ۋچاسكەلىك ينسپەكتوردىڭ ءبىر كۇنى
قۇقىق قورعاۋ ورگاندارىنىڭ ءيميدجىن حالىقپەن تىعىز جۇمىس ىستەيتىن وسى ساقشىلاردىڭ قالىپتاستىراتىندىعى انىق. بۇل رەتتە مەملەكەت باسشىسى قاسىم-جومارت توقايەۆ «جۇرتقا جاقىن پوليتسيا» قاعيداسى بويىنشا ۋچاسكەلىك ينسپەكتورلاردىڭ جۇمىسىن رەفورمالاۋدى تاپسىرعان بولاتىن. بۇگىنگى ءبىزدىڭ ماقالامىز ەڭبەكتىڭ جالاۋىن جىقپاي، تۇرعىنداردىڭ قاۋىپسىزدىگىن قاداعالاۋ ءۇشىن التىن ۋاقىتىن سارپ ەتىپ جۇرگەن ينسپەكتوردىڭ ءبىر كۇنى جايلى بولماق. كەيىپكەرىمىز دانيار جەتىبايەۆ وسكەمەن قالالىق پوليتسيا باسقارماسىنىڭ سول جاعالاۋ پوليتسيا بولىمشەسىندە ۋچاسكەلىك ينسپەكتور بولىپ جۇمىس ىستەيدى. اسكەري شەنى - پوليتسيا مويورى.
№20-ۋچاسكەلىك پوليتسيا پۋنكتىندەگى 9 ساقشىنىڭ قاراۋىنداعى ايماق - 22،23-شاعىن اۋداندار، جاڭا- احمەر كەنتى، احمەر، نوۆوياۆلەنكو، شىعىس، پرۋدحوز اۋىلدارى جانە 45 ساياجاي قاۋىمداستىعى.
جالپى كولەمى 38 مىڭ شارشى مەتردى قۇرايتىن اكىمشىلىك اۋماقتا 25450 ادام تۇرادى. مۇندا 57 كوپقاباتتى تۇرعىن ءۇي، 5647 جەر ءۇي، 55 دۇكەن، 1 بازار، 4 مەكتەپ پەن 4 دەنساۋلىق ساقتاۋ مەكەمەسى بار.
«1979 -جىلى زايسان قالاسىندا دۇنيە ەسىگىن اشتىم. بالالىق شاعىم وتكەن جەر - تارباعاتاي اۋدانى، تۇعىل اۋىلى. اياۋلى انام «ۇلكەندى سىيلا، بىرەۋدىڭ الا ءجىبىن اتتاما، ادامدارعا شاماڭ كەلگەنشە كومەكتەسۋگە تىرىس» دەپ تاربيەلەدى. وسە كەلە پوليتسيا قىزمەتكەرى بولامىن دەپ شەشتىم. 1999 -جىلدان بەرى ۋچاسكەلىك ينسپەكتور قىزمەتىن اتقارىپ كەلەمىن. وسى سالادا جۇرگەنىمە 21 -جىلدام استام ۋاقىت ءوتىپتى»، - دەيدى دانيار جەتىبايەۆ.
ونىڭ ايتۋىنشا، جۇمىستىڭ قىزىعى دا قيىنشىلىعى قاتار جۇرەدى. حالىققا قولۇشىن سوزىپ ساۋاپتى ءىس جاساعانىمەن، وتباسىن، بالا- شاعاسىن سيرەك كورەدى.
«قۇداي قوسقان قوساعىم مەن مامىقتان جۇمساق، بالدان ءتاتتى كورەتىن ەكى قىزىم بار. كۇنىمىزدىڭ باسىم بولىگى جۇمىستا وتەتىندىكتەن ولاردى ساعىنامىن. ءبىراق بىرەۋگە تيتتەي دە پايدام ءتيىپ، اق جاۋلىقتى اجەلەردىڭ باتاسىن الىپ جاتقاندا بۇل باعىتتى بەكەر تاڭداماعانىما كوزىم جەتەدى. باسىندا جۇبايىم رەنجىپ، وكپە- نازىن بىلدىرەتىن- تۇعىن. ءبىراق ءقازىر تۇسىنىك تانىتىپ، ءاردايىم قولداۋ بىلدىرەدى»، - دەيدى ساقشى.
ەكىنىڭ ءبىرى ۋچاسكەلىك ينسپەكتور بولا المايدى. كوبىسى جۇمىستىڭ اۋىرتپاشىلىعىنا شىداماي، باسقا جاققا اۋىسىپ جاتادى.
كەيىپكەرىمىزدىڭ سوزىنشە، ينسپەكتور بولۋ ءۇشىن اۋەل كەزەككە شىدامدىلىق پەن تاباندىلىق قاجەت. ودان كەيىن حالىقپەن سويلەسە ءبىلىپ، ءارتۇرلى جاعدايلاردا دۇرىس شەشىم قابىلداي الۋ كەرەك.
«جاس پوليتسەيلەرگە اركەز تاجىريبەممەن ءبولىسىپ، باعىت- باعدار سىلتەيمىن. قانداي دا ءبىر قيىندىقتارعا تاپ بولىپ جاتسا اقىلىمىزدى ايتامىز. وسى رەتتە، پرەزيدەنتىمىز قاسىم- جومارت كەمەل ۇلىنىڭ بىزگە كوڭىل ءبولىپ، قولداۋ كورسەتىپ جاتقانى قۋانتادى. ءبىر تىلەگىمىز - ۋچاسكەلىك ينسپەكتورلاردىڭ شتاتى ارتتىرىلسا. سەبەبى قازىر جەر- جەردە حالىق سانى كوبەيىپ، ينسپەكتورلاردىڭ جۇكتەمەسى اۋىرلاي تۇسۋدە»، - دەيدى دانيار جەتىبايەۆ.
قازاقپارات ءتىلشىسى ۋچاسكەلىك ينسپەكتورمەن ءبىر كۇن بويى بىرگە ءجۇرىپ، جۇمىستىڭ شىنىمەندە اۋىرلىعىن سەزىندى. قاۋىرت قىزمەت ساعات 08.00 دە باستالادى. سول جاعالاۋ پوليتسيا بولىمشەسىنە كەلگەن كەيىپكەرىمىز باسشىدان پارمەن الدى. بۇگىنگىنىڭ نەگىزگى تاپسىرماسى - «ۋچاسكە» جەدەل الدىن الۋ شاراسى بويىنشا تۇرعىن ۇيلەردى ارالاۋ، حالىقتان سۇراۋ قاعاز جيناۋ، دۇكەندەر مەن ءدارىحانالارداعى ماسكا رەجيمىن تەكسەرۋ. ءسويتىپ، ۋچاسكەلىك ينسپەكتور ءوز اكىمشىلىك اۋماعىنداعى تۇرعىن ۇيلەردى ارالاۋعا كوشتى.
ءار ۇيدە قانشا ادام تۇرىپ جاتقانىن ءجىتى تەكسەردى. جەكە كۋالىكتەگى ج س ن-دى السا جەتكىلىكتى، قىزمەتتىك پلانشەت ارقىلى سول كىسىنىڭ وسى پاتەردە تىركەۋدە بار- جوعىن بىلە الادى. ماسەلەن، تەكسەرۋ بارىسىندا وپەراتيۆنايا كوشەسىندەگى 29-ءۇيدىڭ تۇرعىنى تىركەۋگە تۇرماعاندىعى انىقتالدى. وعان ق ر ا ق ب ت ك-نىڭ 492-بابى، 1-بولىگى بويىنشا ەسكەرتۋ بەرىلدى. ەندى بۇل ازامات 10 كۇن ىشىندە تۇرعىلىقتى مەكەنجايى بويىنشا تىركەۋگە تۇرماسا ايىپپۇل تولەۋگە مىندەتتەلەدى.
13.00 گە دەيىن ۇيلەردى ارالاپ بولعان سوڭ تۇسكى اس ۋاقىتى. اۋقاتتانىپ العاننان كەيىن ۋچاسكەلىك ينسپەكتور دۇكەندەر مەن ءدارىحانالارداعى ماسكا رەجيمىنىڭ ساقتالۋىن، تاۋار باعالارىنىڭ بەكىتىلگەن شەكتەن اسپاۋىن تەكسەرۋگە كىرىستى.
بۇل كۇندە ەشقانداي زاڭبۇزۋشىلىق انىقتالمادى. ساعات 16.00 دە ناركوپريتونداردى تەكسەرۋگە جول تارتتىق. №20-ۋچاسكەلىك پوليتسيا پۋنكتىنىڭ اكىمشىلىك اۋماعىندا 2 ناركوپريتون تىركەلگەن. سونىڭ بىرىندە تۇرىپ جاتقان ەر ادام ءبىز تەكسەرۋگە كەلگەندە ەسىكتى بىردەن اشپادى. كورشىلەرىنەن سۇراستىرعاندا - ونىڭ كەشە ىشىمدىك ءىشىپ الىپ، تۇرعىنداردىڭ مازاسىن قاشىرعانى بەلگىلى بولدى. ەسىكتى 5 مينۋت بويى توقتاۋسىز قاققاندا ىشتەن ايتەۋىر تىپىرلاعان دىبىس ەستىلدى. ەسىكتى اشقان ەركەك پوليتسەيدى كورگەندە ابدىراپ قالدى.
«بۇل ازامات وسىدان ءبىراز ۋاقىت بۇرىن 3 اي بويى ىشىمدىكتەن ءماجبۇرلى تۇردە ەمدەلگەن. الايدا سوعان قاراماستان تاعى دا اشى سۋدان ۇرتتاپ الىپتى. ەندى ونىڭ ءىسى الدىن الۋ كەڭەسىنە جىبەرىلەدى. ارى قاراي شەشىمدى سولار شىعارادى»، - دەدى دانيار تۇسىپبەك ۇلى.
ۋچاسكەلىك ينسپەكتورعا شىنايى ريزاشىلىعىن بىلدىرگەن جانداردىڭ ءبىرى - نينا احرينەنكو. 1941 -جىلعى قارت كىسىنىڭ نەمەرەسى ەسىرىك سۋدان ەسى كەتكەنى سونشا ايتقاندى مۇلدە تىڭداماي، ۇيدە ىلعي جانجال شىعاراتىن-تۇعىن. سابىر سۋى سارقىلعان زەينەتكەر پوليتسياعا قوڭىراۋ شالعان. دانيار جەتىبايەۆ ارىزدى قابىلداپ، ەر ادامدى اكىمشىلىك جاۋاپكەرشىلىككە تارتتى.
دەسە دە سوعان قاراماستان ول ينسپەكتوردىڭ سوزىنە قۇلاق اسپاي، تاعى دا اراق ىشە باستاعان. سودان كەيىن اجەسىنىڭ وتىنىشىمەن نەمەرەسى 6 ايعا ىشىمدىكتەن ءماجبۇرلى تۇردە ەمدەلۋگە جىبەرىلدى. قازىردە ءتۇزۋ جولعا تۇسكەن ول جامان ادەتتەردەن بويىن اۋلاق ۇستاۋدا.
«دانيار بالاما مىڭ العىس! الگىنى تۇزەيمىن دەپ قانشا ۋاقىتىن كەتىردى. بۇگىندە نەمەرەم جۇمىس ىستەپ، ادال ەڭبەگىمەن ءناپاقاسىن تاۋىپ ءجۇر. بۇل ءوز ىسىنە جاۋاپكەرشىلىكپەن قارايتىن وسىنداي ينسپەكتوردىڭ ارقاسى»، - دەيدى نينا احرينەنكو.
ساعات 18.00-دە تۇرعىنداردى جەكە ماسەلەلەرى بويىنشا قابىلداۋ باستالدى. ۋچاسكەلىك ينسپەكتورعا جۇگىنگەن كلارا سەيتكازينا تەلەفونىنا ايىپپۇل تولەۋ قاجەتتىگى جايلى حابارلامانىڭ نە سەبەپتى كەلگەنىن سۇرادى. دانيار جەتىبايەۆ پلانشەت ارقىلى تەكسەرىپ، وعان ق ر ا ق ب ت ك- ءنىڭ 592-بابى 2-بولىگىمەن ايىپپۇل سالىنعانىن، ەگەر اكىمشىلىك حاتتامامەن كەلىسپەيتىن بولسا نازاربايەۆ كوشەسى، 73/1-مەكەنجايى بويىنشا وبلىستىق م ا ي- عا بارىپ شاعىندانا الاتىندىعىن ءتۇسىندىردى. شارتتى تۇردە باس بوستاندىعىنان ايىرىلعان ازاماتتار قابىلداندى. ولارعا قوعامدىق ورىنداردا، كوشەدە زاڭ تالاپتارىن قاتاڭ ساقتاۋ قاجەتتىگى تۋراسىندا ءتۇسىندىرۋ جۇمىستارى جۇرگىزىلدى.
ساعات 20.00 دە كەيىپكەرىمىز كوشەلەردى پاترۋلدەۋگە شىقتى.
ماسكالىق رەجيمنىڭ ساقتالۋىن، اۋلالاردا، قوعامدىق جەرلەردە ىشىمدىك ىشىلمەۋى تەكسەرىلدى. وسىدان كەيىن پوليتسەي تۇزەتۋ مەكەمەسىنەن مەرزىمىنەن بۇرىن بوساپ شىققانداردىڭ ۇيلەرىن ارالادى.
ساعات 23.30 شاماسىندا بۇگىنگى جۇمىس كۇنى دە اياقتالدى. بۇل قاتىپ قالعان ۋاقىت ەمەس. ۋچاسكەلىك ينسپەكتورلار كەيدە ودان دا جاي قالىپ جاتادى.
ءتىپتى تاڭعا دەيىن تەر توگەتىن ساتتەر دە كەزدەسەدى. ءبىر كۇن بويى دانيار جەتىبايەۆپەن بىرگە ءجۇرىپ، ونىڭ توزىمدىلىگى مەن ەڭبەكقورلىعىنا قايران قالدىق. اڭگىمەلەسە ءجۇرىپ ينسپەكتوردىڭ ازاماتتىق ۇستانىمىنا بەرىكتىگى، قىزمەتىنە دەگەن ادالدىعىن سەزدىك.
سەزدىك تە وسىنداي ساقشىلار باردا حالىقتىڭ قاۋىپسىزدىگىنە الاڭداماۋعا بولاتىنىن تۇيسىندىك.
اۆتور: تالعاتجان مۇحامەتبەك ۇلى
