حانكولدەگى «ەلەس قىز»: ب ق و پوليتسەيلەرى تەكسەرىس ناتيجەسىن جاريالادى
قاراتوبە اۋدانى حانكول اۋىلىنىڭ تۇرعىندارى الەۋمەتتىك جەلى ارقىلى ەلدى مەكەن ماڭىندا «سارى قىزدىڭ» ەلەسى پايدا بولعانى جونىندە اقپارات تاراتقان بولاتىن.
وسىعان وراي، وبلىستىق پوليتسيا دەپارتامەنتى باسشىسىنىڭ تاپسىرماسىنا سايكەس قاراتوبە اۋداندىق پوليتسيا ءبولىمىنىڭ قىزمەتكەرلەرى تەكسەرىس جۇرگىزدى. اۋىلعا باراتىن بارلىق جولدار ۆيدەوعا ءتۇسىرىلدى. انىقتالعانداي، ەلەس قىزعا بايلانىستى تارالعان ۆيدەوداعىداي جول مەن اعاشتار اتالعان اۋىل اۋماعىندا جوق. سونىمەن قاتار پوليتسيا قىزمەتكەرلەرى اۋىل تۇرعىندارىمەن كەزدەسىپ، ساۋالناما جۇرگىزدى. ۆيدەودا كورسەتىلگەن دەرەكتى ەشقايسىسى راستامادى.
ءبارى دە مۇنداي ەلەستى كورمەگەنىن، وزدەرىن ەشكىم مازالاماعانىن ايتادى. سونداي-اق اتالعان ۆيدەونىڭ قازاقستانعا ەش قاتىسى جوق ەكەندىگى جونىندە اقپارات بار. بۇل ۆيدەو 2019 -جىلى رەسەيدىڭ الەۋمەتتىك جەلىلەرىندە الدەنەشە رەت تارالىپ، وندا ءتۇرلى ايماقتار كورسەتىلگەن. قاراتوبە اۋدانى پوليتسيا ءبولىمىنىڭ باستىعى مىندەتىن اتقارۋشى مامان يساعاليەۆتىڭ ايتۋىنشا، ۆيدەونىڭ حانكول ەلدى مەكەنىنە ەش قاتىسى جوق. ول وسىدان 11 اي بۇرىن Youtube كانالىنا اندرەيەۆيچ دەگەن لاقاپ ەسىممەن جۇكتەلگەنى انىقتالدى.
«حانكولدەن سامارا- شىمكەنت كۇرە جولىنا دەيىنگى جول تەكسەرىلدى. جول جيەگىندە تىعىز ورنالاسقان تال- تەرەكتىڭ جوقتىعى دا ۆيدەونىڭ جالعان ەكەندىگىن دالەلدەيدى. سوندىقتان اۋدان جانە اۋىل تۇرعىندارىنان جالعان اقپاراتقا سەنبەۋدى جانە تاراتپاۋدى وتىنەمىز»، - دەدى م. يساعاليەۆ.
ەسكە سالا كەتەيىك، بۇدان بۇرىن ب ق و اكىمىنىڭ «سارى قىزدىڭ» ەلەسىنە بايلانىستى تۇسىنىك بەرگەنىن، پوليتسەيلەردىڭ اقپاراتتى تەكسەرەتىنىن جازعان بولاتىنبىز.
