ايجان ەسماعامبەتوۆا كەڭ وڭىرلەردە كوروناۆيرۋس فاكتىلەرىن جاسىرۋعا قاتىستى پىكىر ءبىلدىردى
«كەشە مەملەكەت باسشىسى كوروناۆيرۋس بويىنشا رەسمي ستاتيستيكانى جاساۋعا قاتىستى پروبلەمالار بار ەكەنىن ايتتى. مۇنىڭ سۋبەكتيۆتى جانە وبەكتيۆتى سەبەپتەرى بار. تەستىلەۋ تۋرالى ايتاتىن بولساق، ونىڭ قۋاتى ۇنەمى ارتىپ كەلەدى. ەگەر جازدا تەستەن وتكىزۋ قۋاتى شامامەن 40 مىڭ جانە 56 زەرتحانانى عانا قامتىعان بولسا، بۇگىندە 140 زەرتحانادا 80 مىڭعا جۋىق تەستىلەۋ وتكىزىلەدى»، - دەيدى سانيتارلىق- ەپيدەميولوگيالىق باقىلاۋ كوميتەتىنىڭ ءتورايىمى ايجان ەسماعامبەتوۆا.
ونىڭ ايتۋىنشا، ەپيدەميولوگيالىق تەرگەۋ جۇرگىزۋ ءۇشىن سىنامانى اۋماقتىق دەپارتامەنتتەرگە بەرۋ وتە ماڭىزدى فاكتور سانالادى. بۇگىنگى كۇنى ايماقتارعا جۇرگىزىلگەن مونيتورينگ بارلىق زەرتحانادا اۋماقتىق زەرتحانالاردىڭ ينتەگراتسيالانعان جۇيەسى جوق ەكەنىن كورسەتتى. تيىسىنشە، وڭ زەرتتەۋلەردىڭ ناتيجەسى ۋاقىتىلى بەرىلمەيدى.
«ياعني، ەسكەرىلمەگەن جاعدايلار بولدى. ءار جاعداي بويىنشا مىندەتتى تۇردە شۇعىل حابارلاما جىبەرىلگەن فاكتىلەر ءالى دە بار. مونيتورينگ ساپارى كەزىندە ءبىز بۇل شۇعىل حابارلاماعا ەپيدەميولوگيالىق تەرگەۋ جۇرگىزۋ ءۇشىن ءبىزدىڭ اۋماقتىق دەپارتامەنتكە ءاردايىم جىبەرىلىپ وتىرماعان فاكتىلەر بولعانىن دا كوردىك»، - دەيدى ول.
ەسكە سالا كەتەيىك، كەشە كوروناۆيرۋس ىندەتىنىڭ تارالۋىنا قارسى ءىس-قيمىل جونىندەگى كەڭەستە قاسىم-جومارت توقايەۆ كەي وڭىرلەردەگى كوروناۆيرۋس جۇقتىرۋ فاكتىلەرىن جاسىرۋ جاعدايلارىن سىنعا العان بولاتىن.
«ءبىرقاتار وبلىستاردا كوروناۆيرۋس ىندەتىنە قاتىستى جاڭا جاعدايلاردى جاسىرۋ دەرەكتەرى انىقتالدى. اڭگىمە شىعىس قازاقستان، سولتۇستىك قازاقستان، پاۆلودار، اقمولا، قوستاناي جانە باسقا دا وبلىستار جايىندا بولىپ وتىر. وتىرىكتى شىنداي سويلەتۋ اسا قاۋىپتى قۇبىلىس ەكەنىن ءتۇسىنۋ كەرەك» دەگەن بولاتىن مەملەكەت باسشىسى.
