ا ق ش- تا ساياسي ناۋقاننان كەيىنگى تارتىس ءالى دە جالعاسۋدا

سايلاۋ اياقتالسا دا، ناۋقاننان كەيىنگى تارتىس ءالى دە جالعاسۋدا.

- جەلتوقساننىڭ ون تورتىندە 50 شتاتتىڭ اتىنان تاڭدالاتىن ەلەكتورالدى كوللەگيا وكىلدەرى باس قوسىپ، سايلاۋدىڭ رەسمي قورىتىندىسىن جاريالايدى. ال قاڭتاردىڭ 20-سىندا ا ق ش- تىڭ جاڭا سايلانعان پرەزيدەنتى سالتاناتتى تۇردە يناۋگۋراتسياعا قاتىسىپ، مەملەكەت باسشىسى رەتىندە ءوز جۇمىسىنا كىرىسەدى. ادەتتە بۇل داتاعا دەيىن اق ءۇيدىڭ قازىرگى باسشىسى ءوزىنىڭ جەڭىلىسىن مويىنداپ، جەڭىسكە جەتكەن ارىپتەسىن قۇتتىقتاپ بيلىكتى تولىقتاي تاپسىرۋى كەرەك. الايدا بۇل جولى بارلىعى وزگەشە بولۋى مۇمكىن.

ولاي دەپ ايتۋعا بىرنەشە نەگىز بار. ماسەلەن، اق ءۇيدىڭ قازىرگى باسشىسى دونالد ترامپ سايلاۋ قورىتىندىسىمەن مۇلدەم كەلىسپەيتىندىگىن ايتىپ، داۋىس ايىرماشىلىعى ءبىر پروتسەنتكە جەتپەيتىن شتاتتارداعى بيۋللەتەندەردى قايتا ساناۋدى تالاپ ەتۋدە. ونىڭ سوزىنشە، پوشتا ارقىلى جىبەرىلگەن بيۋللەتەندەردىڭ اراسىندا زاڭسىز جولمەن كەلگەندەرى دە بولۋى مۇمكىن. بۇل ءىستىڭ جوعارى سوتقا دەيىن جەتۋىن سەناتتاعى رەسپۋبليكالىق پارتيانىڭ كەيبىر وكىلدەرى دە قولداپ وتىر.

ميتچ ماككوننەلل، سەناتور:

- قازىرگى تاڭدا، بىردە ءبىر شتات رەسمي تۇردە پرەزيدەنتتىك سايالاۋدا جەڭىسكە جەتكەن كانديداتتىڭ ەسىمىن جاريالاعان جوق. دەمەك دەموكراتتاردىڭ جەڭىسىن مويىنداۋ ءالى دە ەرتە. ونىڭ ۇستىنە بىرنەشە شتاتتا داۋىستاردى قايتا ساناۋ باستالىپ كەتتى. جانە دە قازىرگى پرەزيدەنتتىڭ ونداي تالاپ قويۋى زاڭ بويىنشا قاراستىرىلعان. مۇنداي قۇقىق ءبىزدىڭ كونستيتۋتسيامىزبەن بەكىتىلگەن.

ساياسات تانۋشى ەيب نەلسوننىڭ ايتۋىنشا، شتاتتارداعى بيۋللەتەندەردى قايتا ساناعان كۇننىڭ وزىندە سايلاۋدىڭ قورىتىندىسى ايتارلىقتاي وزگەرمەيدى. ويتكەنى ترامپتىڭ سۇراپ وتىرعان دجوردجيا جانە ۋيسكونسين سىندى شتاتتارىنداعى داۋىس ايىرماشىلىعى 34 مىڭنان اسىپ جىعىلادى. دەمەك وسىنشاما ادامنىڭ جاڭىلىسۋى مۇمكىن ەمەس دەيدى ساراپشى.

ەيب نەلسون، ساياسي ساراپشى:

- بيۋللەتەندەردى قايتا ساناۋ ادەتتە سايلاۋ قورىتىندىسىنا كوپ اسەر ەتە قويمايدى. مىسالى 2016 -جىلعى سايلاۋدى الىپ قاراساڭىز، دونالد ترامپ ۆيسكونسين شتاتىنداعى داۋىستاردى قايتا ساناتتى. ناتيجەسىندە ترامپ قوسىمشا 131 عانا داۋىس الا الدى. ال قازىرگى ايىرماشىلىق وتە ۇلكەن.

دونالد ترامپتىڭ سايلاۋ قورىتىندىسىن جوققا شىعارۋى قانشا كۇنگە سوزىلارى بەلگىسىز. الايدا پاندەميا جاعدايىندا بايدەننىڭ جەڭىسىن مويىنداماۋ ەلدەگى جاعدايدى ۋشىقتىرا تۇسەرى انىق. ويتكەنى ىندەتپەن كۇرەسۋگە جۇمسالاتىن ءار كۇن ەسەپكە الىنۋدا دەيدى ساياساتتانۋشى.

ەيب نەلسون، ساياسي ساراپشى:

- دونالد ترامپ ءوزىنىڭ جەڭىلىسىن مويىنداماۋمەن قازىرگى كوۆيد جاعدايىنا دا اسەر ەتىپ وتىر. ويتكەنى دجو بايدەن فەدەرالدى ۇكىمەتتەن قاجەتتى اقپاراتتى الا الماي وتىر. ادەتتە جەڭىلگەن تاراپ ءوزىنىڭ جەڭىلىسىن مويىنداعاننان كەيىن فەدەرالدى ۇكىمەت كۇن تارتىبىنە قاجەتتى وتە ماڭىزدى اقپاراتپەن بولىسە باستايتىن. ءبىراق بۇل جولى ونداي دۇنيەنى بايقاپ وتىرعان جوقپىز.

دەگەنمەن بايدەن قازىردىڭ وزىندە، ا ق ش- تاعى كوۆيد پاندەمياسىمەن كۇرەسۋگە ارنالعان ارنايى جۇمىس توبىن قۇرۋدى تاپسىردى. 2020 -جىلعى پرەزيدەنتتىك سايلاۋدا 150 ميلليوننان استام امەريكالىق داۋىس بەرىپتى. ونىڭ 72 ميلليونعا جۋىعى دونالد ترامپتى قولداسا، 77 ميلليوننان استامى دجو بايدەندى پرەزيدەنت رەتىندە كورگىسى كەلىپتى.

دەموكراتتىق كانديداتقا داۋىس بەرگەندەردىڭ 82 پروتسەنتى ەلدەگى دەنساۋلىق ساقتاۋ مەن كوۆيد پاندەمياسىمەن كۇرەسۋ قاجەتتىلىگىن الدىڭعى ورىنعا قويىپتى.

بيۋللەتەندەردەن بولەك، ا ق ش- تىڭ باس پروكۋرورى ءارى ادىلەت ءمينيسترى ۋيليام بار سايلاۋ بارىسىنداعى الاياقتىققا قاتىستى تەرگەۋ جۇمىستارىن جۇرگىزەتىندىگىن دە مالىمدەدى. الايدا وعان قاتىستى سالماقتى دالەل تابىلماي وتىر.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى