كوروناۆيرۋسقا قارسى ۆاكسينا پاندەميانىڭ بارىسىن تۇبەگەيلى وزگەرتەدى - د د س ۇ
بۇل تۋرالى دۇنيەجۇزىلىك دەنساۋلىق ساقتاۋ ۇيىمى باس ديرەكتورىنىڭ كەڭەسشىسى جانە د د س ۇ- نىڭ ۆاكسينالارعا قولجەتىمدىلىكتى قامتاماسىز ەتۋ اكسەلەراتورى جۇمىسىنىڭ باسشىسى بريۋس ەيلۆارد ايتتى، دەپ حابارلايدى قازاقپارات Reuters اگەنتتىگىنە سىلتەمە جاساپ.
بريۋس ەيلۆارد Pfizer Inc's PFE. N جاساپ شىعارعان كوروناۆيرۋس ينفەكسياسىنا قارسى ۆاكسينا سىناعىنىڭ سوڭعى ساتىسىن «وڭ» دەپ باعالادى.
«بۇل نەبارى ارالىق ناتيجە، الدىمىزدا تالاي جۇمىس بار... الايدا بۇگىن ءبىز بولاشاقتا الەم ءۇشىن جاقسىلىقتى كۇتۋگە ءۇمىت بەرەتىن وڭ ناتيجەلەر الدىق» - دەدى ول 194 ەلدىڭ وكىلى قاتىسقان فورۋمدا.
ونىڭ ايتۋىنشا، ناۋرىز ايىنا قاراي كوروناۆيرۋس داعدارىسىنا بايلانىستى جاعداي بۇكىل الەم بويىنشا جۇرگىزىلىپ وتىرعان جۇمىستىڭ ۇلكەن كولەمىنىڭ ارقاسىندا تۇبەگەيلى وزگەرۋى مۇمكىن. Pfizer كومپانياسى ءوز ۆاكسيناسىن سىناقتان وتكىزۋدىڭ سوڭعى كەزەڭىن 90 پايىز ءتيىمدى دەپ باعالاعان. سونداي-اق، Pfizer جانە BioNTech كومپانيالارىنان ۇمىتكەر ۆاكسينانىڭ باستاپقىدا د د س ۇ- نىڭ بۇكىل الەم بويىنشا ۆاكسينالاردى تەڭ قارجىلاندىرۋ جانە ديستريبۋتسيالاۋ ءۇشىن قۇرىلعان COVAX Facility قورىنىڭ تىزىمىندە بولماعانى ايتىلادى.
ەكى كومپانيا دا (Pfizer جانە BioNTech) امەريكا بيلىگىنەن ۆاكسينانى شۇعىل پايدالانۋ ءۇشىن رۇقساتتى وسى ايدا الۋعا دايىن ەكەنىن مالىمدەدى. بۇدان بۇرىن حابارلانعانداي، الدىن الا ناتيجە كورسەتكەندەي، عالىمدار كوروناۆيرۋستان %90 قورعايتىن ءتيىمدى ۆاكسينانى جاساپ شىعاردى.
اۆتور: زارينا تۋعانبايەۆا
