ماس كۇيدە قوعام مازاسىن العان تۇركىستاندىق ۇشاقتان قالىپ قويدى
سونداي-اق ول ايىپپۇل تولەۋگە مىندەتتەلدى، دەپ حابارلايدى قازاقپارات ءتىلشىسى. كولىكتەگى پوليتسيا دەپارتامەنتىنىڭ باستىعى وڭال بەكيەۆتىڭ ايتۋىنشا، كەشە شىمكەنت قالاسى اۋەجايىنىڭ قىزمەتكەرى پوليتسياعا حابارلاسىپ، الكوگولگە ماس جولاۋشىنىڭ كۇتۋ زالىندا ءوزىن دورەكى ۇستاپ، بىلاپىت سويلەپ، قوعامدىق ءتارتىپتى بۇزعانىن ايتقان.
وقيعا ورنىنا جەتكەن كولىكتەگى پوليتسيا قىزمەتكەرى ماس جولاۋشىنى سابىرعا شاقىرۋعا تىرىسقانىمەن، ول زاڭعا قايشى ارەكەتىن تىيماي، قوعامدىق ءتارتىپتى بۇزۋىن جالعاستىرعان. بۇزاقى پوليتسەيلەردىڭ زاڭدى تالابىنا باعىنباي، ايعايلاپ سويلەپ، بيلىك وكىلدەرىنە بالاعات سوزدەر ايتقان. تەكسەرۋ بارىسىندا قۇقىق بۇزۋشىنىڭ تۇركىستان وبلىسىنىڭ 37 جاستاعى تۇرعىنى ەكەندىگى انىقتالعان.
«اتالعان ازامات پوليتسيا بولىمشەسىنە جەتكىزىلىپ، ونىڭ ۇستىنەن قر اكىمشىلىك قۇقىق بۇزۋشىلىق تۋرالى كودەكستىڭ 440-بابى 1-تارماعى، 434-بابى 1-تارماعى، 667-بابى 1-تارماعى بويىنشا 3 اكىمشىلىك حاتتاما تولتىرىلدى. ق ر قىلمىستىق كودەكسىنىڭ 378-بابى 1-بولىگىمەن سوتقا دەيىنگى تەرگەۋ باستالدى»، - دەدى پوليتسيا پولكوۆنيگى.
مەديتسينالىق كۋالاندىرۋ قورىتىندىسىنا سايكەس، ازامات الكوگولگە ورتاشا دەڭگەيدە ماس بولعانى انىقتالىپ وتىر.
«وعان قوعامدىق ورىنعا الكوگولگە ماس كۇيدە كەلۋ فاكتىسىمەن 5 ا ە ك مولشەرىندە ايىپپۇل سالىندى. ەكى اكىمشىلىك باپقا قاتىستى ماتەريالدار پروتسەسسۋالدىق شەشىم قابىلداۋ ءۇشىن شىمكەنت قالالالىق مامانداندىرىلعان اۋدانارالىق اكىمشىلىك سوتىنا جىبەرىلدى. سونىمەن قاتار بيلىك وكىلىن بالاعاتتاۋ فاكتىسىمەن تەرگەۋ امالدارى جۇرگىزىلىپ جاتىر»، - دەدى ول.
