ءماجىلىس ءتوراعاسى: «اۋقاتتى بيزنەسمەندەر» سوقىر تيىن تاپقان جوق، ءبارى تەندەر جاعالاپ ءجۇر

ەسكە سالا كەتسەك، پارلامەنت ماجىلىسىندە بۇگىن تۋريستىك قىزمەتكە قاتىستى زاڭ جوباسى قىزۋ تالقىلانعان بولاتىن. جۇمىس بارىسىندا دەپۋتات ارتۋر پلاتونوۆ Kazakh Tourism كومپانياسىنىڭ مەملەكەت پەن بيزنەس اراسىندا دەلدال بولعالى تۇرعانىن ءمالىم ەتكەن ەدى. ارىپتەسىنىڭ ۇسىنىسىن ءماجىلىس ءتوراعاسى نۇرلان نىعماتۋلين قولدادى.

«تۋريستىك قىزمەتتى دامىتۋ تۋرالى زاڭ جوباسىن پايدالانىپ، بيۋدجەت قاراجاتىن جەكە سەكتورعا جاڭاشا قۇيۋدىڭ ەش قاجەتى جوق. بۇل جەردە سىزدەر ماعىنانى وزگەرتە سالعانسىزدار (اقتوتى رايىمقۇلوۆاعا قاراتا). بيزنەستى قولداۋ دەگەن بيۋدجەت قاراجاتىن تىقپالاي بەرۋمەن شەكتەلمەۋى كەرەك. كومپانيالاردى قۇرىپ تاستاعان سالالار جەتەرلىك. ءجۇر انە، وزدەرىن «اۋقاتتى بيزنەسمەن» سانايدى، ال قاراساڭ ونىڭ بارلىق بيزنەسى مەملەكەتتىك جانە كۆازيمەملەكەتتىك تەندەرگە بايلانعان. سوقىر تيىن ينۆەستيتسيا، ءبىر تەحنولوگيا دا الىپ كەلگەن جوق. بيداي شوقىپ ءجۇر، ايتەۋىر. مۇندا دا ۇلتتىق كومپانيا قۇرىپ، بيۋدجەت قاراجاتىن سالامىز. ال ول بولسا تاعى دا تۋريستىك سالاعا قاراجات تىقپالاۋمەن اينالىسادى. تۇسىنىكتىڭ ءوزى باسقاشا بولۋى كەرەك»، - دەدى نۇرلان نىعماتۋلين ءماجىلىس وتىرىسىندا.

ءماجىلىس ءتوراعاسى مادەنيەت جانە سپورت مينيسترىنە بۇل تۇرعىدا زاڭنامالىق تۇرعىدا تۋريستىك سالاداعى بيزنەسمەندەرگە جايلى جاعداي جاسالۋى كەرەكتىگىن ەسكەرتتى.

«ول دەگەنىمىز - زامانعا ساي ينفراقۇرىلىم، ادىلەتتى سالىق جۇيەسى. ەڭ ءبىرىنشى كەزەكتە، مىنە وسى ماسەلەلەردى رەتتەپ الۋىمىز كەرەك. البەتتە، ۇلتتىق كومپانيالار ارقىلى بيۋدجەتتى جەكە سەكتورعا بەرە سالساق، كەيىن ەسەپ بەرە سالۋ سىزدەرگە تۇككە تۇرمايدى. ودان دا كۇردەلى بولسا دا، دۇرىسى - جايلى جاعداي جاساۋ. باعانا ايتقانىمىزداي، ءبىزدىڭ كومپانيالاردىڭ باسەكەگە قابىلەتىن ارتتىرۋ كەرەك. ول ءۇشىن تۋريستىك كومپانيالاردى جيناپ، تىڭداپ، ولاردىڭ پروبلەماسى قانداي ەكەنىن ۇعىنىپ الۋ كەرەك. مادەنيەت جانە سپورت مينيسترلىگى وسى شارۋامەن اينالىسۋى ءتيىس»، - دەدى ول.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى