ايدوس سارىم: ساياسات - ەرىككەنىڭ ەرمەگى ەمەس
ونىڭ ايتۋىنشا، ساياسي ءومىر الماتى، نۇر- سۇلتان جانە بىرنەشە وبلىس ورتالىقتارىندا عانا بار.
«ساياسات - ەرىككەنىڭ ەرمەگى ەمەس. ءبىر عانا مىسال كەلتىرەيىن. بىزدە پارتيا ءتىزىمى دەگەن ۇعىم بار. پارتيا ۇسىنىپ وتىرعان تىزىمدەگى ۇمىتكەرگە 639 مىڭ تەڭگە اقشا تولەۋى كەرەك. ياعني، 10 ادام ۇسىنساڭىز 6 ميلليون، 100 ادام ۇسىنساڭىز 63 ميلليون تەڭگە قاجەت. بۇل تەك قانا ءتىزىمدى ۇسىنۋ ءۇشىن. ول وڭاي ەمەس. ياعني، ەكىنىڭ ءبىرى پارتيا قۇرا المايدى. مەنىڭ ويىمشا، كوپ پارتيادان گورى ءاربىر ايماقتا، اۋداندا، اۋىلدا ناقتى، مىقتى وكىلى بار پارتيا كەرەك. بىزگە جالپى ۇلتتىق پارتيالار قاجەت. مەن شاعىن پارتيالارعا قارسىمىن. سەبەبى، ءبىزدىڭ ەلدە سەپاراتيزم دەگەن اڭگىمە بار. پارتيا دەگەنىمزى ول - ساياسي ماشينا. مىسالى، قارعىزستاندا 200 پارتيا بار. سولاردىڭ تەك 15 ءى عانا سايلاۋعا اقشا جيناي الدى. قازىر قارجىلارى تاۋسىلىپ، قالاي سايلاۋعا تۇسەمىز دەپ وتىر. ءبىزدىڭ ەلدە ساياسي ءومىر الماتى، نۇر- سۇلتان جانە ساناۋلى وبلىس ورتالىقتارىندا عانا ءجۇرىپ جاتىر» ، - دەيدى ساياساتتانۋشى.
سونىمەن قاتار، ول قوعامدا ساياسي بەلسەندىلىكتىڭ تومەن ەكەنىن تىلگە تيەك ەتتى. «ءبىزدىڭ قوعام، حالىق كوپ نارسەنى شاتاستىرادى. ونىڭ ىشىندە ساياساتتىڭ ماقساتى مەن ساياساتتىڭ كەيبىر قۇرالىن شاتاستىرىپ الادى. فەيسبۋككە پوست جازۋ — ساياسات ەمەس. ول ساياساتتى جەتكىزۋ. ميتينگ، پيكەت وتكىزۋ ول ساياسات ەمەس - ول بەلگىلى ماقساتتان تۋىنداعان قاجەتتىلىك. سونى بيلىككە جەتكىزۋدىڭ جولى. ساياساتتىڭ ەڭ ۇلكەن ماقساتى، مۇدەسسى - ول بيۋدجەت، زاڭدار مەن باعدارلامالار. پارلامەنتتە سويلەگەن سوزدەردىڭ ءبارى ساياسات ەمەس. شىن ساياسات سەن ءبىر باعدارلاما ازىرلەپ، ونى قورعاپ، دالەلدەي الساڭ — سول» ، - دەيدى ول.
ساياسات تانۋشى ساياسي جۇيە بەلگىلى ءبىر ۋاقىتتا داعدارىسقا ءتۇسىپ وتىراتىنىن جەتكىزدى.
«داعدارىستان قورىقپاۋ كەرەك. ساياسي تاپتىڭ وزگەرىسكە دايىن نەمەسە دايىن ەمەستىگىن ايقىنداپ بەرەدى. قىتايدىڭ مىقتى ءبىر تۇجىرىمداماسى بار. ول «اسپان مانداتى» دەپ اتالادى. ەگەر بەلگىلى ءبىر جۇيە قانداي دا ءبىر جولمەن بيلىككە كەلسىن، كەلمەسىن، ەڭ باستىسى بۇكىل سىناقتان، ساياسي دودادان، توزاقتان امان وتەتىن بولسا، ياعني اسپاننىڭ ءوزى وعان ماندات بەردى. ونىڭ بيلىككە قاقىسى بار. سول سياقتى ساياسي جۇيەدە «اسپان مانداتىن» قيىن قىستاۋ، داعدارىس كەزىندە دالەلدەپ وتىرۋ كەرەك. وسىدان امان شىقتى ما، ياعني پوتەنتسيالى بار. بىزدە ەكىنىڭ ءبىرى كوپ اڭگىمە ايتادى. «بۇگىنگى بيلىك ەرمەكساز، بۇگىنگى بيلىك كارتون» دەپ جاتادى. بۇل كارتون مەملەكەت ءالى تالاي ادامنىڭ ءومىرىن وزگەرتىپ جىبەرۋى مۇمكىن. جاقسى بولسىن، جامان بولسىن، مىقتى مەملەكەت كوپ نارسەنى شەشە الادى. قيراپ جاتقان جوقپىز، دالادا تەزەك تەرىپ جۇرگەن جوقپىز. راس، قيىندىقتار بار، كەدەيشىلىك بار، ونى جوققا شىعارا المايمىز. ونى ايتۋ كەرەك. ونىمەن كۇرەسۋ كەرەك. ءبىراق ءالسىز مەملەكەت ەمەسپىز» ، - دەپ قورىتىندىلادى ايدوس سارىم.
