كوروناۆيرۋس: د د س ۇ قىزمەتكەرلەرىنىڭ اراسىندا اۋرۋدىڭ ءورشۋى جانە اۋىز شايۋدىڭ پايداسى
ۇيىم باسشىسى بولسا، ۆاكتسينانىڭ جىلدام اسەرىنە سەنبەيتىنىن جەتكىزدى.
وسى ارادا، كارديفف ۋنيۆەرسيتەتىنىڭ عالىمدارى اۋىز شايۋعا ارنالعان جالپىعا ورتاق زاتتار سىلەكەيدەگى كوروناۆيرۋستى ولتىرەتىنىن بايقادى، دەپ حابارلايدى قازاقپارات BBC اگەنتتىگىنە سىلتەمە جاساپ.
د د س ۇ جەنيەۆا قالاسىنداعى شتاب-پاتەردە ءوز قىزمەتكەرلەرىنىڭ اراسىندا COVID-19 ۆيرۋسىنا شالدىققان 65 ادامنىڭ انىقتالعانىن مالىمدەدى. سونىمەن بىرگە، ۇيىم باسشىسى تەدروس ادحان گەبرەيەسۋس الەمدەگى كوپ ادام ءۇمىت ارتىپ وتىرعان ۆاكتسينا پاندەميانى تۇبىمەن جويمايتىنىن مالىمدەدى.
ونىڭ پىكىرىنشە، ۆاكتسينا جىلدام اسەر ەتپەيدى. گەبرەيەسۋستىڭ ايتۋىنشا، ۆاكتسينا ەڭ الدىمەن مەديتسينا قىزمەتكەرلەرى، الەۋمەتتىك قىزمەتكەرلەر، وقىتۋشىلار جانە قاۋىپ توبىنا كىرەتىن ادامدارعا ەگىلەدى.
وسى ارالىقتا ۆيرۋس ەمىن-ەركىن تاراي بەرەدى. سوندىقتان ۆاكتسينا پايدا بولعانىمەن، شەكتەۋ شارالارى ءالى ۇزاق ۋاقىت قولدانىلۋى ءتيىس. ەۋروپا شارالاردى قاتاڭداتتى يسپانيا سوتتارىنا ەل بيلىگى مەن دەنساۋلىق ساقتاۋ سالاسىنا كوپتەگەن شاعىم تۇسىرىلگەن. شاعىمدانۋشىلار مەملەكەتتىك قۇرىلىمداردى كوروناۆيرۋسپەن كۇرەس جۇرگىزۋ كەزىندە باسقا دا اۋىر دەرتتەرگە، كوبىنە ونكولوگياعا شالدىققان ادامداردىڭ مەديتسينالىق كومەكسىز قالعانى ءۇشىن ايىپتاپ وتىر.
پاندەميا باستالعاندا يسپانيا ەۋروپا ەلدەرى اراسىندا ۆيرۋستان ەڭ كوپ زارداپ شەككەن ەلدەردىڭ ءبىرى بولدى. دجون حوپكينس ۋنيۆەرسيتەتىنىڭ مالىمەتىنشە، ەلدە اۋرۋعا شالدىققان ادامداردىڭ جالپى سانى 1,5 ميلليونعا جۋىقتاعان، ال قايتىس بولعاندار سانى - 41,2 مىڭ ادام.
گەرمانيا كانتسلەرى انگەلا مەركەل 16 فەدەرالدىق ايماقتىڭ باسشىلارى ونىڭ ەپيدەميانى ۇستاپ تۇرۋ بويىنشا بۇدان دا قاتاڭ شارالار ەنگىزۋ ارەكەتتەرىنە قارسىلىق تانىتىپ وتىرعانىن مالىمدەدى.
لوكداۋندى قاتاڭداتۋ ماسەلەسىن تالقىلاۋ قايتادان كەيىنگە قالدىرىلعان، بۇل جولى 25- قاراشاعا دەيىن. بۇل كوبىنە الداعى قىس مەزگىلىنە بايلانىستى بولدى. كەيبىر ايماقتىڭ بيلىگى تاۋ شاڭعىسى كۋرورتتارى مەن شانا جولدارىن جابۋ ونسىز دا زارداپ شەككەن ەكونوميكاعا تاعى سوققى تيگىزەتىنىنەن قاۋىپتەنىپ وتىر. سونداي-اق مەركەل مەكتەپتەردە مىندەتتى تۇردە ماسكا تاعۋدى ەنگىزىپ، سىنىپتارداعى وقۋشىلار سانىن قىسقارتۋدى ۇسىنعان.
كانتسلەردى بارىنەن بۇرىن بەرليندەگى جاعداي الاڭداتىپ وتىر. نەمىس بيلىگىنىڭ ايتۋىنشا، ەپيدەميانىڭ ەكىنشى تولقىنىن بارا-بارا باقىلاۋعا الۋ مۇمكىن بولدى، ءبىراق اۋرۋعا شالدىعۋدىڭ تاۋلىك سايىنعى كورسەتكىشتەرى ءالى دە جوعارى بولىپ، ۇرەي تۋدىرىپ وتىر.
اۆستريادا سەيسەنبىدەن باستاپ 6- جەلتوقسانعا دەيىن مەكتەپتەر مەن ازىق-تۇلىك ساتپايتىن دۇكەندەر جابىلۋدا.
وتكەن دەمالىس كۇندەرى ەلدىڭ فەدەرالدىق كانتسلەرى سەباستيان كۋرتس بۇل شارا ەپيدەميانىڭ ەكىنشى تولقىنىن ۇستاپ قالۋعا قاجەتتى شارا ەكەنىن مالىمدەگەن.
ۇلى بريتانيا ۇكىمەتى ەلدىڭ حالىقارالىق گۋمانيتارلىق كومەككە جۇمسايتىن شىعىندارىن ۋاقىتشا قىسقارتۋ مۇمكىندىگىن قاراستىرىپ وتىر. وسى ارادا، شوتلانديا ۇكىمەتى سەيسەنبى كۇنى ەلدىڭ باتىسىنداعى 11 اۋداندا، سونىڭ ىشىندە گلازگو قالاسىندا شەكتەۋ شارالارىنىڭ قاتاڭداتىلاتىنىن جاريالادى.
جۇمادان باستاپ وندا ازىق-تۇلىك ساتپايتىن دۇكەندەر، ىشىمدىك ىشەتىن ورىندار، سپورتتىق زالدار جابىلادى.
ا ق ش - اۋرۋعا شالدىققاندار مەن ودان قايتىس بولعاندار سانى جاعىنان الەمدە كوش باستاپ وتىر (تيىسىنشە 11,2 ميلليون ادام جانە 247,8 مىڭ ادام). وتكەن اپتانىڭ ىشىندە عانا ەلدە تاعى ءبىر ميلليون ادام ۆيرۋسقا شالدىققان.
وسى اپتادا امەريكا بيلىگى ەڭ قاتتى زارداپ شەككەن شتاتتارعا انتيدەنەلەردى انىقتايتىن 7 ميلليوننان استام تەستىنى جىبەرەدى، ولار ءبىرىنشى كەزەكتە حوسپيستار، قارتتار ۇيلەرى جانە وزگە دە الەۋمەتتىك وسال توپتاردىڭ اراسىندا ۇيلەستىرىلەدى.
جەرگىلىكتى بيلىك تۇرعىنداردى العىس ايتۋ كۇنىن كوپشىلىك اراسىندا اتاپ وتۋدەن باس تارتۋىن سۇراپ وتىر. اۋىز شايۋعا ارنالعان سۇيىقتىق كوروناۆيرۋستى ولتىرەدى بريتانيانىڭ كارديفف ۋنيۆەرسيتەتىندە وتكىزىلگەن جاڭا زەرتتەۋ اۋىز شايۋعا ارنالعان كوپشىلىككە قولجەتىمدى سۇيىقتىقتاردىڭ ولاردى قولدانعاننان كەيىن 30 سەكۋند ىشىندە ۆيرۋستى ولتىرە الاتىنىن كورسەتتى.
زەرتحانالىق زەرتتەۋ اۋىز قۋىسىن شايۋعا ارنالعان سۇيىقتىقتىڭ سىلەكەيدەگى كوروناۆيرۋستى ولتىرە الاتىنىن كورسەتتى.
سونىمەن بىرگە ونىڭ ەمدىك قۇرال رەتىندە تيىمدىلىگىنىڭ دالەلدەرى دە جوق، سەبەبى ول تىنىس الۋ جولدارىنا دا، وكپەگە دە بارمايدى.
