مەملەكەت كەدەيشىلىكتى ەڭسەرۋ ءۇشىن وتە كوپ ءىس اتقارىپ جاتىر - داريعا نازاربايەۆا
«قازاقستاندا كەدەيشىلىك شەگىندە ءومىر سۇرەتىن ادامدار كوپ. ولار ءاربىر قالادا، اۋداندا، اۋىلدا بار. ولاردى ءبىلۋ، تاعدىرلارىنا ارالاسىپ، قيندىقتى ەڭسەرىپ، اياعىنان نىق تۇرۋعا كومەكتەسۋ - ءسىز بەن ءبىزدىڭ پارىزىمىز. مەملەكەت كەدەيشىلىكتى ەڭسەرۋ ءۇشىن وتە كوپ ءىس اتقارىپ جاتىر. دەگەنمەن، ول بارلىق ۋاقىتتا بىردەي دەر ۋاقىتىندا كەلمەيدى نەمەسە قاجەتتى ادامعا جەتە بەرمەيدى. مەنىڭشە، ءبىز الەۋمەتتىك قىزمەتتەرگە بەلسەندى كومەك كورسەتىپ، ولاردى مەديتسينالىق، ازىق- تۇلىك، قارجىلىق، زاڭدىق كومەككە مۇقتاجدار تۋرالى اقپاراتتاندىرا الار ەدىك. سونىمەن قاتار ءبىز ومىرلىك قيىن جاعدايعا تاپ بولعان ادامدارعا كومەك كورسەتۋ ءۇشىن قاجەتتى رەسۋرستار تابۋعا، مۇنداي ماسەلەلەرگە قوعام نازارىن اۋدارۋعا سەپ بولا الار ەدىك»، - دەدى ول. «جاڭا جاعدايداعى جاستار: ءىس- قيمىل كەزەڭى» اتتى ونلاين فورۋم بارىسىندا. سونىمەن قاتار داريعا نۇرسۇلتان قىزى بۇل جۇمىستارعا مەكتەپ وقۋشىلارىن، ستۋدەنتتەر مەن قاراپايىم ەرىكتىلەردى تارتۋعا دا مۇمكىندىك بار ەكەندىگىن باسا ايتتى.
«ءبىز پاندەميا تەز ارادا اياقتالا قويادى دەپ ويلامايمىز، ونىڭ جاعدايىندا ءالى ۇزاق ۋاقىت ارەكەت ەتۋگە دايىن بولۋىمىز كەرەك. ول قولداۋدى قاجەت ەتەتىن ادامدارعا بارىنشا كومەك كورسەتۋدى جالعاستىرۋ كەرەك دەگەن ءسوز. جاستار ءۇشىن قوعامعا، ياعني ەلىمىزگە قالتقىسىز قىزمەت ەتۋدەن ماڭىزدى ءىس بولۋى مۇمكىن بە؟ وسى قىزمەت ارقىلى سىزدەر تاجىريبە جيناقتايسىزدار، قۇرمەت پەن بەدەلگە يە بولاسىزدار جانە ومىردە كوپ جەتىستىكتەرگە جەتەسىزدەر. مەن سىزدەرگە شىن جۇرەكتەن وسىنداي يگىلىكتەردى تىلەيمىن. وسىنداي ومىرلىك ۇستانىم جاڭا ۇرپاققا، جاڭا ادامدارعا كەز كەلگەن داعدارىستى جەڭۋگە جانە ۇلتتىق ەگەمەندىگىمىزدى نىعايتۋعا كۇش- قۋات بەرەدى دەپ سەنەمىن»، - دەدى داريعا نازاربايەۆا.
اۆتور: مارلان جيەمباي
