پوليتسەيلەر ارمەنيالىق كولىكتەردى زاڭدى تىركەۋ ءتارتىبىن ءتۇسىندىردى
«مەملەكەت باسشىسىنىڭ تاپسىرماسىنا سايكەس، ارمەنيا رەسپۋبليكاسىنان ەلىمىزگە اكەلىنگەن كولىكتەردى ۋاقىتشا تىركەۋگە قويۋ ماسەلەسى بىرىزدەندىرىلگەن بولاتىن. بىرەگەي اكتسيانىڭ اياقتالۋ مەرزىمى 2021 -جىلدىڭ ناۋرىز ايىنا دەيىن ۇزارتىلعانىن دا اۆتواۋەسقويلار جاقسى بىلەدى. ەلىمىزدەگى قولدانىستاعى زاڭناماعا سايكەس باسقارۋ تەتىگى، ياعني ءرولى وڭ جاقتا ورنالاسقان اۆتوكولىكتەر تىركەۋگە قويىلمايتىنى انىق. وسىعان وراي، ارمەنيادان اكەلىنگەن وسىنداي كولىك يەلەرىنە تەمىر تۇلپارلارىن تەحنيكالىق تالاپتارعا ساي قىلۋعا مۇمكىندىك بەرىلدى. بارلىق قاجەتتى پروتسەدۋرالاردان كەيىن ولار كولىكتەرىن الماتى قالاسى، رايىمبەك داڭعىلى، 312 مەكەنجايىندا ورنالاسقان «الماتى- ستاندارت» عىلىمي- زەرتتەۋ ورتالىعى» ج ش س بازاسىندا سىناقتان وتكىزىپ، قاۋىپسىزدىك كۋالىگىن الۋى ءتيىس»، - دەدى الماتى وبلىسى پوليتسيا دەپارتامىنتى اكىمشىلىك پوليتسيا باسقارماسىنىڭ باستىعىنىڭ مىندەتىن اتقارۋشى پوليتسيا پولكوۆنيگى سەرىكجان ءابجانوۆ.
پوليتسيا وكىلىنىڭ ايتۋىنشا، وسىنداي كۋالىگى بار كولىك ەش قيىندىقسىز تىركەۋگە قويىلادى. ال، كولىكتىڭ قاۋىپسىزدىگىن تەكسەرىپ، كۋالىك تابىستايتىن مەكەمەلەر ەلىمىزدىڭ سولتۇستىگىندە قوستاناي جانە پەتروپاۆل قالالارى مەن باتىسىنداعى ورال قالاسىندا دا بار.
«وسى تالاپتى ورىنداعان 29 كولىكتى تىركەۋگە قويدىق. ۇتىمدى ءساتتى پايدالانىپ، ارمەنيالىق تىركەۋدەگى كولىگى بار تۇرعىنداردى وسى مۇمكىندىكتى پايدالانىپ، كولىكتەرىن زاڭداستىرىپ الۋعا شاقىرامىن»، - دەدى پوليتسيا پولكوۆنيگى سەرىكجان ءابجانوۆ.
