بەيسەن قۇرانبەكتىڭ ماراپاتىن العان جارى گۇلميرا جۋرناليست ايتقان ەستەلىكتى تەبىرەنە جەتكىزدى - ۆيدەو
جۋرناليستىڭ اياۋلى جارى گۇلميرا قادىر قىزى ءسوز الىپ، بەيسەن قۇرانبەكتىڭ كەزىندە ايتقان ەستەلىكتەرىن تەبىرەنە جەتكىزدى جانە قيىن ساتتە قولداۋ كورسەتكەن ەل ازاماتتارىنا العىسىن ءبىلدىردى.
- ارمىسىزدار، اعايىن! بەيسەن ءبىر سۇحباتىندا جۋرناليست قانداي بولۋى كەرەك جانە ونىڭ ەڭ جوعارى ناگراداسى قانداي دەگەن سۇراققا بىلاي دەپ جاۋاپ بەرىپتى. جاقسى جازۋ، ادەمى سويلەۋدى ۇيرەنىپ الۋعا بولادى، ۋاقىت وتە كەلە تاجىريبە مەن شەبەرلىك تە شىڭدالادى. ەڭ باستىسى جۋرناليست بەي- جاي، ەنجار، بەيقام بولماۋى كەرەك. ول حالىقتىڭ جاناشىرى بولۋى ءتيىس. جانە جۋرناليست ءۇشىن ەڭ بيىك ماراپات ول حالىقتىڭ ىقىلاسى. ەگەر سەن جاساعان سيۋجەت، دايىنداعان حابار ءبىر ادامعا بولسا دا پايداسى تيسە، ءتۇيىندى ماسەلەسىن شەشۋگە كومەكتەسسە، وندا مىندەتىڭ ورىندالعانى، ەڭبەگىڭنىڭ اقتالعانى دەگەن ەكەن.
بەيسەكەڭ سىرقاتتانىپ جاتقاندا ونىڭ ادال دوستارى، ارىپتەستەرى، ءومىر جولىنداعى ۇستازدارى، ءوزى باۋلىعان شاكىرتتەرى جان-جاعىنان قاۋمالاپ كومەكتەسىپ ءجۇردى. ول كىسى ومىردەن وتكەن سوڭ دا سول دەمەۋدى، قولداۋدى ءالى سەزىپ كەلەمىز. ەلباسىمىز بەن پرەزيدەنتىمىز باستاعان ەلىمىزدىڭ يگى جاقسىلارى كوڭىلدەرىن ءبىلدىرىپ جاتىر، اقپارات جانە قوعامدىق دامۋ مينيسترلىگى «جىگەر» سىيلىعىن تاعايىندادى، الماتى وبلىسىنىڭ اكىمدىگى «جەتىسۋ» تەلەارناسىنىڭ تورىنەن مۋزەي اشۋ يدەياسىنا قولداۋ كورسەتتى. بۇگىنگى وزدەرىڭىز تابىستاپ وتىرعان «پارلامەنت ءسوزى» ماراپاتتارىڭىز دا ۇلتىنىڭ سۇيىكتى ۇلىنا كورسەتكەن ىستىق ىقىلاسى دەپ بىلەمىز جانە سول پەيىلدەرىڭىز ءۇشىن وتباسىمىزدىڭ، اۋلەتىمىزدىڭ اتىنان جانە «جەتىسۋ» تەلەارناسى مەن Qareket ۇجىمىنىڭ اتىنان العىسىمىزدى بىلدىرەمىن - دەدى گۇلميرا زەرباي.
