قازاق كينوسىنىڭ «اناسى» - ءامينا
اناسى دا « قىزىلدار كەتىپ، اقتار كەلگەن ۋاقىت، ەسىمدەگىسى بۇل كوكتەم كەزى بولاتىن» دەيدى ەكەن قىزىنىڭ تۋعان كۇنىن سۇراعاندارعا.
اڭىز ادام ءامينانىڭ كۇيەۋى كاماسي دە جەتىمدەر ۇيىندە وسكەن، سوندىقتان بولار، ول دا تۋعان كۇنىن بىلمەيتىن بولىپ شىعادى. وسىلايشا، ول ءوزىنىڭ تۋعان كۇنىن 23-اقپان، ال ايەلى ءامينانىڭ تۋعان كۇنىن 8-ناۋرىز دەپ جازدىرتىپ الادى. ءامينا ءومىرزاقوۆا 1919 -جىلى دۇنيەگە كەلگەن.
ءامينا ناعىز قازاق ايەلىنىڭ بەينەسىن كينوتۋىندىلاردا عانا سومدامادى. ول شىنايى ومىردە دە اسقان قايسار، قايراتتى، باتىر ايەل بولاتىن. ونىڭ كۇيەۋى كاماسي دە اكتەر، الايدا، ول ومىردەن ەرتە وزادى. ءۇش بالامەن جەسىر قالعان ءامينا ەكىنشى قايتارا تۇرمىسقا شىعۋعا قانشا ۇسىنىس بولعانىمەن، بالالارىن جاۋتەڭدەتپەيمىن دەپ، ەشكىمنىڭ ەتەگىنەن ۇستامايدى. «بالالارىن ەرتەڭ ءوسىپ كەتەدى، سەن جالعىز قالاسىڭ عوي، تۇرمىسقا شىقساڭشى» دەپ جانى اشىعاندارعا «بىلجىراماشى» دەپ جاۋاپ بەرەدى ەكەن.
ول كىشكەنتايىنان اسا باتىل بولىپ وسەدى. وتىزىنشى جىلدارداعى اشارشىلىق كەزەڭدە وتباسىنا كومەكتەسىپ، بازاردا ءناپاقا ايىردى. ءامينا وتباسىندا ون ەكى اعايىندى بولعان. ول بازارعا ۇرلانىپ بارىپ، اۋىلدان كەلگەن ات اربالاردان استىق، كارتوپ، بالىق سەكىلدى ازىقتاردى شالبارىنىڭ قالتاسىنا تىعىپ الىپ كەلەتىن بولعان.
مەكتەپ قابىرعاسىندا دا بەلسەندى بولىپ، ونەر ۇيىرمەلەرىنە قاتىسادى. لەنينگرادتىق تەاتر ينستيتۋتىنىڭ وكىلدەرى قازاقستانعا اكتەرلىك فاكۋلتەتتىڭ ۇلتتىق بولىمىنە تالانت ىزدەپ كەلىپ، ون بەس جاستاعى ءامينانى تابادى. ءامينا ءوزىن وقۋعا جىبەرمەيدى دەپ قورىققاننان ءۇي- ىشىنە سول كۇنى لەنينگرادقا وقۋعا قابىلدانعانى تۋرالى ءتىس جارمايدى. الايدا، ەرتەڭىنە ءامينا مەن ونىڭ قۇربىسى بيكەشكە ولاردى وقۋعا قابىلداۋدى جۇرگىزگەن حالەل ەسىمدى جىگىت بيلەت ساتىپ الىپ قويعانىن، جولعا دايىندالۋ كەرەكتىگىن ەسكەرتەدى.
مۇنى ەستىگەن ءامينا اعاسىنىڭ جۇمىس ورنىنا جۇگىرىپ بارىپ، ءوزىنىڭ لەنينگرادقا ءارتىس وقۋىنا كەتەتىندىگىن ايتادى. اعاسى ءامينانىڭ سوزىنە ءمان بەرە قويمايدى. «اعا، مەن كەتەمىن دەيمىن» دەيدى ول تاعى دا. اعاسىنىڭ تاعى دا ۇندەمەگەنىنە قاراپ، ونىڭ جانىنداعى جۇمىستاستارى «ەرعوجين، قارىنداسىڭنىڭ ايتقانىنا قۇلاق سالساڭشى» دەيدى. سول كەزدە عانا الدىنداعى قاعازدان باس كوتەرگەن اعاسى: «ۇيگە قايت» دەيدى جاي عانا.
ءامينانىڭ لەنينگرادقا وقۋعا كەتەمىن دەگەن «حابارىن» اناسى دا شوشىنا قارسى الادى. ال كەشكىلىك جۇمىستان ۇيگە قايتقان اعاسى بولسا، تابالدىرىقتان اتتاي بەرە، اناسىنا: «اپا، سەنىڭ قىزىڭ ەسىنەن اداسقان» دەپ دۇرسە قويا بەرەدى.
الايدا، ەكىنشى اعاسى ءاميناعا بولىسىپ، ونىڭ وقۋعا بارۋىن قولدايدى. ءامينانىڭ جەڭگەلەرى دە ونىڭ ەل، جەر كورگەنىن قالاپ، اناسى مەن ۇلكەن اعاسىن ازعىرا باستايدى. اقىرى ءامينانى بارلىق اۋىل بولىپ جولعا دايىندايدى.
وسىلايشا، ورىس تىلىندە «زدراۆستۆۋي»، «داي حلەبا» دەگەن ەكى- ءۇش اۋىز-اق ءسوز بىلەتىن قازاق قىزى شابادانىن ارقالاپ، لەنينگرادقا جولعا شىعادى.
ول ينستيتۋتقا كەلگەنىندە وعان كەيىن اكتەرلىك شەبەرلىكتەن ءدارىس بەرگەن ۆاسيلي مەركۋريەۆ ءامينانىڭ كىشكەنتايلىعىنا قاراپ، «بۇل جەردى بالاباقشاعا اينالدىرعاندارىڭ نە؟» دەيدى قابىلداۋ كوميسسياسىنا.
ونىڭ وزىنە قاتىستى قاتقىلداۋ بىرنارسە ايتقانىن مەركۋريەۆتىڭ كوزقاراسىنان انىق تۇسىنگەن ءامينا اۋىلىنا قايتارىپ جىبەرەدى ەكەن دەپ ويلاپ جىلاپ جىبەرەدى.
قورقىپ كەتكەن مەركۋريەۆ قىزدى جۇباتۋعا تىرىسادى: «بولار ەندى، بولار... بىزگە ەتيۋد كورسەتشى. مىسالى، سەن ۇيگە قايتىپ كەلە جاتىرسىڭ، ال ول بولسا وتقا ورانىپ جاتىر، ءورت ىشىندە اناڭ قالىپ قويعان» دەيدى. اۋدارماشى اۋدارىپ ۇلگەرەمىن دەگەنشە، «ەتيۋد» دەگەن ءسوزدىڭ ءوزىن العاش رەت ەستىگەن ءامينا تەرەزەگە جانۇشىرا جۇگىرىپ كەلىپ «اپا!» دەپ ايقاي سالادى. مەركۋريەۆ ونى ارەڭ دەگەندە ۇستاپ قالادى، ايتپەسە قىزدىڭ ەكپىنى تەرەزەدەن سەكىرىپ كەتەتىندەي بولعان ەدى.
ونىڭ ءبىر ساتتىك كەيىپكەر كەيپىنە ەنۋى مەركۋريەۆتى تاڭ-تاماشا قالدىرىپ، ءتانتى ەتكەنى سونشالىق، ول بىردەن «سەن قابىلداندىڭ» دەيدى. وسى ساتتەن باستاپ ءامينانى مەركۋريەۆ تە، ونىڭ ايەلى يرينا مەيەرحولد تا ءوز قىزدارىنداي قامقورلاپ، ءجيى ۇيلەرىنە قوناققا شاقىراتىن بولادى.
ءامينانىڭ وتباسىنا دەگەن قامقورلىعى مەن جاناشىرلىعى ەرەكشە بولاتىن. لەنينگرادتا وقىپ جۇرگەن العاشقى ايلاردىڭ بىرىندە ۇلكەن اعاسى قاپتاعايدىڭ تۇتقىندالعانى تۋرالى حابار كەلەدى. قايعىنى كوتەرە الماعان ەكىنشى اعاسى سادىر توسەك تارتىپ جاتىپ قالادى. وسى ۋاقىتتا جاسى ون بەستەگى، ورىس تىلىندە ارەڭ سويلەيتىن ءامينا «بۇكىلوداقتىق ستاروستا» ميحايل كالينيننىڭ قابىلداۋىنا ماسكەۋگە جول تارتىپ كەتەدى.
ول ماسكەۋگە كەلىپ قورعاۋشى جالداپ، كالينيننىڭ قابىلداۋىندا كەزەك توسىپ وتىرادى. ولار تۋرالى كالينينگە تەلەفون ارقىلى حابارلاعان حاتشى قىز قازاقستاننان ءبىر كىشكەنتاي قىزدىڭ ادۆوكاتپەن كەلىپ وتىرعانىن ايتادى. كالينين كىشكەنتاي قىزدىڭ ءوزى عانا كىرسىن دەيدى. كەيىن بۇل تۋرالى ءامينا اپاي ءوز ەستەلىكتەرىندە بايانداپ بەرەدى. ءامينا اپايدىڭ ايتۋىنشا، كالينين ونى ورنىنان تۇرىپ قارسى الادى. كالينيننىڭ جىلىۇشىراعانى سونشالىق، ءامينا جۇگىرىپ بارىپ ونى قۇشاقتاپ جىلاپ جىبەرەدى. اڭتارىلىپ قالعان كالينين بولسا، كىشكەنە قىزدى قالاي جۇباتارعا بىلمەي، ءمان- جايعا قانىققان سوڭ اعاسىن بوساتۋعا ۋادە بەرەدى. كەيىن شىن مانىندە ءامينانىڭ اعاسى قاپتاعاي كوپ ۇزاماي، ۇيىنە ورالادى. الايدا، قاپتاعاي تۇرمەدەن تاپقان ناۋقاسىنىڭ ارقاسىندا ۇزاق جاساي الماي، ومىردەن ەرتە وتەدى. باۋىرىنىڭ قايعىسىنان قان جۇتىپ توسەك تارتىپ قالعان ەكىنشى اعاسى سادىر دا ونىڭ ارتىنان كوپكە ۇزاماي، كوز جۇمادى.
ءامينانىڭ ومىردە كورگەن تۇرمىستىق قيىنداقتارى ونىڭ كينودا كەز- كەلگەن ءرولدى شىنايى ويناۋىنا سەبەپ بولدى. ءامينا اپاي كينودا ۇنەمى ءوزىن ويناپ جۇرگەندەي بولاتىن. «اباي اندەرى» فيلمىندەگى اجار رولىندە، «انا تۋرالى اڭىزداعى» تولعاناي رولىندە، «تاقيالى پەرىشتەدەگى» انا رولىندە ول ءوزىنىڭ جاقىندارىنا دەگەن سۇيىسپەنشىلىگىن، جاناشىرلىعىن، الاڭىن كەيىپكەر ارقىلى بەرۋگە تىرىستى. جانە بۇل ونىڭ قولىنان كەلدى دە.
1938 -جىلى لەنينگرادتا وقىپ جۇرگەن كەزىندە قازاق كۋرسى شىمكەنت قالاسىنا جىبەرىلەدى. ستۋدەنتتەرمەن بىرگە ولاردىڭ وقىتۋشىسى ۆاسيلي مەركۋريەۆ تە اتتانادى. لەنينگراد تەاتر ينستيتۋتىنىڭ تۇلەكتەرى شەكسپيردىڭ «ز ۇلىمدىق پەن ماحاببات» سپەكتاكلىن ديپلومدىق جۇمىس رەتىندە تاڭداعان بولاتىن. ءامينا بۇل سپەكتاكلدە جەتەكشى ءرول - لۋيزانى سومدايدى.
1940 -جىلى ءامينا مەن ونىڭ كۇيەۋى كاماسي ءومىرزاقوۆ الماتىعا كوشىپ كەلىپ، قازاق مەملەكەتتىك اكادەميالىق دراما تەاترىنا جۇمىسقا تۇرادى. سوعىستىڭ العاشقى جىلدارىندا- اق، تەاتردا قىسقارتۋ جۇرگىزىلە باستايدى. ءامينا ءوزىنىڭ تىك ءارى ەركىن مىنەزى ءۇشىن جۇمىستان ءبىرىنشى بولىپ شىعارىلادى.
كۇيەۋى مايدانعا اتتانادى. ال ءامينا بولسا، كىشكەنتاي قىزىن اسىراۋ ءۇشىن سول ۋاقىتتا الماتىعا كوشىپ كەلگەن ورتالىق بىرىكتىرىلگەن كينوستۋدياعا مونتاجەردىڭ شاكىرتى بولىپ جۇمىسقا تۇرادى.
ونىڭ مونتاجدى شەبەر يگەرگەنى سونشالىق، التىنشى رازريادقا يە بولادى. 1945 -جىلى گريگوري روشال الماتىدا «اباي اندەرىن» تۇسىرە باستايدى. باستى رول اجاردى سومداۋعا قازاقتىڭ ءتۇرلى سۇلۋ قىزدارى شاقىرىلادى. ولاردىڭ اراسىندا ءبيشى شارا جيەنقۇلوۆا دا بولعان. ءامينا بۇل قىزداردىڭ جانىندا اسا ادەمى دە كورىنبەگەن. الايدا، ونىڭ كينوستۋديادا جۇمىس جاساۋى بىردە روشالمەن كەزدەيسوق كەزدەسىپ قالۋىنا سەبەپ بولادى. روشال ءامينانى دا فوتوبايقاۋعا قاتىسۋعا شاقىرادى. ءامينا ءوزىنىڭ فوتوسىن روشالدىڭ ستسەناريدىڭ اۆتورلارىنىڭ ءبىرى مۇحتار اۋەزوۆقا كورسەتىپ جاتقانىن بايقاپ قالادى. كلاسسيككە ءامينانىڭ پۇشىق مۇرىنى ۇنامايدى.
الايدا، روشال «ماعان ونىڭ جانىپ تۇرعان كوزدەرى كەرەك» دەپ قويمايدى. روشال فوتونىڭ استىنعى جاعىن الاقانىمەن جاۋىپ، ونىڭ كوزدەرىن كورسەتەدى: «مۇرىن بولادى، ماعان ونىڭ كوزدەرى كەرەك» دەيدى. شىن مانىندە ءتۇسىرىلىم كەزىندە ونىڭ مۇرنىن گۋمۋستان جابىستىرىپ جاسايدى. وعان ءتۇسىرىلىم كەزىندە اشىعۋعا تۋرا كەلدى، سەبەبى قولدان جاسالعان مۇرىن تاماق جەگەندە جانە قاتتى سويلەگەندە جارىلىپ كەتەتىن.
ءامينانىڭ بۇل ۋاقىتتا اياعى اۋىر بولاتىن. ولار كۇيەۋى ەكەۋى ۇلدى بولۋدى قالاعان ەدى. ءامينا كينوعا قايتىپ ورالعىسى كەلەدى، سوندىقتان رەجيسسەردەن ءوزىنىڭ جۇكتى ەكەنىن جاسىرىپ قالادى. بىردە ءتۇسىرىلىم كەزىندە اتتىڭ اياعى شۇڭقىرعا كىرىپ كەتىپ، ات ۇستىندەگى ءامينا ۇشىپ تۇسەدى، ال ات بولسا ونىڭ ۇستىنەن سەكىرىپ وتەدى. قۇداي ساقتادى دەگەن وسى.
ابايدىڭ شاكىرتتەرىنىڭ ءبىرىن ويناعان شاكەن ايمانوۆ «ەرتەڭ ءامينا جۇمىسقا شىقپايتىن بولار، بارلىعىمىز دەمالىس جاسايىق، مەن بالامدى سۇندەتتەيىن» دەيدى. الايدا، ەرتەڭىنە تاڭەرتەڭ شاكەننەن وزگەلەردىڭ بارلىعىنىڭ ءتىپتى ءامينانىڭ دا ءتۇسىرىلىم الاڭىنا جينالعانى تۋرالى حابار كەلەدى. بالانى شاكەنسىز سۇندەتتەۋگە تۋرا كەلەدى. «ءبىز ەكەۋمىز ءبىر وقپەن ەكى قوياندى اتتىق. ەپيزودتى تۇسىردىك، بالانى سۇندەتتەدىك. جارايسىڭ پۇشىق قىز!» دەپ كۇلەدى ايمانوۆ.
ءتۇسىرىلىم اياقتالعاننان كەيىن دە ءامينا كينوستۋديادا مونتاجەر بولىپ جۇمىسىن جالعاستىرا بەردى. ناتاليا ساس ت ي ۋ ز-دى اشقان ۋاقىتا ءامينا بىرىنشىلەردىڭ قاتارىندا سول جەرگە جۇمىسقا قابىلدانادى. شەكسپيردىڭ «دۆا ۆەرونەتس» سپەكتاكلىنىڭ قويىلىمىندا دجۋليانىڭ رولىنە اكتريسا تابا المايدى. كاماسي ناتاليا يلينيچكە تاقاپ كەلىپ، «مەنىڭ ايەلىمدى بايقاپ كورىڭىزشى» دەيدى.
ءامينا «جاۋىزدىق مەن ماحابباتتان» فراگمەنت ويناپ كورسەتكەندە، ساس ونى بىردەن ترۋپپاعا قابىلدايدى. ءامينا ءومىرىنىڭ سوڭىنا دەيىن وسى جەردە جۇمىس جاسايدى.
«باستىسى مەنىڭ جۇرەگىم جاس، ال كينودا 100 جاستاعى كەمپىرلەردى دە ويناي الامىن» دەپ كۇلەتىن ءامينا اپاي. سوندىقتان بولار، ول ءوزى كارى بولماسا دا، «تاقيالى پەرىشتەدەگى» انا ءرولىن وتە ءساتتى سومداپ شىقتى. ونىڭ كينوداعى ارىپتەسى ءالىمعازى رايىمبەكوۆ تالدىقورعان وبلىسىنىڭ كولحوز جۇرگىزۋشىسى بولاتىن. ول كينو الەمىنەن مۇلدەم بەيحابار بولعانىنا قاراماستان، ءامينانىڭ كاسىبيلىگى مەن شىنايىلىعىنىڭ ارقاسىندا ءوزىن ونىڭ بالاسى سەزىنگەنى سونشالىق، كينوتۋىندى شىن ومىردەگىدەي ءساتتى شىقتى.
ءامينانىڭ ادامدارعا سەنىمدىلىك سىيلايتىن ەرەكشە دارىنى بولدى. ونىڭ تۋعان ۇلى تالاس جاس ءوسپىرىم شاعىندا يۋليا كاراسيكتىڭ «جابايى يت نەمەسە العاشقى ماحاببات تۋرالى پوۆەست» فيلمىندە ناناي بالاسى فيلكانىڭ ءرولىن سومداپ، سول ءۇشىن ۆەنەتسيان كينوفەستيۆالىنىڭ باس جۇلدەسىنە يە بولادى. اياق استىنان اتاقتى بولىپ شىعا كەلگەن جاسوسپىرىمگە «سەنىمەن دوس بولعىم كەلەدى» دەگەن حاتتار ماسكەۋدەن، لەنينگرادتان، بالتىقتان، كاۆكازدان، موڭعوليادان، قىتايدان، فرانسيادان، انگليادان قارشا بوراپ كەلىپ جاتتى.
«مەن دە، اناڭ دا ەڭبەگى سىڭگەن ارتىستەرمىز، ءبىراق سەن ءبىزدىڭ ەكەۋمىزدى دە باسىپ وزدىڭ. كينوداعى كارەراڭ باستالماي تۇرىپ، مۇنشاما ماراپاتقا يە بولىپ ۇلگەردىڭ» دەپ كۇلەتىن اكەسى. اتاقتى بالانىڭ كوتەرە المايتىنى انىق ەدى. ول ءتۇزۋ جولدان بۇرىس كەتىپ، شالت باستى. ال اكەسى ومىردەن وتكەننەن كەيىن، ءتىپتى ىشىمدىككە اۋەستەنەدى. سول ۋاقىتتا بالاسىنىڭ قىلىعىنا نالىعان ءامينا اپاي: «بالام، ءومىرىڭدى قايتا باستا، مەنى دە، اكەڭنىڭ ءارۋاعىن دا قور قىلما... نەمەسە كەت... ءبىرجولا ومىردەن» دەيدى. تالاس اناسىنىڭ وسى سوزدەرىنەن كەيىن اراقتى قايتا اۋزىنا المايدى. اكە- شەشەسىنە لايىقتى ۇل بولۋعا تىرىسادى.
ءامينا 45 جاسىندا ەرتە جەسىر قالادى. كاماسي ءومىرزاقوۆ كەشكىلىك سپەكتاكلگە قاتىسادى، ال تاڭەرتەڭ وكپە ارتەرياسىنىڭ جارىلىپ كەتۋىنەن كوز جۇمادى.
تالانتتى، اتاقتى، حالىقتىڭ سۇيىكتىسى بولعان ءامينانىڭ تۇرمىسقا شىعۋىنا دا بولاتىن ەدى. وعان بالالارىن جالعىز ءوزى اياعىنان تۇرعىزۋ وڭايعا سوقپادى. الايدا، ول كۇيەۋىنىڭ ولىمىنەن كەيىن ءوزى ءۇشىن ايەل باقىتى تەك ءبىر عانا مارتە بولادى دەپ شەشتى.
ول تەاتر، كينو، تەلەۆيزيا، راديودا ءتىپتى قوعامدىق جۇمىستارعا دا ۇلگەرىپ جۇرەتىن. ءامينا قالالىق ءماسليحات دەپۋتاتى بولعان. «سەن وزگەلەر ءۇشىن بىزگە جاساعاننان دا كوپ جاقسىلىق جاسايسىڭ» دەپ رەنجىگەن بالالارىنا «سەندەر وزدەرىڭ دە كەز- كەلگەن قيىندىقتان شىعا الاسىڭدار، ال ولارعا كومەكتەسەتىن ەشكىم جوق» دەپ جاۋاپ بەرەتىن.
جىلدار ءوتىپ جاتتى. ءبىر كەزدەردەگى قايراتتى دا مىقتى ءامينا اپاي اۋرۋ- سىرقاۋى كوپ قارت ادامعا اينالدى. ونىڭ اينالاسىندا بولعان جاقىندارى ءامينا اپايدىڭ سول كەزدەرى پوليارتريت، ديابەت، قان قىسىمى، جۇرەك اۋرۋلارىمەن اۋىرعانىن ايتادى. الايدا، ول ەشقاشان اۋىردىم دەپ تە مويىعان ەمەس. «بەيشارا بولىپ كورىنگىم كەلمەيدى. مەن قول قۋسىرىپ قاراپ وتىر دەپ ويلاساڭدار - قاتەلەسەسىڭدەر. ال مەنىڭ ۇلىمدى كىم تاماقتاندىرادى؟ كەلىنىم تاڭەرتەڭ جۇمىسقا ەرتە كەتىپ، كەش كەلەدى. مەن اسۇيگە كىرگەن بويدا، تۇسكى اسقا، كەشكى اسقا نە پىسىرسەم ەكەن دەپ ويلايمىن» دەيتىن ول.
ول 2006 -جىلدىڭ قىركۇيەك ايىندا ومىردەن ءوتتى. «كەشكىلىك مەنى جانىنا شاقىرىپ، باسىمنان قۇشاقتادى. «بارلىعى جاقسى بولادى. بارىپ ۇيىقتا، ەرتەڭ جۇمىسقا بارۋىڭ كەرەك» دەدى. ال تاڭەرتەڭ ونىڭ بولمەسىنە كىرگەنىمدە، ونىڭ تىنىس الۋىنىڭ ءجايلاپ باياۋلاپ بارا جاتقانىن اڭعاردىم. «اپا دەمالشى» دەپ ايقايلادىم. ول قاباعىن ءجاي عانا كوتەرىپ «ەندى، بولدى...» دەدى»، - دەيدى اناسى تۋرالى ەستەلىك سۇقباتىندا تالاس ءومىرزاقوۆ.
كاماسي مەن ءامينا وتە ادەمى جۇپ بولاتىن. ءامينانى جۇبايى جۇمىستا جۇرگەندە دە ەركەلەتىپ جۇرەتىن.
ءامينا اپايدى تەاتردا ءومىر ءسۇردى دەسە دە بولادى. ول ءوز ءومىرىن كينوسىز ەلەستەتە المايتىن. ول اۋىرىپ توسەك تارتىپ جاتىپ قالعان كەزدە دە تەاترداعى اكتەرلەردىڭ قىم- قۋىت تىرلىگى تۋرالى تەلەفون ارقىلى شاكىرتتەرىنەن ءبىلىپ وتىراتىن.
ءامينا ءومىرزاقوۆا 1996 -جىلدان باستاپ كينوعا ءتۇسۋدى توقتاتتى. الايدا، ول زەينەتكە شىقسا دا، قوعامدا اسا بەلسەندى بولدى. ءتۇرلى تەلەباعدارلامالارعا ءتۇسىپ، جۋرناليستەرگە سۇقباتتار بەرۋدەن باس تارتپايتىن. 1999 -جىلى وتان وردەنىمەن ماراپاتتالدى، ال 2001 -جىلى تارلان پرەمياسىنىڭ لاۋرەاتى اتاندى.
1996 -جىلى ءامينا ءومىرزاقوۆا ءوزىنىڭ ۇلى، رەجيسسەر تالاس ءومىرزاقوۆتىڭ «ءامينا» دەگەن العاشقى فيلمىندە ءوزىن ءوزى وينايدى.
ءامينا ءومىرزاقوۆا تەك كينوعا ءتۇسىپ قانا قويعان جوق، ول كۇللى حالىقتىڭ سۇيىسپەنشىلىگىنە بولەندى، كورەرمەنىنە اسقان جىلىلىق پەن انالىق ماحاببات سىيلادى، سەزىندىردى.
EL. KZ
