ارقالىقتا وتپەن ويناعان بالالار تۇرعىن ءۇيدى ورتەپ جىبەردى

«ارقالىق قالاسى بايتۇرسىنوۆ كوشەسىندەگى تۇرعىن ءۇي ءورتى تۋرالى اقپارات 9-قاراشا كۇنى ساعات 20:51-دە كەلىپ ءتۇستى. كورشىلەر 2-قاباتتاعى پاتەردەن ءتۇتىن شىققانىن حابارلادى. ساعات 20:55-تە وقيعا ورنىنا قۇرامىندا 2 ارنايى ءورت ءسوندىرۋ تەحنيكاسى، 1 ال-30 اۆتوساتى جانە جەكە قۇرامنىڭ 11 قۇتقارۋشىسى بار №4 م ءو س ب ءورت ءسوندىرۋ جاساعى جەتتى. 2-قاباتتاعى پاتەردە 60 شارشى مەتر الاڭدا ءۇي زاتتارى مەن جيھاز جانىپ جاتقانى انىقتالدى. ءورت سالدارىنان پايدا بولعان ءتۇتىن كىرەبەرىستە تەز تارالا باستادى جانە جوعارى قاباتتاعى تۇرعىنداردىڭ جولىن بوگەدى» ، - دەيدى ت ج د باسپا ءسوز حاتشىسى ءۋاليحان دوسانوۆ.

اۆتوساتى كومەگىمەن 5-قاباتتىڭ بالكوندارىنان 19 ادام، ونىڭ ىشىندە 13 بالا قۇتقارىلدى. سونىمەن قاتار، باسپالداقتار ارقىلى 11 ادام وقشاۋ اۋماققا ەۆاكۋاتسيالاندى.

«گاز- تۇتىننەن قورعاۋ قىزمەتىنىڭ 2 بۋىنى 21:26-دا ءورتتى اۋىزدىقتادى. تاعى 30 مينۋت ىشىندە ءورت سوندىرۋشىلەر ءوز جۇمىستارىن جالعاستىرىپ، ءورتتى تولىعىمەن جويدى. ارقالىق اۋرۋحاناسىنا 4 ادام جاتقىزىلدى، ولاردىڭ ءبىرى - 2014 -جىلى تۋعان بالا. دارىگەرلەر زارداپ شەگۋشىلەرگە ۋلانۋ دياگنوزىن قويدى»، - دەيدى ۋ. دوسانوۆ الدىن الا بولجام بويىنشا، ءورت بالالاردىڭ وتپەن ويناۋىنان بولعان.

اۆتور: قاسقىرباي قويشىمانوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى