز»،-دەپ تۇسىندىرەدى ول.
اۋرۋحانا ديرەكتورى ەلورداعا اۋە كەمەسىمەن ۇشىپ كەلگەن، الايدا پ ت ر انىقتاماسى جوق جولاۋشىلارعا بارلىق جاعداي جاسالىپ وتىرعاندىعىنا باسا نازار اۋدارتادى.
«بىرەۋلەر ساراپتاما تاپسىرىپ ۇلگەرمەسە، ەندى ءبىرى زەرتحانا تابا الماي قالادى. اقشاسى بولماي قالاتىن جولاۋشىلار دا كەزدەسەدى. ولاردىڭ بارلىعى وسى جەرگە («رامادا پلازا» قوناق ءۇيى) جەتكىزىلەدى جانە تەگىن پ ت ر تەستىلەۋدەن وتەدى. جولاۋشىلاردىڭ باسىم بولىگى ساراپتاما قورىتىندىسىمەن كەلەتىندىگىن اتاپ وتكەن ءجون. جالپى، ءار رەيسپەن قولىندا ساراپتاما ناتيجەسى جوق بىرنەشە عانا جولاۋشى ۇشىپ كەلەدى. بىزدە 5 جاسقا تولماعان بالالار تەست تاپسىرمايدى. كارانتين ستاتسيونارىندا ءۇش رەت تاماق بەرىلەدى»،-دەدى جۇلدىز دانبايەۆا.
سونىمەن قاتار جۇلدىز دانبايەۆا ءوزى باسشىلىق جاسايتىن اۋرۋحانادا وزگە دە اۋرۋعا شالدىققان ناۋقاستاردىڭ ەم الاتىندىعىنا نازار اۋدارتادى.
«ءبىز كوپبەيىندى اۋرۋحانا سالامىز جانە جوسپارعا سايكەس، كوروناۆيرۋس ينفەكتسياسى ۋشىققان، جۇقپالى اۋرۋلار اۋرۋحاناسى لىق تولعان جاعدايدا، ياعني ءۇشىنشى كەزەڭدە تۇرمىز. قوسىمشا توسەك- ورىن دايىنداپ، وتتەگى تارتىپ قويدىق. وكپەنى جاساندى جەلدەتۋ اپپاراتتارىمىز دا دايىن. ءدارى- دارمەكتىڭ 2-ايعا جەتەتىن قورى بار. كۇندەلىكتى ازداعان ءوسىم بولعانىنا قاراماستان ازىرشە ەلورداداعى احۋال تۇراقتى. بىردە ناۋقاستار سانى ارتىپ، بىردە كەمىپ وتىر. قازىرگى ۋاقىتتا «سارى» ايماقتا تۇرعانىمىز دا بەلگىلى. كادر ماسەلەسى تولىق شەشىلگەن. ناۋرىزدان بەرى كوماندا جاساقتاپ، ماماندارىمىزدى وقىتىپ الدىق. قازىر بىزدە ءبارى دايىن. شتاتتىق كەستە كەلىسىلىپ، بارلىق دارىگەرىمىز ۇنەمى بايلانىستا وتىر»،-دەدى ەلورداداعى 3№ كوپبەيىندى قالالىق اۋرۋحانانىڭ ديرەكتورى جۇلدىز دانبايەۆا.
ايتا كەتەرلىگى، وتكەن تاۋلىكتە عانا قازاقستاندا 762 ادامدا كوروناۆيرۋس ىندەتى پ ت ر ارقىلى راستالدى. قازىرگى ۋاقىتتا ەلىمىزدە كوروناۆيرۋستان 9961 ادام ەمدەلۋدە. ولاردىڭ اراسىندا 464 بالا بار. جالپى ناۋقاستاردىڭ اراسىندا 228 ادامنىڭ دەنساۋلىق جاعدايى ناشار. سونىڭ ىشىندە 22 ناۋقاستىڭ جاعدايى قاتتى اۋىر دەپ باعالانىپ وتىر. 23 ناۋقاس جاساندى تىنىس الۋ اپپاراتىندا جاتىر.
