لوندوننىڭ اتاقتى اۆتوبۋسى نەگە قىزىل ءتۇستى جانە ەكى قاباتتى؟

كەيبىر ادام لوندون دەگەندە ەل استاناسىن كەزىپ جۇرەتىن ەكى قاباتتى قىزىل اۆتوبۋستى كوزگە ەلەستەتىنىن ايتادى. وسى اۆتوبۋس نەلىكتەن تۋريستەر مەن جەرگىلىكتى تۇرعىنداردىڭ سۇيىكتى كولىگىنە اينالدى؟ ونى ەكى قاباتتى ەتىپ جاساۋ يدەياسى قايدان كەلدى؟ وسى سۇراقتار توڭىرەگىندە ىزدەنىپ كورەيىك.

بارىنە بەلگىلى الىپ شاھارلاردا حالىق سانىنىڭ ءوسۋى مەن ترانسپورتقا دەگەن سۇرانىس - باستى پروبلەمالاردىڭ ءبىرى. لوندون دا بۇل ماسلەدەن شەت قالماعان. قالاداعى العاشقى ومنيبۋستار ⅩⅨ عاسىردىڭ 20-جىلدارىندا پايدا بولىپ، جولاۋشىلاردى تاسي باستادى.

العاشقى اۆتوبۋستار

ومنيبۋس - ⅩⅨ عاسىردا بولعان قالا ىشىندەگى قوعامدىق كولىك ءتۇرى نەمەسە اۆتوبۋستىڭ «اتاسى». بۇل العاشقى اۆتوبۋستار ءبىر ۋاقىتتا 15-20 ادامدى مەكەنىنە جەتكىزەتىن. ۋاقىت وتە ومنيبۋستار جىلدام ءارى جەڭىل ءجۇرۋى ءۇشىن رەلستەردە قوزعالا باستادى. ءبىراق لوندون حالقى قارقىندى ءوستى دە، ومنيبۋستاردان دا بولەك جاڭا كولىك ءتۇرى قاجەت بولا باستادى. مىنە، وسى ۋاقىتتا ومنيبۋسقا قوسىمشا قابات قوسۋ يدەياسى پايدا بولدى. وسىلاي 1847 -جىلى قوس قاباتتى جاڭا كونسترۋكتسيا قالا ىشىندە قاتىناي باستادى. ءبىراق باسىندا جولاۋشىلاردى تاسىمالدايتىن كولىكتىڭ بۇل ءتۇرى ادامدارعا اسا قولايلى بولعان جوق. تەك، 5 جىل وتكەندە عانا جولاۋشىلارعا ءبىراز قولايلى كولىكتىڭ جاڭا مودەلى قۇراستىرىلدى.

ومنيبۋستىڭ جاڭا ءتۇرى

ۋاقىت وتە لوندوندا ترانسپورتتىڭ باسقا دا تۇرلەرى پايدا بولا باستادى. ومنيبۋستىڭ قوزعالتقىشتى ءتۇرى قالا ىشىندە قاتىناي باستادى. ءبىراق ونىڭ ەكى قاباتتى مودەلى ساقتالىپ قالدى.

اتاعى شىققان دابلدەكەر (اۆتوبۋس) Routemaster دەپ اتالادى. ونى سوزبە- ءسوز اۋدارار بولساق - «جول قوجايىنى» بولىپ شىعادى. ال اۆتوبۋستىڭ قىزىل ءتۇسى دە كەزدەيسوق تاڭدالماعان. ول لوندوننىڭ تۇماندى اۋا رايىندا نازاردان شەت قالماۋى ءۇشىن ادەيى تاڭدالعان.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى