د د س ۇ: ناۋرىز ايىندا كوروناۆيرۋستىڭ بەتىن قايتارامىز

اسىرەسە، ىندەت كارى قۇرلىق پەن قۇراما شتاتتاردا ءورشي تۇسكەن. يتاليادا ەپيدەميولوگيالىق جاعداي وتە كۇردەلى. كۇن وتكەن سايىن ەلدە اۋرۋحاناعا تۇسكەن ناۋقاستار سانى ارتىپ بارادى. دەنساۋلىق ساقتاۋ مينيسترلىگىنىڭ مالىمەتى بويىنشا بۇگىندە اۋرۋحانالارداعى ناۋقاستاردىڭ جارتىسىنا جۋىعى كوروناۆيرۋس جۇقتىرعان ازاماتتار ەكەن. ىندەتتەن اسىرەسە، لومبارديا مەن پەمونت وڭىرلەرى زارداپ شەگىپ وتىر. مۇندا ناۋقاستاردىڭ كوپتىگى سونشا، اۋرۋحانالاردا ورىن جوق. دارىگەرلەر ولارعا قوسىمشا ورىن ىزدەۋگە ءماجبۇر.

ماسسيمو پۋوتي، ينفەكتسيالىق ءبولىمنىڭ باسشىسى:

- ءبىز بارلىق پالاتالاردى قايتا جابدىقتادىق. وتە تەز ارەكەت ەتۋگە تۋرا كەلدى. كەيبىر ناۋقاستى باسقا بولىمشەلەرگە اۋىستىردىق. جاڭادان كەلىپ تۇسكەن ناۋقاستارعا ورىن بەرۋ ءۇشىن كەيبىرى ءتىپتى اۋرۋحانادان شىعارىلدى.

شۆەتسيادا دا جاعداي ءماز ەمەس. مۇندا نەبارى ءبىر اپتادا كوروناۆيرۋس جۇقتىرىپ، اۋرۋحاناعا تۇسكەندەردىڭ قاتارى 60 پروتسەنتكە ارتىپ كەتكەن. ماماندار قازىرگى جاعداي وتە اۋىر دەپ وتىر. ويتكەنى كومەككە مۇقتاج ناۋقاستاردىڭ سانى وتە جىلدام قارقىنمەن ءوسىپ جاتسا كەرەك.

چەرنوگوريا بيلىگى ۆيرۋستىڭ تارالۋىن توقتاتۋ ءۇشىن ءبىرقاتار شەكتەۋ ەنگىزدى. اتاپ ايتساق، ەلدىڭ ەكى قالاسىندا كومەندانتتتىق ساعات جاريالاندى. وعان ساي، كەشكى ساعات وننان تاڭعى 5 كە دەيىن سىرتقا شىعۋعا بولمايدى. جاڭا تارتىپكە بايلانىستى ءدامحانالار قىزمەتىن توقتاتىپ، وقۋشىلار قاشىقتان وقۋ رەجيمىنە كوشتى.

كاليفورنيا بيلىگى دە ايماقتاعى كوروناۆيرۋس جۇقتىرۋ دەرەكتەرىنىڭ وسۋىنە الاڭداپ وتىر. سەبەبى سوڭعى تاۋلىكتە بۇل شتاتتا 7 مىڭنان استام ادامنان قاۋىپتى ينفەكتسيا انىقتالعان. قالاي بولعاندا دا بۇگىندە كاليفورنيا ا ق ش بويىنشا ۆيرۋس جۇقتىرۋ دەرەكتەرى ەڭ تومەن شتاتتاردىڭ ءبىرى سانالادى. ءبىراق جەرگىلىكتى بيلىك كۇن سۋىتا كوروناۆيرۋس قايتا ءورشي مە دەپ الاڭدايدى.

ال دۇنيەجۇزىلىك دەنساۋلىق ساقتاۋ ۇيىمى كەلەر جىلدىڭ ناۋرىزىندا ىندەتتىڭ بەتىن قايتارامىز دەپ سەنىمدى. ويتكەنى وسى ۋاقىتتا الەمدە ۆيرۋسقا قارسى ۆاكتسينا دايىن بولادى- مىس.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى