جامبىل وبلىسىندا كورەرمەنسىز رەسپۋبليكالىق اقىندار ايتىسى ءوتتى
ايتىسقا ق ر مادەنيەت قايراتكەرى الىبەك امزە ۇلى، قازاقستان جازۋشىلار وداعىنىڭ مۇشەلەرى، اقىندار ءۇمىت بيتەنوۆا، شىرىن ماماسەرىكوۆا، قايىربەك اسانوۆ، حالىقارالىق «ايتىس اقىندارى مەن جىرشى-تەرمەشىلەرى» وداعىنىڭ جامبىل وبلىسى فيليالى ءتوراعاسى احمەتجان وزبەكوۆ، ايتىسكەر اقىن كۇمىسكۇل سارسەنبايەۆا، جازۋشى سابىرعالي رىسبايەۆ جانە تاۋەلسىز ساراپشى رەتىندە بەلگىلى اقان ايتمۇحامبەت يساقوۆ قازىلىق ەتتى.
جيىرماعا جۋىق اقىن قاتىسىپ، كورەرمەنسىز وتكەن ايتىس ناتيجەسىندە باس جۇلدەنى بايزاق اۋدانىنىڭ تۋماسى التىنكۇل قاسىمبەكوۆا جەڭىپ الدى. ال جۇلدەلى ءبىرىنشى ورىندى تۇركىستان وبلىسىنىڭ اقىنى بەكارىس شويبەكوۆ يەلەندى.
بايزاق اۋدانىنىڭ تاعى ءبىر جاس اقىنى دارحان ءابدىماناپ پەن قىزىلوردا وبلىسىنىڭ اقىنى ەرجەڭىس ابديەۆ ەكىنشى ورىندى ەنشىلەسە، ءۇشىنشى ورىندى تالاستىق نۇرجان ماناتپەك، شىمكەنتتىك نۇرلان ەسەنقۇلوۆ جانە بايزاقتىق راي ءدوڭباي قانجىعالادى.
جامبىل وبلىسى اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ ارنايى تاعايىنداعان جۇلدەسى مويىنقۇمدىق جىر جۇيرىگى عابيت ەسداۋلەتوۆكە بۇيىردى.
ال، وبلىستىق حالىق شىعارماشىلىعىنىڭ ارنايى جۇلدەسى ديدار اپباسوۆقا تابىس ەتىلدى.
ايتا كەتۋ كەرەك، «رۋحاني جاڭعىرۋ» باعدارلاماسى اياسىندا ۇيىمداستىرىلعان ايتىس كارانتين تالاپتارى ساقتالا وتىرىپ، كورەرمەنسىز، تەك قازىلار القاسىنىڭ قاتىسۋىمەن ونلاين جۇيەدە ءوتتى.
