ماڭعىستاۋدا جاڭا كەندىرلى اۋىلى قۇرىلادى
جاڭاوزەن قالاسى اكىمىنىڭ ورىنباسارى نۇربەرگەن حۋديبايەۆ مالىمەتىنشە، راحات اۋىلىن ەكىگە بولۋگە مامانداردىڭ جەتىسپەۋشىلىگى، حالىق سانىنىڭ كۇرت ءوسۋى، كوممۋنالدىق قىزمەتتەردىڭ ۋاقىتىلى كورسەتىلمەۋى سەبەپ.
«بۇگىنگى كۇنى راحات اۋىلى حالقىنىڭ سانى - 45848 ادام قۇرايدى. حالىق سانى جىل باسىمەن سالىستىرعاندا 2555 ادامعا ءوسىپ وتىر. ايتا كەتسەم، 2017 -جىلى - 32111 ادام، 2018 -جىلى - 38267 ادام، 2019 -جىلى - 43293 ادامعا ءوسىم بار. اۋىلدىڭ جالپى كولەمى - 4605,2 گەكتار. راحات اۋىلىنداعى «اقسۋ» ، «مەرەي» «راحات» شاعىناۋداندارى «راحات» اۋىلىنىڭ قۇرامىندا قالىپ، «جۇلدىز» شاعىناۋدانى جاڭادان قۇرىلاتىن كەندىرلى اۋىلىنىڭ قۇرامىنا كىرەدى»، - دەدى نۇربەرگەن حۋديبايەۆ.
ماسەلەن، تۇرعىنى 40 مىڭنان اساتىن ەلدى مەكەندە 18-20 مەملەكەتتىك قىزمەتكەر بولۋى ءتيىس. ال، اۋىلدا مامان تاپشى.
«راحات اۋىلى بولىنگەن جاعدايدا بيۋدجەت شىعىندارىنىڭ كولەمى 771,2 ميلليون تەڭگەدەن 898,2 ميلليون تەڭگەگە دەيىن ۇلعايادى. ۇسىنىلعان بيۋدجەت شىعىندارى كولەمىنىڭ ءوسۋ سەبەبى مەكتەپكە دەيىنگى ءبىلىم بەرۋ، تازالىق قىزمەتى، كوشە جارىعىنا قىزمەت كورسەتۋ مەن اۋىلدى اباتتاندىرۋ جۇمىستارىنىڭ اۋقىمىنا بايلانىستى بولادى»، - دەدى راحات اۋىلىنىڭ اكىمى وسەرباي تابىنشايەۆ.
كەلەشەكتە كەندىرلى اۋىلىندا دەنساۋلىق، ءبىلىم بەرۋ، سپورت، مادەنيەت، اۆتوموبيل جولدارى، ينجەنەرلىك- ينفراقۇرىلىم، مەملەكەتتىك قىزمەت كورسەتۋ، تۇرعىن ءۇي- كوممۋنالدىق شارۋاشىلىعى مەن كاسىپكەرلىكتى دامىتۋ سالاسى دامىپ، جاڭا نىساندار بوي كوتەرەدى دەپ جوسپارلانعان.
