قازاقستاندىق عالىمدار كۇرىش قاۋىزىنان ەمدىك ءدارى ويلاپ تاپتى
جاڭا ءونىم اعزاداعى ۋلى زاتتاردى وزىنە ءسىڭىرىپ قانا قويماي، ادامنىڭ يممۋندىق جۇيەسىنە وڭ ىقپال ەتەدى. بۇل قازىرگىدەي پاندەميا ۋاقىتىندا اسا قاجەت دەيدى عالىمدار. وتاندىق سوربەنتتىك ءونىم وسى شاعىن زەرتحانادا جاسالعان. ءوندىرىستىڭ ءار كەزەڭىن عالىمدار ءجىتى باقىلايدى. بىرەگەي پرەپاراتتى جاساۋ ءۇشىن كەم دەگەندە ءبىر اپتا ۋاقىت كەرەك. شيكىزات رەتىندە باقاناس وڭىرىندە وسەتىن كۇرىشتىڭ قاۋىزى پايدالانىلعان. سەبەبى كۇرىشتىڭ ءدال وسى سۇرپىنىڭ قۇرامى ەرەكشە دەيدى عالىمدار.
سەستاگەر اقنازاروۆ، جوبا جەتەكشىسى:
- كۇرىشتىڭ قاۋىزىنىڭ ءوزى سوربەنت بولىپ سانالادى. ول كۇرىشتىڭ ءدانىن سىرتقى ورتانىڭ زيانىنان قورعايدى. ونىڭ ەرەكشەلىگى - قۇرامىندا سوربەنت قىزمەتىن اتقاراتىن كومىرتەگى بار. بۇعان قوسا، قۇرامىنداعى كرەمني ديوكسيدى ونىڭ قۇندىلىعىن ارتتىرادى. بۇل ەلەمەنتتىڭ ادام اعزاسىنا پايداسى زور. بۇل ەكى ماڭىزدى ەلەمەنتتى الۋ ءۇشىن كۇرىشتىڭ قاۋىزى 6 كەزەڭنەن تۇراتىن وڭدەۋدەن وتەدى. ەڭ كۇردەلىسى - العاشقى ەكى كەزەڭ. الدىمەن كۇرىش قاۋىزىنداعى بۇكىل ورگانيكالىق زاتتاردىڭ بارلىعى ءبولىنىپ الىنىپ، قۇرامىندا كومىرتەگى مەن كرەمني ديوكسيدى عانا قالادى.
قالامپىر بەكسەيىتوۆا، زەرتحانا مەڭگەرۋشىسى:
- الەمدەگى بارلىق سوربەنتتەر تەك قانا كرەمنيدەن نەمەسە تەك قانا كومىرتەكتەن تۇرادى. ال ءبىزدىڭ پرەپاراتىمىزدىڭ نەگىزگى ەرەكشەلىگى قۇرامىندا 40 پروتسەنت كومىرتەگى مەن 60 پروتسەنت ديوكسيد كرەمنييدان تۇرادى. قۇرامىندا 100 پايىز تابيعي تازا ءونىم، ەشقانداي قوسپا قوسپايمىز، حيميالىق قوسپالار، اروماتيزاتورلار، بوياعىشتار بولمايدى. قازاقستاندىق عالىمداردىڭ عىلىمي جاڭالىعىنا شەتەلدىكتەر دە قىزىعۋشىلىق تانىتۋدا. قازىرگى ۋاقىتتا جوبا اۆتورلارى جاڭا پرەپاراتتى جاساپ شىعارۋعا شەتەلدىك جانە قازاقستاندىق پاتەنتتى يەلەنگەن.
سەستاگەر اقنازاروۆ، جوبا جەتەكشىسى:
- يممۋنيتەتتى كوتەرەدى، اعزانى تازالايدى. ءارى ول باسقا پرەپاراتتار سەكىلدى ەمەس. مىسالى، كەيبىر بالاما ونىمدەر ۋلى زاتتارمەن قوسا اعزاداعى پايدالى زاتتاردى دا شايىپ كەتىپ جاتادى. ال كۇرىش قاۋىزىنىڭ قۇرامىنداعى كرەمنيي ديوكسيدى ادام اعزاسىن قالىپقا كەلتىرەدى. ايتا كەتۋ كەرەك، كۇرىش قاۋىزىنىڭ قاندى تازالاۋدا دا پايداسى زور. مۇنى «جالىن» عىلىمي- وندىرىستىك ورتالىعىنىڭ ماماندارى زەرتتەپ، عىلىمي تۇردە دالەلدەگەن.
