وزبەكستان ءى ءى م گۇلنارا كاريموۆانىڭ دەنساۋلىعىنا بايلانىستى تۇسىنىكتەمە بەردى
وسىعان دەيىن تاشكەنت تۇبىندەگى ايەلدەر كولونياسىندا جازاسىن وتەپ جاتقان كاريموۆانىڭ دەنساۋلىعى ناشارلاپ بارا جاتقانى تۋرالى حابار تاراعان ەدى. مينيسترلىك وكىلى بۇل اقپاراتتى جوققا شىعاردى.
«گۇلنارا كاريموۆا زانگيوتتاعى ەرەكشە رەجيمدەگى كولونيادا جازاسىن وتەپ جاتىر. ونىڭ دەنساۋلىعى ناشارلادى دەگەن سىبىس نەگىزسىز» دەدى ىشكى ىستەر مينيسترلىگىنىڭ وكىلى ۋميدا ابدۋللايەۆا 12- قاراشا كۇنگى جيىندا.
ابدۋللايەۆانىڭ سوزىنە قاراعاندا، گۇلنارا كاريموۆانىڭ دەنساۋلىعى جايلى «تولىق اقپارات» جاقىن ارادا اقپارات قۇرالدارىنا تاراتىلادى.
قازان ايىندا گۇلنارا كاريموۆانىڭ قىزى يمان كاريموۆا Instagram پاراقشاسىندا تۇرمەدەگى اناسىنىڭ ءحالى ناشارلاپ كەتكەنىن جازعان. ول اناسىنان ەكىجاقتى پنيەۆمونيا انىقتالعانىن حابارلاپ، كولونيانىڭ قاجەتتى دارەجەدە مەديتسينالىق كومەك بەرمەي جاتقانىنا شاعىمدانعان.
«سوڭعى بىرنەشە كۇندە گۇلنارا كاريموۆانىڭ دەنساۋلىعى ناشارلاپ كەتتى. وكپە اۋرۋى ۋشىققاندىقتان قازىر سانيتارلىق بولىمدە جاتىر. وعان مەديتسينالىق كومەك كورسەتپەيدى، كوروناۆيرۋس تەستىنەن وتۋگە رۇقسات بەرمەيدى، ەمدەۋ ءۇشىن ءدارى-دارمەك، اپپاراتتار بەرۋگە دە تىيىم سالىنعان» دەپ جازدى يمان كاريموۆا.
بەيسەنبى كۇنگى باسپا ءسوز ءماسليحاتى كەزىندە بۇرىنعى پرەزيدەنتتىڭ قىزىنىڭ جاعدايىنا توقتالعان سەنات ءتوراعاسى تانزيلا ناربايەۆا «قازىر گەندەرلىك تەڭدىك جايلى ايتىپ وتىرمىز. ايەل بولا ما، ەر ادام بولا ما قىلمىس جاساعانداردىڭ بارلىعى زاڭ الدىندا جاۋاپ بەرۋى ءتيىس» دەدى.
48 جاستاعى گۇلنارا كاريموۆا «مەملەكەت مۇلكىن جىمقىردى»، «سالىق تولەۋدەن جالتاردى» جانە وزگە دە قارجىلىق قىلمىستار جاسادى دەپ ايىپتالىپ، ۇزاق جىلدارعا سوتتالعان. سوڭعى رەت كاريموۆاعا ۇكىم 2020-جىلى 18- ناۋرىزدا شىققان. ول كەزدە قىلمىستىق ىستەر جونىندەگى تاشكەنت قالالىق سوتى كاريموۆانى 13 جىل 4 ايعا باس بوستاندىعىنان ايىردى.
تەرگەۋ ورگاندارىنىڭ مالىمەتىنشە، كاريموۆا 51,1 ميلليارد سوم (شامامەن 5 ميلليون ا ق ش دوللارى) اكتيۆى بار ۇيىمداسقان قىلمىستىق توپتى 12 جىل باسقارعان.
كاريموۆا 2019-جىلدىڭ ناۋرىز ايىنان بەرى تاشكەنت تۇبىندەگى زانگيات كولونياسىندا جازاسىن وتەپ جاتىر.
«ازاتتىق»
