ءتورت مىڭ جىل بۇرىن قولا داۋىرىندە قولدانىلعان كۇيمە اربانىڭ كوشىرمەسى جاسالدى
كۇيمەنىڭ كولەمى، ءپىشىنى سول كۇيىندە ساقتالعان. رەكونسترۋكتسيانى تاريح عىلىمىنىڭ كانديداتى، ارحەولوگ جانە شىعىستانۋشى ۆيكتور نوۆوجەنوۆ پەن «قىرىم ارالى» عىلىمي-رەستاۆراتسيا زەرتحاناسىنىڭ جەتەكشىسى، تانىمال سۋرەتشى - رەستاۆراتور قىرىم التىنبەكوۆ جاساعان.
ۆيكتور نوۆوجەنوۆتىڭ ايتۋىنشا، بۇل وقيعا وسىدان 40 جىل بۇرىن، 1980-جىلى باستالعان.
قاراعاندى ۋنيۆەرسيتەتىنىڭ ەكسپەديتسياسى كەنت قالاشىعىندا قولا ءداۋىرىنىڭ قورعاندارىندا قازبا جۇمىسىن جۇرگىزگەن. سونىڭ بىرىنەن كۇيمە اربانىڭ بولشەكتەرى، اتاپ ايتقاندا دوڭگەلەكتەرى مەن شاناعى تابىلعان. بۇل - سول كەزدە قازىپ الىنعان جادىگەرلەردىڭ ىشىندە ەڭ جاقسى ساقتالعانى ەدى.
«مەن وسى كۇيمە اربانى تازالاپ، كونسەرۆاتسيا جانە رەستاۆراتسيا جاساۋعا قاتىستىم. مىنە، سول كەزدە مەندە ءبىر قىزىق ارمان پايدا بولدى. مۇمكىندىك بولعاندا ادامزات وركەنيەتىنىڭ ەندى قالىپتاسىپ كەلە جاتقان كەزىندە، 4 مىڭ جىل بۇرىن اتا-بابامىز جاساعان وسىناۋ كولىككە مىنسەم دەپ ارماندادىم. سوسىن ۇزاق جىلدار ونى زەرتتەدىم، شاناقتىڭ ۇساق-تۇيەگىن قالپىنا كەلتىردىم، ات ابزەلدەرىن، اربانىڭ ءتيىستى قارۋى مەن كيىمىن، دالادا قولدانۋ جايىن زەردەلەدىم. مىنە، كەشە مەنىڭ بالا ارمانىم ورىندالدى. ءبىز جاساعان كۇيمە اربا قازىر يۋنەسكو باستاماسىمەن مادەنيەتتەردى جاقىنداستىرۋ حالىقارالىق ورتالىعىنىڭ سكۆەرىندە تۇر» دەپ جازادى ارحەولوگ Facebook پاراقشاسىندا.
الماتىلىقتار مەن قالا قوناقتارى قولا ءداۋىرىنىڭ جادىگەرىمەن سۋرەتكە تۇسە الادى.
